തലശേരി: പൂച്ചെടികളും ഇരിപ്പിടങ്ങളും ചുവർചിത്രങ്ങളുമായി എം ജി റോഡ്‌ ഇനി വേറെ ലെവലാവും. നടപ്പാതകൾ ടൈൽസ്‌ പാകുകയും അലങ്കാരവിളക്കുകൾ് സ്ഥാപിക്കുകയുംചെയ്യും. നഗരസഭാ ഓഫീസ്‌ മുതൽ പുഷ്‌പ സാരീസ്‌ കവലവരെയാണ്‌ ആദ്യഘട്ട സൗന്ദര്യവൽക്കരണം. ഒരു കോടി രൂപ ചെലവിൽ ഊരാളുങ്കൽ സൊസൈറ്റിയാണ്‌ പ്രവൃത്തി ഏറ്റെടുത്തത്‌. മൂന്നാഴ്‌ചകൊണ്ട്‌ പ്രവൃത്തി പൂർത്തിയാക്കാനാണ്‌ നിർദേശിച്ചത്‌. റോഡ്‌ സൗന്ദര്യവൽക്കരണം കഴിഞ്ഞ ദിവസമാണ്‌ പുനരാരംഭിച്ചത്‌. പൈതൃകനഗരിയിലേക്ക്‌ സഞ്ചാരികളെ ആകർഷിക്കുംവിധം ശുചിത്വപൂർണമായ പാതയാണ്‌ ഇതിലൂടെ നഗരസഭ ലക്ഷ്യമിടുന്നത്‌. വഴിയോരചിത്രങ്ങളും പൂച്ചെടികളും ഇരിപ്പിടങ്ങളുമാവും പാതയുടെ ഹൈലൈറ്റ്‌. ബിഇഎംപി സ്‌കൂളിന്‌ മുന്നിലെ തണൽ മരങ്ങൾ സംരക്ഷിക്കും. ആശുപത്രിക്കവല മുതൽ നഗരസഭ ഓഫീസ്‌ വരെ റോഡ്‌ കോൺക്രീറ്റിങ്ങും ഓവുചാൽ നിർമാണവും നാലേകാൽ കോടി രൂപ വിനിയോഗിച്ചാണ്‌ നേരത്തെ പൂർത്തിയാക്കിയത്‌. ഇതിന്റെ തുടർച്ചയായാണ്‌ റോഡ്‌ സൗന്ദര്യവൽക്കരണമെന്ന്‌ നഗരസഭാ ചെയർമാൻ കെ എം ജമുനാറാണി പറഞ്ഞു.

തലശ്ശേരി:കേന്ദ്ര ടൂറിസം മന്ത്രാലയത്തിന്റെ സ്വദേശി ദർശൻ 2.0 പദ്ധതി വഴി പൈതൃക നഗരിയായ തലശ്ശേരിയുടെ വികസനത്തിന് 25 കോടി രൂപയുടെ ഭരണാനുമതി ലഭിച്ചതായി നിയമസഭാ സ്പീക്കർ എ.എൻ ഷംസീർ അറിയിച്ചു. ആറ് ഘടക പദ്ധതികളായി തിരിച്ചാണ് അനുമതി. സുസ്ഥിര വികസനം ലക്ഷ്യമിട്ടുകൊണ്ട് ടൂറിസം കേന്ദ്രങ്ങൾ ആകർഷകമാക്കാനും തീർഥാടന ടൂറിസം കേന്ദ്രമാക്കി തലശ്ശേരിയേയും പരിസര പ്രദേശങ്ങളെയും ഉയർത്തിക്കൊണ്ടുവരാനും പദ്ധതി ലക്ഷ്യമിടുന്നു. താഴെ അങ്ങാടി പൈതൃക തെരുവ് നവീകരണത്തിന് 400 ലക്ഷം, ചിറക്കക്കാവിന് 151 ലക്ഷം, തലശ്ശേരി ജഗന്നാഥ ക്ഷേത്രത്തിന് 498 ലക്ഷം, പൊന്ന്യം ഏഴരക്കണ്ടം കളരി അക്കാദമിക്ക് 193 ലക്ഷം, ചൊക്ലി നിടുമ്പ്രം തെയ്യംകലാ അക്കാദമിക്ക് 123 ലക്ഷം, ഹരിത ടൂറിസത്തിന് 325 ലക്ഷം, സാങ്കേതിക സംവിധാനങ്ങൾ ഒരുക്കാൻ 266 ലക്ഷം, മാർക്കറ്റിംഗ് പ്രൊമോഷന് 25 ലക്ഷം, പരിശീലനം, ശിൽപശാലകൾ എന്നിവയ്ക്ക് 52 ലക്ഷം എന്നിങ്ങനെ ആറ് ഘടക പദ്ധതികളിലായി 25 കോടി രൂപയുടെ പ്രവർത്തനാനുമതിയാണ് ലഭ്യമായത്. പദ്ധതി പ്രവർത്തനങ്ങൾക്കുള്ള സ്ഥലം, പിന്തുണാ സംവിധാനങ്ങൾ എന്നിവ സംസ്ഥാന സർക്കാർ ഒരുക്കും. നിയമസഭാ സ്പീക്കർ എ എൻ ഷംസീറിന്റെ നേതൃത്വത്തിൽ തിരുവനന്തപുരത്തും തലശ്ശേരിയിലും വിവിധ ഘട്ടങ്ങളിലായി നടന്ന ഉന്നത ഉദ്യോഗസ്ഥരുമായുള്ള നിരന്തര ചർച്ചയുടെ ഭാഗമായാണ് തലശ്ശേരിക്ക് ഇത്രയും വലിയൊരു പദ്ധതി അംഗീകാരം ലഭിച്ചത്.

മാഹി: പന്തക്കലിലെ മാക്കുനി പാണ്ടിവയലിൽ കടയിൽ വിൽപ്പനയ്ക്കായി സൂക്ഷിച്ച നിരോധിത പുകയില ഉത്പന്നങ്ങൾ ഡി.വൈ.എഫ്.ഐ സ്ക്വാഡ് പിടികൂടി. പിടികൂടിയ ഉത്പന്നങ്ങളും വ്യാപാരിയേയും പള്ളൂർ പോലീസിൽ ഏൽപ്പിച്ചു. പ്രദേശത്തെ നിരവധി കടകളിൽ ലഹരി ഉത്പന്നങ്ങൾ വിറ്റഴിക്കുന്നത് നാട്ടുകാരുടെ ശ്രദ്ധയിൽപ്പെട്ടിരുന്നു. തുടർന്ന് ഡി.വൈ.എഫ്.ഐയുടെ നേതൃത്വത്തിൽ മൂലക്കടവ് ഭാഗത്ത് പ്രതിഷേധ മാർച്ചും പ്രതിഷേധ സദസും സംഘടിപ്പിച്ചിരുന്നു. ലഹരി വിൽപന ഉപേക്ഷിക്കാതെ വിൽപ്പന തുടരുന്നുവെന്ന വിവരം ലഭിച്ചതിനെ തുടർന്ന് ഡി.വൈ.എഫ്.ഐ പള്ളൂർ, പൊന്ന്യം മേഖലാ കമ്മിറ്റി പ്രവർത്തകർ ഇടപെടുകയായിരുന്നു. ഡി.വൈ.എഫ്.ഐ പള്ളൂർ മേഖലാ സെക്രട്ടറി ടി.കെ.രാഗേഷ്, പൊന്ന്യം മേഖലാ സെക്രട്ടറി കെ. റിനീഷ്  എന്നിവർ നേതൃത്വം നൽകി. ഇനിയും ലഹരി വിൽപ്പന തുടർന്നാൽ കടകൾ തുറന്ന് പ്രവർത്തിക്കാൻ അനുവദിക്കില്ലെന്ന് വ്യാപാരികൾക്ക് ഡിവൈഎഫ്ഐ മുന്നറിയിപ്പ് നൽകി.