പേരാവൂര്‍: 2017 മാര്‍ച്ച് 31 വരെ രജിസ്ട്രര്‍ ചെയ്ത ആധാരങ്ങളില്‍ വില കുറച്ച് കാണിച്ചത് കാരണം അണ്ടര്‍ വാലുവേഷന്‍ നടപടികളില്‍പ്പെട്ടവര്‍ക്ക് സെറ്റില്‍മെന്റ് പദ്ധതിയിൽ ആനുകൂല്യം ലഭ്യമാക്കുന്നതിന് പേരാവൂര്‍ സബ് രജിസ്ട്രാര്‍ ഓഫീസില്‍ വ്യാഴാഴ്ച രാവിലെ 10 മുതല്‍ 4.30 വരെ അദാലത്ത് സംഘടിപ്പിക്കുന്നു. ഇളവുകളോടെ അണ്ടര്‍ വാല്വേഷന്‍ കേസുകള്‍ അവസാനിപ്പിച്ച് തുടര്‍ നടപടികള്‍ ഒഴിവാക്കാനുള്ള പദ്ധതി മാര്‍ച്ച് 31ന് അവസാനിക്കുന്നതിനാല്‍ ബന്ധപ്പെട്ടവര്‍ ഈ അവസരം ഉപയോഗപ്പെടുത്തണമെന്ന് സബ് രജിസ്ട്രാര്‍ അറിയിച്ചു. 2017 ഏപ്രില്‍ 1മുതല്‍ 2023 മാര്‍ച്ച് 31 വരെയുള്ള അണ്ടര്‍ വാല്വേഷന്‍ കേസുകള്‍ക്ക് കോംപൌണ്ടിംഗ് പദ്ധതി പ്രകാരം ആധാരത്തിന്റെ കുറവു ഫീസ് പൂര്‍ണ്ണമായും ഒഴിവാക്കുകയും അടക്കേണ്ടുന്ന മുദ്രവില 50% കുറവ് വരുത്തുകയും ചെയ്തിട്ടുണ്ട്. മുദ്രവിലയുടെ 50% മാത്രം അടച്ച് അത്തരം കേസുകള്‍ അവസാനിപ്പിക്കാവുന്നതാണ്. വിശദ വിവരങ്ങള്‍ക്ക്: 0490-2447800.

പേരാവൂർ: മാരക ലഹരി ഉപയോഗത്തിനെതിരെ കുനിത്തല ശ്രീനാരായണ മഠത്തിൻ്റെ നേതൃത്വത്തിൽ ബോധവത്കരണം നടത്തുന്നു. വ്യാഴാഴ്ച 3മണിക്ക് പേരാവൂർ ടൗണിൽ നിന്നും കുനിത്തലയിലേക്ക് മുഴുവനാളുകളെയും അണിനിരത്തി ലഹരി വിരുദ്ധ റാലി നടത്തും. 5 മണിക്ക് ശ്രീനാരായണ ഗുരുമഠം ഓഡിറ്റോറിയത്തിൽ പോലീസ്, എക്സൈസ് തുടങ്ങിയവരുടെ ബോധവത്കരണവും ഉണ്ടാവും.

പേരാവൂർ : മാലിന്യമുക്തം നവകേരളം ജനകീയ ക്യാമ്പയിന്റെയും ശുചിത്വ പഞ്ചായത്ത് പ്രഖ്യാപനത്തിന്റെയും ഭാഗമായി പാതയോരം ശുചീകരിച്ചു. പഞ്ചായത്ത് തല ഉദ്ഘാടനം കൊട്ടം ചുരത്ത് പേരാവൂർ ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ നിർവഹിച്ചു. പഞ്ചായത്ത്‌ പ്രസിഡന്റ് പി. പി. വേ‌ണുഗോപാലൻ അധ്യക്ഷനായി. പഞ്ചായത്ത് ജനപ്രതിനിധികളും പുരുഷ അയൽക്കൂട്ടങ്ങളും റെlസിഡൻസ് അസോസിയേഷൻ ഭാരവാഹികളും ഹരിതകർമ സേനയും ചേർന്ന് സംയുക്തമായാണ് പാതയോരം ശുചീകരിച്ചത്.