പയ്യന്നൂർ:തെക്കെ ബസാറിലെ ഇഷാന്റെ ഇഷ്ട വിനോദമാണ് തന്റെ മനസിൽ പതിയുന്നവയെ ഉള്ളം കൈയിൽ ഒതുങ്ങുന്ന സൃഷ്‌ടികളാക്കി മാറ്റുക എന്നത്. പഴയ ഗ്രാമഫോൺ, റേഡിയോ, കാമറ, ഘടികാരം, കുട, ക്രിക്കറ്റ് ബാറ്റ് തുടങ്ങി ഇഷ്ട എഴുത്തുകാരൻ വൈക്കം മുഹമ്മദ് ബഷീറിന്റെ കൃതികളടക്കം ചെറുപതിപ്പുകളാക്കുകയാണ് ഇഷാൻ. കണ്ടങ്കാളി ഷേണായി സ്‌മാരക ഗവ. ഹയർസെക്കൻഡറി സ്‌കൂൾ ഒമ്പതാംതരം വിദ്യാർഥിയാണ്. അഞ്ചാം ക്ലാസിൽ പഠിക്കുമ്പോഴാണ്‌ ഈ ആശയം മനസിൽ ഉയർന്നത്. സ്വയം സ്വായത്തമാക്കിയ അറിവുകൊണ്ടാണ് നിർമാണം. പേപ്പറുകൾ, ഫോംബോർഡ്, കമ്പികൾ തുടങ്ങി ഉപയോഗ ശൂന്യമായ വസ്‌തുക്കളാണ് ഉപയോഗിക്കുന്നത്. മെറ്റൽ എൻക്രൈവിങിൽ കഴിഞ്ഞ വർഷം ഉപജില്ലാ മത്സരത്തിൽ ഒന്നാം സ്ഥാനവും ഇത്തവണ രണ്ടാം സ്ഥാനവും നേടിയിട്ടുണ്ട്. അമ്മ അമൃത ചിത്രം വരയ്‌ക്കുന്നത് കണ്ട് ഇപ്പോൾ ചിത്രരചനയും പരിശീലിക്കുന്നു. സെന്റ് മേരീസ് ഹൈസ്‌കൂളിൽ അഞ്ചാം തരത്തിൽ പഠിക്കുന്ന സഹോദരി ചിത്രകാരിയും ഡാൻസറുമാണ്. ഉപജില്ലയിൽ മെറ്റൽ എൻക്രൈവിങിൽ ഈ വർഷം ഒന്നാം സ്ഥാനം നേടിയിട്ടുണ്ട്.

കണ്ണൂർ: സംസ്ഥാനത്ത് ഇന്ന് ഉയര്‍ന്ന താപനില മുന്നറിയിപ്പ്. ഒറ്റപ്പെട്ടയിടങ്ങളില്‍ സാധാരണ താപനിലയേക്കാൾ രണ്ട് മുതല്‍ മൂന്ന് സെല്‍ഷ്യസ് വരെ താപനില ഉയരാന്‍ സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു.ഉയര്‍ന്ന താപനിലയും ഈര്‍പ്പമുള്ള വായുവും കാരണം ചൂടും അസ്വസ്ഥതയുമുള്ള കാലാവസ്ഥക്ക് സാധ്യതയുണ്ട്.ഉയര്‍ന്ന ചൂട് റിപ്പോര്‍ട്ട് ചെയ്യപ്പെടുന്ന സാഹചര്യത്തില്‍ പൊതുജനങ്ങള്‍ക്കായി സംസ്ഥാന ദുരന്ത നിവാരണ അതോറിറ്റി പുറപ്പെടുവിക്കുന്നജാഗ്രതാ നിര്‍ദേശങ്ങള്‍ പുറപ്പെടുവിച്ചു. ഉയര്‍ന്ന ചൂട് സൂര്യാഘാതം, സൂര്യാതപം, നിര്‍ജലീകരണം തുടങ്ങി നിരവധി ഗുരുതരമായ ആരോഗ്യ പ്രശ്‌നങ്ങള്‍ക്ക് കാരണമാകും.

ഇരിക്കൂർ: കനറാ ബാങ്ക് ഇരിക്കൂർ ശാഖയോട് ചേർന്നുള്ള എ ടി എം കുത്തി പൊളിക്കാൻ ശ്രമിച്ച കേസിൽ അസം സ്വദേശി അറസ്റ്റിൽ.കല്യാട് ചെങ്കൽപ്പണയിൽതൊഴിലാളിയായ സൈദുൽ ഇസ്‌ലാം (22) ആണ് പിടിയിലായത്. കഴിഞ്ഞ ചൊവ്വാഴ്ച രാത്രി 12.30നായിരുന്നു സംഭവം.മുഖം മറച്ചെത്തിയ സൈദുൽ ഇസ്‌ലാം എ ടി എമ്മിൽ പണം നിക്ഷേപിക്കുന്ന വാതിൽ കൈ കൊണ്ട് പൊളിക്കാൻ ശ്രമിക്കുകയായിരുന്നു. തത്സമയം തന്നെ ബാങ്കിന്റെ ഡൽഹി ഓഫീസിലെ സെർവറിൽ അപായ സൂചന ലഭിച്ചതോടെ അധികൃതർ ഇരിക്കൂർ പോലീസ് സ്റ്റേഷനിൽ വിവരമറിയിച്ചു.

പോലീസ് അതിവേഗം എ ടി എമ്മിന് സമീപത്ത് എത്തിയെങ്കിലും വാഹനം കണ്ട പ്രതി ഓടി രക്ഷപ്പെട്ടു. നൂറോളം സി.സി.ടി.വി. ദൃശ്യങ്ങൾ കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് സൈദുൽ പിടിയിലായത്.മോഷണശ്രമം നടത്തിയതിന് ഒരുദിവസം മുൻപ് ഇയാൾ അതേ നിറത്തുള്ള പാൻറും ഷർട്ടും ധരിച്ച് എ ടി എമ്മിന് സമീപത്ത് നിൽക്കുന്ന ദൃശ്യം പോലീസിന് ലഭിച്ചിരുന്നു. അന്നേ ദിവസത്തെ ടൗണിലെ മറ്റ് സി സി ടി വി ദൃശ്യങ്ങൾ പരിശോധിച്ചപ്പോൾ പ്രതിയുടെ മുഖവും വ്യക്തമായി.തുടർന്ന് നടത്തിയ അന്വേഷണത്തിൽ ചെങ്കൽ പണയിലെ തൊഴിലാളി ആണെന്ന് വിവരം ലഭിച്ചു. എസ് എച്ച് ഒ രാജേഷ് അയോടൻ, എസ് ഐ ഷിബു എഫ് പോൾ, എ എസ് ഐ കെ വി പ്രഭാകരൻ, സി പി ഒമാരായ ടി വി രഞ്ജിത്ത് കുമാർ, കെ ജെ ജയദേവൻ, ഷിജോയ് എന്നിവരുടെ നേതൃത്വത്തിൽ ആണ് അന്വേഷണം നടത്തിയത്.