പേരാവൂർ : മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി പേരാവൂർ പഞ്ചായത്തിനെ ഹരിത-ശുചിത്വ പഞ്ചായത്തായി പ്രഖ്യാപിച്ചു. ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ പ്രഖ്യാപനം നിർവഹിച്ചു. പഞ്ചായത്ത് പ്രസിഡന്റ് പി.പി. വേണുഗോപാലൻ അധ്യക്ഷനായി. ഹെൽത്ത് ഇൻസ്‌പെക്ടർ ദിവ്യ രാഘവൻ റിപ്പോർട്ട് അവതരിപ്പിച്ചു. പഞ്ചായത്ത് വൈസ് പ്രസിഡന്റ് നിഷ ബാലകൃഷ്ണൻ, ബ്ലോക്ക്‌ വൈസ് പ്രസിഡന്റ് പ്രീത ദിനേശൻ, റീന മനോഹരൻ, എം. ഷൈലജ, പ്രീതി ലത, റജീന സിറാജ്, ബേബി സോജ, വി.എം. രഞ്ജുഷ, കെ. എ. രജീഷ് എന്നിവർ സംസാരിച്ചു. ശുചിത്വമാക്കുന്നതിൽ പഞ്ചായത്തിനെ സഹായിച്ച വ്യക്തികൾക്കും സ്ഥാപനങ്ങൾക്കുമുള്ള ആദരവും പഞ്ചായത്തിന്റെ പ്രവർത്തനങ്ങൾക്ക് ഹരിതകർമസേനയുടെ ആദരവും നല്കി. കുനിത്തല ഭാഗം സൗന്ദര്യവത്കരണം നടത്തിയ നന്മ റസിഡൻസ് അസോസിയേഷന് വാർഡ് മെമ്പർ എം.ഷൈലജ തന്റെ ഒരു മാസത്തെ ഹോണറേറിയം പാരിതോഷികമായി ചടങ്ങിൽ നൽകി.

പേരാവൂര്‍ :പോലീസ് സബ് ഡിവിഷന്റെ ആഭിമുഖ്യത്തില്‍ കേളകം, കോളയാട്, കൊട്ടിയൂര്‍, പേരാവൂര്‍, കണിച്ചാര്‍ ഗ്രാമപഞ്ചായത്തുകളിലെ ഉന്നതി നിവാസികള്‍ക്കായി പരാതി പരിഹാര അദാലത്ത് നടത്തി. കേളകം സെന്റ് ജോര്‍ജ്ജ് കണ്‍വെന്‍ഷന്‍ സെന്ററില്‍ ജില്ലാ കലക്ടര്‍ അരുണ്‍ കെ വിജയന്‍ അദാലത്ത് ഉദ്ഘാടനം ചെയ്തു. ജില്ലാ പോലീസ് മേധാവി (റൂറല്‍) അനുജ് പലിവാല്‍ മുഖ്യാതിഥിയായി. പേരാവൂര്‍ ഡിവൈഎസ്പി കെ.വി പ്രമോദന്‍ അധ്യക്ഷനായിരുന്നു. പേരാവൂര്‍ ബ്ലോക്ക് പഞ്ചായത്ത് പ്രസിഡന്റ് കെ. സുധാകരന്‍ ആദ്യ പരാതി സ്വീകരിച്ചു. വിവിധ സര്‍ക്കാര്‍ വകുപ്പുകളെ ഉള്‍പ്പെടുത്തി സംഘടിപ്പിച്ച അദാലത്തില്‍ മുന്നൂറോളം ഉന്നതി നിവാസികള്‍ പങ്കെടുത്തു. നാനൂറോളം പരാതികള്‍ ലഭിച്ചു. കണിച്ചാര്‍ പഞ്ചായത്ത് പ്രസിഡന്റ് ആന്റണി സെബാസ്റ്റ്യന്‍, കൊട്ടിയൂര്‍ പഞ്ചായത്ത് പ്രസിഡന്റ് റോയി നമ്പുടാകം, കേളകം പഞ്ചായത്ത് പ്രസിഡന്റ് സി.ടി.അനീഷ്, കോളയാട് പഞ്ചായത്ത് പ്രസിഡന്റ് എം.റിജി, കേളകം പഞ്ചായത്തംഗം സുനിത വാത്യാട്ട്, ട്രൈബല്‍ എക്സ്റ്റെന്‍ഷന്‍ ഓഫീസര്‍ ടി.എം.കുഞ്ഞിരാമന്‍, പേരാവൂര്‍ എസ്.എച്ച്.ഒ.പി.ബി.സജീവ്, കേളകം പോലീസ് എസ്എച്ച്ഒ ഇതിഹാസ് താഹ, കേളകം സബ് ഇന്‍സ്പെക്ടര്‍ എം.രമേശന്‍, ഉദ്യോഗസ്ഥര്‍ എന്നിവര്‍ സംസാരിച്ചു.

പേരാവൂര്‍: 2017 മാര്‍ച്ച് 31 വരെ രജിസ്ട്രര്‍ ചെയ്ത ആധാരങ്ങളില്‍ വില കുറച്ച് കാണിച്ചത് കാരണം അണ്ടര്‍ വാലുവേഷന്‍ നടപടികളില്‍പ്പെട്ടവര്‍ക്ക് സെറ്റില്‍മെന്റ് പദ്ധതിയിൽ ആനുകൂല്യം ലഭ്യമാക്കുന്നതിന് പേരാവൂര്‍ സബ് രജിസ്ട്രാര്‍ ഓഫീസില്‍ വ്യാഴാഴ്ച രാവിലെ 10 മുതല്‍ 4.30 വരെ അദാലത്ത് സംഘടിപ്പിക്കുന്നു. ഇളവുകളോടെ അണ്ടര്‍ വാല്വേഷന്‍ കേസുകള്‍ അവസാനിപ്പിച്ച് തുടര്‍ നടപടികള്‍ ഒഴിവാക്കാനുള്ള പദ്ധതി മാര്‍ച്ച് 31ന് അവസാനിക്കുന്നതിനാല്‍ ബന്ധപ്പെട്ടവര്‍ ഈ അവസരം ഉപയോഗപ്പെടുത്തണമെന്ന് സബ് രജിസ്ട്രാര്‍ അറിയിച്ചു. 2017 ഏപ്രില്‍ 1മുതല്‍ 2023 മാര്‍ച്ച് 31 വരെയുള്ള അണ്ടര്‍ വാല്വേഷന്‍ കേസുകള്‍ക്ക് കോംപൌണ്ടിംഗ് പദ്ധതി പ്രകാരം ആധാരത്തിന്റെ കുറവു ഫീസ് പൂര്‍ണ്ണമായും ഒഴിവാക്കുകയും അടക്കേണ്ടുന്ന മുദ്രവില 50% കുറവ് വരുത്തുകയും ചെയ്തിട്ടുണ്ട്. മുദ്രവിലയുടെ 50% മാത്രം അടച്ച് അത്തരം കേസുകള്‍ അവസാനിപ്പിക്കാവുന്നതാണ്. വിശദ വിവരങ്ങള്‍ക്ക്: 0490-2447800.