തലശേരി: സംസ്ഥാനത്തെ സഹകരണ മേഖലയിലെ പ്രഥമ വനിതാ ഹോസ്‌റ്റൽ രജതജൂബിലി നിറവിൽ. തലശേരി കോ–-ഓപ്പറേറ്റീവ്‌ റൂറൽ ബാങ്ക്‌ വർക്കിങ്‌ വനിതാ ഹോസ്‌റ്റലാണ്‌ സേവനത്തിന്റെ 25 വർഷം പൂർത്തിയാക്കുന്നത്‌. രജതജൂബിലി ആഘോഷം വ്യാഴം പകൽ മൂന്നിനു റൂറൽ ബാങ്ക്‌ ഇ. നാരായണൻ ബാങ്ക്വറ്റ്‌ ഹാളിൽ റിട്ട. ജില്ലാ ജഡ്‌ജി ടി. ഇന്ദിര ഉദ്‌ഘാടനംചെയ്യും. കോ–-ഓപ്പറേറ്റീവ്‌ ടൗൺ ബാങ്കിന്റെ സുവർണജൂബിലി ആഘോഷത്തോടനുബന്ധിച്ചാണ്‌ വനിതാ ഹോസ്‌റ്റൽ നിർമിക്കാൻ അന്നത്തെ പ്രസിഡന്റ്‌ ഇ നാരായണന്റെ നേതൃത്വത്തിലുള്ള ഭരണസമിതി തീരുമാനിച്ചത്‌. 1996 നവംബർ മൂന്നിനു അന്നത്തെ വൈദ്യുതിമന്ത്രി പിണറായി വിജയൻ കല്ലിട്ടു. 2000 മാർച്ച്‌ 11ന്‌ സഹകരണ മന്ത്രി എസ്‌ ശർമ ഉദ്‌ഘാടനംചെയ്‌തു. സംസ്ഥാനത്തിന്റെ വിവിധ ഭാഗങ്ങളിൽനിന്ന്‌ ജോലിക്കും പഠനത്തിനുമായി തലശരിയിലെത്തുന്ന സ്‌ത്രീകൾക്ക്‌ സുരക്ഷിത താമസത്തിനുള്ള ഇടമാണിന്ന്‌ വനിതാ ഹോസ്‌റ്റൽ. 135 പേർക്ക്‌ സ്ഥിരംതാമസ സൗകര്യമുണ്ട്‌.

പരീക്ഷക്കും അഭിമുഖത്തിനും മറ്റുമായി എത്തുന്നവർക്ക്‌ രണ്ടും മൂന്നും ദിവസവും താമസിക്കാം. 25 വർഷത്തിനിടയിൽ ആയിരക്കണക്കിന്‌ വനിതകൾ ഹോസ്‌റ്റൽ സൗകര്യം പ്രയോജനപ്പെടുത്തിയിട്ടുണ്ട്‌. പരാതികളില്ലാതെ സേവനത്തിന്റെ കാൽനൂറ്റാണ്ട്‌ പൂർത്തിയാക്കാനായെന്നത്‌ സഹകരണ മേഖലക്കാകെ അഭിമാനകരമാണ്‌. രജതജൂബിലിയോടനുബന്ധിച്ച്‌ എയർകണ്ടീഷൻ സൗകര്യമുള്ള മുറികൾകൂടി ഹോസ്‌റ്റലിൽ ആരംഭിക്കാൻ ഉദ്ദേശിക്കുന്നതായി ബാങ്ക്‌ പ്രസിഡന്റ്‌ പി ഹരീന്ദ്രൻ വാർത്താസമ്മേളനത്തിൽ പറഞ്ഞു. കാൽനൂറ്റാണ്ടിനിടെ ഇവിടെ താമസിച്ച അന്തേവാസികളുടെ ഒത്തുചേരൽകൂടിയായി രജതജൂബിലി ആഘോഷം മാറും. ഹോസ്‌റ്റൽ ഇൻമേറ്റ്‌സും ബാങ്ക്‌ വനിതാ ജീവനക്കാരും അവതരിപ്പിക്കുന്ന കലാപരിപാടികളുമുണ്ടാവും. ബാങ്ക്‌ ഡയറക്ടർ ആമിന മാളിയേക്കൽ, ജനറൽ മാനേജർ സി.എം സന്തോഷ്‌കുമാർ എന്നിവരും പങ്കെടുത്തു.

തലശേരി: കളിക്കുന്നതിനിടെ തലയിൽ അലൂമിനിയം പാത്രം കുടുങ്ങിയ രണ്ടു വയസ്സുകാരിയെ രക്ഷപ്പെടുത്തി തലശേരി അഗ്നിരക്ഷാസേന. അണ്ടലൂർ ബാലവാടിക്കടുത്ത മുണ്ടുപറമ്പിൽ അഷിമയുടെ തലയിലാണ് പാത്രം കുടുങ്ങിയത്. അടുക്കളയിൽ അലൂമിനിയം പാത്രംകൊണ്ട് കളിക്കുമ്പോഴാണ് അബദ്ധംപറ്റിയത്‌. ഊരിമാറ്റാൻ കഴിയാതെ വന്നപ്പോഴാണ്‌ കരയുന്ന കുട്ടിയേയുംകൊണ്ട് വീട്ടുകാർ ഫയർ സ്റ്റേഷനിൽ എത്തിയത്. കുടുങ്ങിയ പാത്രം അഗ്നിരക്ഷാസേന ഉദ്യോഗസ്ഥർ മുറിച്ചു നീക്കി. അസി. സ്റ്റേഷൻ ഓഫീസർ ഒ.കെ.രജീഷ്, സീനിയർ ഫയർ ആൻഡ്‌ റസ്ക്യു ഓഫീസർമാരായ ബി ജോയ്, ബിനീഷ് നെയ്യോത്ത് എന്നിവർ ചേർന്നാണ്‌ പാത്രം മുറിച്ചുമാറ്റിയത്‌.

തലശ്ശേരി: പുതുച്ചേരിയില്‍ മദ്യവിലയില്‍ വന്‍ വര്‍ധനയ്‌ക്കു വഴിതുറന്നു മന്ത്രിസഭ തീരുമാനം. എക്‌സൈസ്‌ ഡ്യൂട്ടി, സ്‌പെഷല്‍ എക്‌സൈസ്‌ ഡ്യൂട്ടി, അഡീഷണല്‍ എക്‌സൈസ്‌ ഡ്യൂട്ടി എന്നിവ കുത്തനെ കൂട്ടി ഉത്തരവിറക്കി. ഔട്ട്‌ലെറ്റുകളുടെ ലൈസന്‍സ്‌ ഫീസ്‌ 100 ശതമാനം കൂട്ടി.വിവിധ വിഭാഗങ്ങളില്‍പ്പെട്ട മദ്യങ്ങള്‍ക്ക്‌ 10 മുതല്‍ 50 ശതമാനം വരെ വില കൂടാന്‍ സാധ്യത. പുതുച്ചേരിയുടെ ഭാഗമായ മാഹിയിലും മദ്യവില ഉയരും. പുതുച്ചേരിയിലെ നാലു മേഖലകളില്‍ മദ്യവില കൂടിയാലും സമീപ സംസ്‌ഥാനങ്ങളെ അപേക്ഷിച്ചു കുറവായിരിക്കുമെന്ന്‌ സര്‍ക്കാര്‍ ചൂണ്ടിക്കാട്ടി. മദ്യവില വര്‍ധനയോടെ 350 കോടി രൂപയുടെ അധിക വരുമാനം ലഭിക്കുമെന്നാണ്‌ സര്‍ക്കാരിന്റെ കണക്കുകൂട്ടല്‍.