പേരാവൂർ: സംസ്ഥാന സർക്കാരിന്റെ മാലിന്യമുക്തം നവകേരളം പദ്ധതിയുടെ ചുവടുപറ്റി മാലിന്യ സംസ്‌കരണത്തിനും ശുചിത്വത്തിനും പ്രാമുഖ്യം നല്കി പേരാവൂർ ബ്ലോക്ക് പഞ്ചായത്ത് ബജറ്റ്. 74 കോടി എഴുപത് ലക്ഷം രൂപ വരവും 74 കോടി 64 ലക്ഷം രൂപ ചിലവും ആറു ലക്ഷം രൂപ മിച്ചവും പ്രതീക്ഷിക്കുന്ന ബജറ്റ് ബ്ലോക്ക് വൈസ്.പ്രസിഡന്റ് പ്രീത ദിനേശൻ അവതരിപ്പിച്ചു. ബ്ലോക്ക് പരിധിയിലെ 76-ഓളം സ്‌കൂളുകളിലെ എൽ.പി , യു.പി , എച്ച്എസ് , എച്ച്എസ്എസ് വിദ്യാർഥികളിൽ വായനാശീലം വർദ്ധിപ്പിക്കാനും കുട്ടികൾക്കിടയിലെ ലഹരി ഉപയോഗവും അക്രമവാസനയും ഇല്ലാതാക്കാനും ‘അക്ഷര കൈരളി’ എന്ന നൂതന പദ്ധതിക്ക് 15 ലക്ഷം രൂപ വകയിരുത്തിയിട്ടുണ്ട്. ആരോഗ്യം, കൃഷി, സേവന മേഖലകൾക്ക് ബജറ്റ് പ്രാധാന്യം നൽകുന്നുണ്ട്. മലയോര മേഖലയിലെ പ്രധാന ആസ്പത്രിയായ പേരാവൂർ താലൂക്കാസ്പത്രിയുടെ വികസനത്തിനും മെച്ചപ്പെട്ട ചികിത്സാ സംവിധാനത്തിനും കൊട്ടിയൂർ എഫ്എച്ച്‌സിയുടെ വികസനത്തിനുമായിഒരു കോടി 86 ലക്ഷം നീക്കിവെച്ചിട്ടുണ്ട്.

മറ്റു പ്രധാന പ്രഖ്യാപനങ്ങൾ

കാർഷിക മേഖലയിൽ വിഷരഹിത ഉത്പന്നങ്ങൾ ലഭ്യമാക്കാനും നെൽകൃഷി , കരനെൽകൃഷി , പയർകൃഷി എന്നിവക്ക് ധനസഹായം നല്കാനും 31,17,000

പട്ടികവർഗ വിഭാഗത്തിലെ ഭവനരഹിതർക്കും നിർധനർക്കുംഭവനനിർമാണത്തിന് 6,48,00,000

പട്ടികവർഗ വിദ്യാർഥികൾക്ക് പഠനമുറികൾ , സങ്കേതങ്ങളിൽ റോഡുകൾ, നടപ്പാതകൾ എന്നിവക്ക് 33,20,000

ഭിന്നശേഷിക്കാർക്ക് സൈഡ് ചക്രങ്ങൾ ഘടിപ്പിച്ച വാഹനം , ഭിന്നശേഷി വിദ്യാർഥികൾക്ക് സ്‌കോളർഷിപ്പ് , ഭിന്നശേഷി സൗഹൃദ ശൗചാലയം എന്നിവക്ക് 28 ലക്ഷം

വനിതകളുടെ ക്ഷേമത്തിനും സ്വയം തൊഴിൽ സംരംഭങ്ങൾക്കും ബാൻഡ് സെറ്റിനും 48,79,000

ശുചിത്വ മേഖലയിൽ തുമ്പൂർമൊഴി നവീകരണം , കുനിത്തല സ്‌കൂൾ ശൗചാലയ നിർമാണം , കണിച്ചാറിൽ ശുചിത്വ പാർക്കിങ്ങ് എന്നിവക്ക് 37,37,000

പത്താമുദയം , ഡിജി കണ്ണൂർ , സ്‌മൈൽ പ്ലസ് സമഗ്ര പദ്ധതി എന്നിവക്ക്മൂന്ന് ലക്ഷം

ക്ഷീരമേഖലയിൽ പാലിന് സബ്‌സിഡിക്ക് 40 ലക്ഷം

റോഡുകൾ , നടപ്പാതകൾ എന്നിവക്ക് ഒരു കോടി 26 ലക്ഷം

പട്ടികജാതി ഉന്നതികളിൽ കുടിവെള്ളം , വാദ്യോപകരണങ്ങൾ നല്കൽ എന്നിവക്ക് 13.5 ലക്ഷം

വിവിധ കുടിവെള്ള പദ്ധതികൾക്ക് 45,58,500

വയോജനക്ഷേമത്തിന് 18,55,000

ബ്ലോക്ക് പഞ്ചായത്ത് പ്രസിഡന്റ് കെ.സുധാകരൻ, ബ്ലോക്കംഗങ്ങളായ മൈഥിലി രമണൻ , പ്രേമി പ്രേമൻ , ജില്ലാ പഞ്ചായത്തംഗം ജൂബിലി ചാക്കോ , പഞ്ചായത്ത് പ്രസിഡന്റുമാരായ പി.പി.വേണുഗോപാലൻ (പേരാവൂർ), എം.റിജി (കോളയാട്), സി.ടി.അനീഷ് (കേളകം), ഹൈമാവതി (മാലൂർ),ബ്ലോക്ക് സെക്രട്ടറിആർ.സജീവൻ എന്നിവർ സംസാരിച്ചു.

പേരാവൂർ : കഞ്ചാവ് കൈവശം വച്ച നിടുംപുറംചാൽ തുടിയാട് സ്വദേശി വട്ടോത്ത് വീട്ടിൽ ജിബിൻ ജോസഫിനെ (32) എക്സൈസ് പിടികൂടി. അസി.എക്സെെസ് ഇൻസ്പെക്ടർ എം.ബി സുരേഷ് ബാബുവിൻ്റെ നേതൃത്വത്തിൽ എൻ.പദ്മരാജൻ, സന്തോഷ് കൊമ്പ്രാങ്കണ്ടി, സുനീഷ് കിള്ളിയോട്ട്, പി.എസ്. ശിവദാസൻ, വി.സിനോജ്, പി. എസ്.ശ്യാം , ഷീജ കാവളാൻ എന്നിവർ പങ്കെടുത്തു.

പേരാവൂർ : മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി പേരാവൂർ പഞ്ചായത്തിനെ ഹരിത-ശുചിത്വ പഞ്ചായത്തായി പ്രഖ്യാപിച്ചു. ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ പ്രഖ്യാപനം നിർവഹിച്ചു. പഞ്ചായത്ത് പ്രസിഡന്റ് പി.പി. വേണുഗോപാലൻ അധ്യക്ഷനായി. ഹെൽത്ത് ഇൻസ്‌പെക്ടർ ദിവ്യ രാഘവൻ റിപ്പോർട്ട് അവതരിപ്പിച്ചു. പഞ്ചായത്ത് വൈസ് പ്രസിഡന്റ് നിഷ ബാലകൃഷ്ണൻ, ബ്ലോക്ക്‌ വൈസ് പ്രസിഡന്റ് പ്രീത ദിനേശൻ, റീന മനോഹരൻ, എം. ഷൈലജ, പ്രീതി ലത, റജീന സിറാജ്, ബേബി സോജ, വി.എം. രഞ്ജുഷ, കെ. എ. രജീഷ് എന്നിവർ സംസാരിച്ചു. ശുചിത്വമാക്കുന്നതിൽ പഞ്ചായത്തിനെ സഹായിച്ച വ്യക്തികൾക്കും സ്ഥാപനങ്ങൾക്കുമുള്ള ആദരവും പഞ്ചായത്തിന്റെ പ്രവർത്തനങ്ങൾക്ക് ഹരിതകർമസേനയുടെ ആദരവും നല്കി. കുനിത്തല ഭാഗം സൗന്ദര്യവത്കരണം നടത്തിയ നന്മ റസിഡൻസ് അസോസിയേഷന് വാർഡ് മെമ്പർ എം.ഷൈലജ തന്റെ ഒരു മാസത്തെ ഹോണറേറിയം പാരിതോഷികമായി ചടങ്ങിൽ നൽകി.