ഉളിക്കൽ : കോളിത്തട്ട് പ്രവർത്തിക്കുന്ന മൂന്നു കരിങ്കൽ കോറിയിൽ നിന്ന് പുറപ്പെടുന്ന ടോറസ് ഉൾപ്പെടെ ഉള്ള ടിപ്പർ ലോറികൾ കോളിതട്ട് -അറബി – ഉളിക്കൽ റോഡിൽ കൂടി യാതൊരു നിയന്ത്രണവും ഇല്ലാതെ അമിതമായി പായുന്നത് ചെറുവാഹനങ്ങൾക്കും കാൽനട യാത്രക്കാർക്കും അറബി സ്കൂളിൽ പഠിക്കുന്ന കുട്ടികൾക്കും ഭീഷണി ആണ്. കോളിത്തട്ടു – മട്ടിണി -വള്ളിത്തോട് റോഡ്, കോളിത്തട്ടു -മട്ടിണി – പേരട്ട റോഡ്, കോളിത്തട്ടു – പേരട്ട റോഡ് എല്ലാം പൊട്ടിപൊളിഞ്ഞു കിടക്കുന്നത് കൊണ്ടു കോറിയിൽ നിന്ന് പുറപ്പെടുന്ന ലോറികൾ അറബി റോഡ് തെരെഞ്ഞെടുത്തിരിക്കുന്നത്. രാഷ്ട്രീയപാർട്ടികളുടെ പ്രദേശിക നേതൃത്യങ്ങൾ ടിപ്പറുകളുടെ ഈ അമിതമായ ഓട്ടത്തിന് മൗനഅനുവാദം കൊടുത്തിരിക്കുന്നതു കൊണ്ടു സാധാരണക്കാർ ദുരിതത്തിൽ ആണ്.

ഇരിട്ടി:മോട്ടോര്‍ വാഹന വകുപ്പും കേരള പോലീസും ഇ ചലാന്‍ മുഖേന നല്‍കിയിട്ടുള്ള ട്രാഫിക് ഫൈനുകളില്‍ 2021 വര്‍ഷം മുതല്‍ യഥാസമയം പിഴ അടയ്ക്കാന്‍ സാധിക്കാത്തതും നിലവില്‍ കോടതിയില്‍ ഉള്ളതുമായ ചലാനുകളില്‍ പ്രോസിക്യൂഷന്‍ നടപടികള്‍ക്ക് ശുപാര്‍ശ ചെയ്തിട്ടുള്ളവ ഒഴികെയുള്ള എല്ലാ ചലാനുകളും പിഴയൊടുക്കി തുടര്‍നടപടികളില്‍ നിന്നും ഒഴിവാകാന്‍ പോലീസും മോട്ടോര്‍ വാഹന വകുപ്പും ചേര്‍ന്ന് ജനുവരി 29 ന് ഇരിട്ടിയില്‍ നേരമ്പോക്ക് റോഡിലുള്ള സബ് ആര്‍ ടി ഓഫീസ് പ്രവര്‍ത്തിക്കുന്ന ഫാല്‍ക്കണ്‍ പ്ലാസ ബില്‍ഡിങ്ങില്‍ അദാലത്ത് സംഘടിപ്പിക്കും.അദാലത്തില്‍ രാവിലെ 10 മണി മുതല്‍ വൈകുന്നേരം 4 മണി വരെ പ്രത്യേകം സജ്ജീകരിച്ചിരിക്കുന്ന കൗണ്ടറുകളില്‍ പൊതുജനങ്ങള്‍ക്ക് നേരിട്ട് എത്തി പിഴ ഒടുക്കാവുന്നതാണ്.അദാലത്തുമായി ബന്ധപ്പെട്ട വിവരങ്ങള്‍ക്ക് 04902490001 എന്ന നമ്പറില്‍ ബന്ധപ്പെടാവുന്നതാണ്.

ഇരിട്ടി: ആറളം ഫാം വൈവിധ്യവൽക്കരണത്തിന്റെ ഭാഗമായി കൃഷി ചെയ്ത എള്ളിൽ നിന്നും ഉല്പാദിപ്പിച്ച ശുദ്ധമായ എള്ളെണ്ണ വിപണിയിലേക്ക്‌. കണ്ണൂർ ജില്ലാ കലക്ടറും ആറളം ഫാം ചെയർമാനുമായ അരുൺ കെ. വിജയൻ ഐ.എ.എസ് ജില്ലാ പോലീസ് മേധാവി പനിവാല്‍ ഐ.പി.എസ്, കണ്ണൂർ ഡിവിഷനൽ ഫോറസ്റ്റ് ഓഫീസർ എസ്. വൈശാഖ് ഐ.എഫ്.എസ് എന്നിവർക്ക് എള്ളെണ്ണ നൽകിക്കൊണ്ട് ഇതിന്റെ ഉദ്ഘാടന കർമ്മം നിർവഹിച്ചു. ആറളം ഫാം മാനേജിംഗ് ഡയറക്ടർ കാർത്തിക് പാണിഗ്രാഹി ഐ. എ.എസ് ഫാമിലെ ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു. ശുദ്ധമായ എള്ളണ്ണ ലിറ്ററിന് 500 രൂപ നിരക്കിലാണ് വിപണനം ചെയ്യുന്നത്.ഫാമിൽ വിളയിക്കുന്ന കാർഷിക വിളകൾ മൂല്യവർധിത ഉൽപന്നങ്ങൾ ആക്കി വിപണിയിൽ ഇറക്കാനുള്ള തീരുമാനത്തിന്റെ ഭാഗമായാണ് നടപടി. ഫാം ബ്ലോക്ക് 1, 6, 8 എന്നിവിടങ്ങളിലായി 6 ഹെക്ടർ സ്ഥലത്ത് കൃഷി നടത്തിയതിൽ ആദ്യഘട്ടത്തിൽ 750 കിലോ എള്ളിൽ നിന്നും ഉദ്പാദിപ്പിച്ച 200 ലിറ്റർ എണ്ണയാണ് ഇപ്പോൾ വിൽപ്പനക്കായി തയാറാക്കിയിരിക്കുന്നത്.