തിരുവനന്തപുരം : ലോകത്തെ വിറപ്പിച്ച കൊറോണ വൈറസ്‌ കേരളത്തിലെത്തിയിട്ട്‌ വ്യാഴാഴ്ച അഞ്ചാണ്ട്‌. സംസ്ഥാനത്തെയും രാജ്യത്തെയും ആദ്യ കോവിഡ്‌ കേസ്‌ തൃശൂരിൽ സ്ഥിരീകരിച്ചത്‌ 2020 ജനുവരി 30ന്‌. ചൈനയിലെ വുഹാനിൽ നിന്നെത്തിയ മെഡിക്കൽ വിദ്യാർഥിനിക്കാണ്‌ ആദ്യമായി രോഗം ബാധിച്ചത്‌.കോവിഡിനൊപ്പം നിയന്ത്രണങ്ങളും അടച്ചുപൂട്ടലും സമ്പർക്കവിലക്കുമൊക്കെയായി കടന്നുപോയ ആ നാളുകൾ കേരളം മറക്കില്ല. കൊറോണ വൈറസിന്റെ വിവിധ വകഭേദങ്ങൾ അഞ്ചുവർഷത്തിൽ സംസ്ഥാനം നേരിട്ടു. എന്നാൽ ചികിത്സ കിട്ടാതെയൊ ഓക്സിജൻ കിട്ടാതെയോ ഒരു രോഗിക്കുപോലും സംസ്ഥാനത്തെവിടെയും ആശുപത്രി വരാന്തയിൽ കിടക്കേണ്ടിവന്നില്ല. കൃത്യമായ നടപടികളിലൂടെ കോവിഡിനെ പ്രതിരോധിക്കാനായി.

2020 ഫെബ്രുവരി രണ്ടിനാണ്‌ രണ്ടാം കേസ്‌ സ്ഥിരീകരിച്ചത്‌. പിന്നീട്‌ ഏകദേശം രണ്ട്‌ മാസങ്ങൾക്കുശേഷം മാർച്ച്‌ 30ന്‌ സംസ്ഥാനത്ത്‌ ആദ്യ കോവിഡ്‌ മരണവും സ്ഥിരീകരിച്ചു. ഫെബ്രുവരി മൂന്നിന്‌ കൊറോണയെ സംസ്ഥാന ദുരന്തമായി പ്രഖ്യാപിച്ചാണ്‌ കേരളം പ്രതിരോധം ശക്തമാക്കിയത്‌. മാർച്ച്‌ എട്ടിന്‌ ഇറ്റലിയിൽ നിന്നെത്തിയവരുൾപ്പെടെ അഞ്ച്‌ റാന്നി സ്വദേശികൾക്കുകൂടി രോഗം സ്ഥിരീകരിച്ചതോടെ സംസ്ഥാനം കൂടുതൽ ജാഗ്രതയിലേക്ക്‌ പോയി.

മാർച്ച്‌ 24ന്‌ സംസ്ഥാനത്ത്‌ അടച്ചുപൂട്ടൽ പ്രഖ്യാപിച്ചു. രാജ്യത്ത്‌ ആദ്യം അടച്ചുപൂട്ടൽ പ്രഖ്യാപിച്ച സംസ്ഥാനവും കേരളമാണ്‌. അഞ്ചുവർഷത്തിൽ 68.49 ലക്ഷം പേർക്കാണ്‌ കോവിഡ്‌ സ്ഥിരീകരിച്ചത്. 72,137 മരണവും സ്ഥിരീകരിച്ചു. 2023ൽ രോഗസ്ഥിരീകരണത്തിൽ കുറവുണ്ടായി. വാക്സിൻ എത്തിയതോടെ കോവിഡ്‌ ഭീതിയകന്നു.

കോവിഡാനന്തരം ഗുരുതരപ്രശ്നങ്ങൾ

കോവിഡ്‌ ഭേദമായ ശേഷവും ആരോഗ്യപ്രശ്നങ്ങൾ വിടാതെ പിന്തുടർന്നവരുടെ എണ്ണവും കൂടുതലാണ്‌. ആകെ രോഗം ബാധിച്ചവരിൽ 10 ശതമാനം പേരിലെങ്കിലും “ലോങ്‌ കോവിഡ്‌’ പ്രശ്നങ്ങൾ ഉണ്ടായിട്ടുണ്ട്‌. ശ്വാസംമുട്ടൽ, ചുമ, പനി പോലെയുള്ള ലക്ഷണങ്ങൾ ആഴ്‌ചകളും മാസങ്ങളും തുടർന്ന കേസുകളുമുണ്ടായി.

തിരുവനന്തപുരം: കുവൈത്തിലെ തൊഴിലാളി ക്യാമ്പിലുണ്ടായ തീപിടിത്തത്തിൽ പരിക്കേറ്റ 30 മലയാളികളിൽ ഒരാൾക്ക് ഒരു ലക്ഷം രൂപ വീതം മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അനുവദിച്ചു. 30 ലക്ഷം രൂപയാണ് ആകെ അനുവദിച്ചത്. അപകടത്തിൽ മരണപ്പെട്ടവരുടെ കുടുംബത്തിന് അഞ്ച് ലക്ഷം രൂപ വീതം നേരത്തെ അനുവദിച്ചിരുന്നു. കഴിഞ്ഞ വർഷം ജൂൺ 12നാണ് കുവൈത്തിലെ മംഗഫയിലെ തൊഴിലാളികൾ താമസിച്ചിരുന്ന ഫ്ലാറ്റ് സമുച്ചയത്തിൽ തീപിടിത്തമുണ്ടാകുന്നത്.

കുവൈത്തില്‍ സ്വകാര്യ കമ്പനിയുടെ ക്യാമ്പിലാണ് തീപിടിത്തമുണ്ടായത്. മലയാളിയുടെ ഉടമസ്ഥതയിലുള്ള തൊഴിലാളി ക്യാമ്പിലാണ് തീപിടിത്തമുണ്ടായത്. നിരവധി പേർക്ക് പരിക്കേറ്റു. പുലർച്ചെ നാലുമണിക്ക് ആരംഭിച്ച തീ കെട്ടിടത്തിൽ ആളി പടരുകയായിരുന്നു. മലയാളികൾ അടക്കം ഒട്ടേറെ പേരാണ് ക്യാമ്പിൽ താമസിച്ചിരുന്നത്. പുക ശ്വസിച്ചും പൊള്ളലേറ്റുമാണ് നിരവധി പേര്‍ക്ക് പരിക്കേറ്റത്.

പൊതുജനങ്ങളുടെ സംശയങ്ങൾ പരിഹരിക്കാൻ സമൂഹമാധ്യമത്തിന്റെ പുതുവഴികൾ ഉപയോഗപ്പെടുത്തി ശ്രദ്ധ നേടി അക്ഷയ ജില്ലാ പ്രൊജക്‌ട്‌ ഓഫീസ്‌. ഫേസ്‌ബുക്ക്‌, ഇൻസ്റ്റഗ്രാം തുടങ്ങിയ നവമാധ്യമങ്ങളിൽ ക്രിയാത്മകമായ റീലുകൾ, സ്റ്റോറികൾ, പോസ്റ്ററുകൾ, ട്രോളുകൾ എന്നിവ പങ്കുവച്ചാണ്‌ ഓൺലൈൻ സേവനങ്ങളുടെ വിവരങ്ങൾ ജനങ്ങളിലേക്ക്‌ എത്തിക്കുന്നത്‌. സംസ്ഥാനത്ത്‌ ആദ്യമായാണ്‌ ഇത്തരം ഒരു ആശയം അക്ഷയ ജില്ലാ പ്രൊജക്ട്‌ ഓഫീസ്‌ കൊണ്ടുവരുന്നത്‌. കഴിഞ്ഞ ഡിസംബറിലാണ്‌ ഇത്‌ പ്രാവർത്തികമാക്കിയത്‌. ഇതിനകം നൂറോളം പോസ്റ്റുകൾ പങ്കുവച്ചു. ഇതിന്‌ നിരവധി കാഴ്‌ചക്കാരുമുണ്ട്‌. ജില്ലാ പ്രൊജക്ട്‌ മാനേജർ കപിൽദേവിന്റെ നേതൃത്വത്തിൽ അസിസ്റ്റന്റ് പ്രൊജക്ട്‌ കോഡിനേറ്റർ ബി സന്തോഷ് കുമാർ, ബ്ലോക്ക് കോഡിനേറ്റർ എ. വി ബാബു, യുഐഡിഎഎൽ അഡ്മിൻ നിത്യ ഗോപി, ബ്ലോക്ക് കോഡിനേറ്റർ ശ്രീനിവാസ് നായിക്, ഗ്രേസി തോമസ്, കെ അശോക്, കെ പുഷ്പലത, പ്രൊജക്ട്‌ അസിസ്റ്റന്റ് ശാലിനി എന്നിവരുടെ സഹകരണത്തോടെയാണ്‌ റീലുകളും പോസ്റ്ററും നിർമിക്കുന്നത്‌. അവതരിപ്പിക്കേണ്ട വിഷയങ്ങൾ തലേന്ന്‌ എഴുതി തയ്യാറാക്കി പഠിക്കുന്നു. ശേഷം ജോലിക്കിടയിലെ ഇടവേളകളിലും ജോലി സമയത്തിന്‌ ശേഷവുമാണ്‌ ചിത്രീകരണം. വിവിധ അക്ഷയ പ്രവർത്തനങ്ങൾ, അക്ഷയ ബിഗ് ക്യാമ്പയയിൻ ഫോർ ഡോക്യൂമെന്റ് ഡിജിറ്റിലൈസേഷൻ, ആധാർ, കൃഷി, സ്കോളർഷിപ്പുകൾ, കെഎസ്‌ഇബി , കേന്ദ്ര സർക്കാർ സേവനങ്ങൾ, സ്വകാര്യ സേവനങ്ങൾ എന്നിവയാണ്‌ ജനങ്ങളിൽ എത്തിക്കുന്നത്‌. മലയാളം കൂടാതെ കന്നഡ, മറാത്തി ഭാഷകളിലും കണ്ടന്റുകൾ ചെയ്യാനുള്ള ഒരുക്കത്തിലാണ്‌ ഇവർ.