ധർമശാല:കണ്ണൂർ ഗവ. എൻജിനിയറിങ്‌ കോളേജിൽ ‘എക്‌സ്‌പ്ലോർ–- 24’ തുടങ്ങി. കലാ-സാങ്കേതികവിദ്യയുടെ സംഗമവേദിയായ എക്‌സ്‌പ്ലോർ ഐഎസ്ആർഒ മുൻ ഡയറക്ടർ ഡോ. കൃഷ്ണകുമാർ ഉദ്‌ഘാടനം ചെയ്‌തു. കണ്ണൂർ സിറ്റി പൊലീസ് കമീഷണർ നിധിൻ രാജ്, ടെക്നിക്കൽ എഡ്യൂക്കേഷൻ സീനിയർ ജോ. ഡയറക്ടർ ജയപ്രകാശ്‌, അന്തൂർ നഗരസഭാ ചെയർമാൻ പി മുകുന്ദൻ, കൗൺസിലർ പി പ്രകാശൻ, പിജി ഡീൻ ഡോ. പി മഹേഷ് കുമാർ, യുജി ഡീൻ ഡോ. എം ഷാഹിൻ, റിസർച്ച് ഡീൻ ഡോ. വി വിനോദ് കുമാർ, എം ടി മധുസൂദനൻ, പി ജിതിൻ, കെ സന്തോഷ്, ടി പി അഖില എന്നിവർ സംസാരിച്ചു. അഹമ്മദാബാദിൽ നടന്ന ഇന്ത്യാ പ്രീമിയർ റോബോട്ടിക്സ് കോമ്പറ്റീഷനിൽ വിജയംനേടിയ വിദ്യാർഥികളെ അനുമോദിച്ചു. ശാസ്ത്ര പ്രദർശനങ്ങൾ, സെമിനാറുകൾ, വർക്ക്ഷോപ്പുകൾ, റോബോട്ടിക് പ്രോഗ്രാം എന്നിവയും ഫെസ്റ്റിന്റെ ഭാഗമായുണ്ട്‌. എട്ടിന്‌ സമാപിക്കും. ന്യൂജെൻ വാഹനങ്ങളുമായി 
ഓട്ടോ ഷോ കണ്ണൂർ ഗവ. എൻജിനിയറിങ്‌ കോളേജിൽ നടക്കുന്ന ‘എക്‌സ്‌പ്ലോർ –-24 പുതുതലമുറ വാഹനങ്ങളെ പരിചയപ്പെടുത്തി ഒരുക്കിയ ഓട്ടോ ഷോ. ബാബ്സ് ഓട്ടോമൊബൈലും കണ്ണൂർ മോട്ടോർ ക്ലബ്ബും ചേർന്ന് ഒരുക്കിയ എക്‌സലറേറ്റ്‌ ഓട്ടോ ഷോയിൽ പുതുപുത്തൻ വാഹനങ്ങളും വിന്റേജ് കാറുകളും പ്രദർശിപ്പിച്ചു. 50,000 രൂപ സമ്മാനത്തുകയുള്ള ഫാഷൻ ഷോ എക്‌സ്‌പ്ലോറിലെ മറ്റൊരു പ്രധാന ആകർഷണമാണ്‌.

കണ്ണൂർ: പകുതിവിലയ്ക്ക് ഇരുചക്ര വാഹനം വാഗ്ദാനം ചെയ്ത്‌ കോടികൾ തട്ടിയ സംഭവത്തിൽ വ്യാഴാഴ്ചയും നിരവധി പേർ പരാതി നൽകി.കണ്ണൂർ ടൗൺ, വളപട്ടണം, മയ്യിൽ, ചക്കരക്കൽ, ഇരിക്കൂർ എന്നീ പോലീസ് സ്റ്റേഷനുകളിലായി 1,352 പരാതികൾ കൂടി ലഭിച്ചു. നേരത്തേ 700 പരാതി ലഭിച്ചിരുന്നു.ഇതോടെ ജില്ലയിലെ വിവിധ സ്റ്റേഷനുകളിലായി ലഭിച്ച പരാതികളുടെ എണ്ണം 2052 ആയി. മയ്യിൽ 612, ചക്കരക്കൽ 312, വളപട്ടണം 25, കണ്ണൂർ ടൗൺ 400, ഇരിക്കൂർ മൂന്ന് എന്നിങ്ങനെ പരാതികൾ വ്യാഴാഴ്ച ലഭിച്ചു.

15 കേസുകൾ രജിസ്റ്റർ ചെയ്തു. സംഭവവുമായി ബന്ധപ്പെട്ട് വിവിധ പോലീസ് സ്റ്റേഷനുകളിലായി 65 പേരുടെ മൊഴി പോലീസ് രേഖപ്പെടുത്തി.പണം നൽകിയതുമായി ബന്ധപ്പെട്ട് നിരവധി രേഖകളും പേലീസ് കണ്ടെടുത്തിട്ടുണ്ട്.കണ്ണൂർ അസി. പോലീസ് കമ്മിഷണർ ഇൻ ചാർജ് ജയൻ ‍ഡൊമിനിക്കിന്റെ നേതൃത്വത്തിൽ കണ്ണൂർ ടൗൺ, ചക്കരക്കൽ, മയ്യിൽ, വളപട്ടണം പോലീസ് ഇൻസ്പെക്ടർമാരുടെ പ്രത്യേക സംഘമാണ് കേസ്‌ അന്വേഷിക്കുന്നത്.

മയ്യിൽ: പകുതി വിലക്ക് സ്‌കൂട്ടറും ഗൃഹോപകരണങ്ങളും നൽകാമെന്ന് വിശ്വസിപ്പിച്ച് മൂന്ന് സീഡ് സൊസൈറ്റിയിലെ അംഗങ്ങളിൽ നിന്നും കോടികൾ തട്ടിയെടുത്ത ഏഴ് പേർക്കെതിരെ കോ ഓർഡിനേറ്റർമാരുടെ പരാതിയിൽ മയ്യിൽ പോലീസ് കേസെടുത്തു.കുറ്റ്യാട്ടൂർ സീഡ് സൊസൈറ്റി കോഓഡിനേറ്റർ വി. രമയുടെ പരാതിയിൽ 272 അംഗങ്ങളുള്ള സൊസൈറ്റിയിൽ നിന്നും 1,13, 17,040 രൂപയും കൊളച്ചേരി പഞ്ചായത്ത് സീഡ് സൊസൈറ്റി കോഓർഡിനേറ്റർ പി. പ്രീതയുടെ പരാതിയിൽ 150 അംഗങ്ങളുള്ള സൊസൈറ്റിയിൽ നിന്ന് 57,76,975 രൂപയും മയ്യിൽ സീഡ് സൊസൈറ്റി കോഓഡിനേറ്റർ സി. സന്ധ്യയുടെ പരാതിയിൽ 121 അംഗങ്ങളുള്ള സൊസൈറ്റിയിൽ നിന്നും 65,10,400 രൂപയും ബേങ്ക് അക്കൗണ്ട് വഴി വാങ്ങി സ്‌കൂട്ടറോ ഗൃഹോപകരണങ്ങളോ നൽകാതെ കബളിപ്പിച്ചുവെന്ന പരാതിയിൽ ഇടുക്കി തൊടുപുഴയിലെ സ്‌പിയാർഡ്സ് ചീഫ് കോ ഓർഡിനേറ്റർ അനന്തു കൃഷ്ണ‌ൻ, നാഷണൽ എൻ ജി ഒ കോൺഫെഡറേഷൻ സായ് ഗ്രാം ഗ്ലോബൽ ട്രസ്റ്റിൻ്റെ മുൻ ചെയർമാൻ കെ. എൻ. അനന്തകുമാർ, ചെയർപേഴ്സ‌ൺഡോ. ബീന സെബാസ്റ്റ്യൻ, സ്‌പിയാർഡ്‌സ്‌ ചെയർ പേഴ്സൺ ഷീബ സുരേഷ്, സെക്രട്ടറി കെ.പി സുമ, വൈസ് ചെയർപേഴ്സൺ ഇന്ദിര, ലീഗൽ അഡ്വസൈർ ലാലി വിൻസന്റ് എന്നിവർക്കെതിരെയാണ് കേസെടുത്തത്.