ബെംഗളൂരു: ജര്‍മനിയിലെ ഇന്റര്‍സിറ്റി ബസ് സര്‍വീസ് ദാതാക്കളായ ഫ്‌ലിക്സ് ബസ് ബെംഗളൂരുവില്‍നിന്ന് ആലുപ്പുഴയിലേക്ക് സര്‍വീസ് ആരംഭിച്ചു. രാത്രി 8.35-ന് ബെംഗളൂരുവില്‍നിന്ന് പുറപ്പെട്ട് പിറ്റേദിവസം രാവിലെ 10.5-ന് ആലപ്പുഴയിലെത്തും. തിരിച്ച് ആലപ്പുഴയില്‍നിന്ന് രാത്രി 7.30-ന് പുറപ്പെട്ട് പിറ്റേദിവസം രാവിലെ 9.25-ന് ബെംഗളൂരുവിലെത്തും.കൃഷ്ണഗിരി, സേലം, ഈറോഡ്, തിരുപ്പൂര്‍, കോയമ്പത്തൂര്‍, പാലക്കാട്, തൃശ്ശൂര്‍, കൊച്ചി എന്നിവിടങ്ങളില്‍ സ്റ്റോപ്പുണ്ട്. ഫ്‌ലിക്സ് ബസ് വെബ്സൈറ്റ് വഴി ബുക്ക് ചെയ്യുമ്പോള്‍ 1400 രൂപയാണ് നിരക്ക്.ദക്ഷിണേന്ത്യയില്‍ ചുവടുറപ്പിക്കുന്നതിന്റെ ഭാഗമായി ഗോവയിലേക്കും സര്‍വീസ് ആരംഭിച്ചിട്ടുണ്ട്. ബെംഗളൂരുവില്‍നിന്ന് ഗോവയിലേക്ക് 1600 രൂപയാണ് നിരക്ക്.

രാജ്യത്തെ പ്രധാന ടൂറിസം കേന്ദ്രങ്ങളായ ഗോവയെയും കേരളത്തെയും ബെംഗളൂരുവുമായി ബന്ധിപ്പിക്കുന്ന ബസ് സര്‍വീസുകള്‍ ആരംഭിക്കുന്നതില്‍ സന്തോഷമുണ്ടെന്ന് ഫ്‌ലിക്സ്ബസ് ഇന്ത്യ എം.ഡി. സൂര്യ ഖുറാന പറഞ്ഞു. മിതമായ നിരക്കില്‍ സുഖകരവും പ്രകൃതിസൗഹൃദവുമായ യാത്രാസൗകര്യങ്ങള്‍ ഒരുക്കുമെന്നും അദ്ദേഹം പറഞ്ഞു.ദക്ഷിണേന്ത്യന്‍ സംസ്ഥാനങ്ങളില്‍ ഗതാഗതരംഗത്ത് വിപണിസാന്നിധ്യം വികസിപ്പിക്കാനുള്ള കമ്പനിയുടെ തീരുമാനത്തിന്റെ ഭാഗമാണ് പുതിയ ബസ് സര്‍വീസുകള്‍.സ്ഥിരംയാത്രക്കാരുള്ള പ്രത്യേക സീസണുകളും ആഘോഷദിവസങ്ങളുംകൂടി കണക്കിലെടുത്താണ് ഈ രണ്ട് റൂട്ടുകളിലും ബസുകള്‍ ഇറക്കിയത്. കഴിഞ്ഞ സെപ്റ്റംബറില്‍ ബെംഗളൂരുവില്‍നിന്ന് ചെന്നൈ, ഹൈദരാബാദ്, മധുര, കോയമ്പത്തൂര്‍ എന്നിവിടങ്ങളിലേക്ക് സര്‍വീസ് ആരംഭിച്ചിരുന്നു. ഭാവിയില്‍ കേരളത്തിലുള്‍പ്പെടെ 33 നഗരങ്ങളിലേക്ക് സര്‍വീസ് ആരംഭിക്കും.പ്രാദേശിക ബസ് ഓപ്പറേറ്റര്‍മാരുമായി സഹകരിച്ചാകും സര്‍വീസ് നടത്തുന്നത്. വടക്കേ ഇന്ത്യയില്‍ സര്‍വീസ് വിജയകരമായി നടപ്പാക്കിയശേഷമാണ് ദക്ഷിണേന്ത്യയിലേക്ക് വ്യാപിപ്പിക്കുന്നത്.

കോഴിക്കോട്: മലബാറുകാരുടെ യാത്രാപ്രശ്‌നമെന്നത് പുതുമയുള്ള കാര്യമല്ലെങ്കിലും അതു കൂട്ടുകയാണ് റെയില്‍വേ. തീവണ്ടികളുടെ ടൈംടേബിളിലെ സമയമാറ്റമാണ് പുതിയ ഇരുട്ടടി. ഇതോടെ കോഴിക്കോട്ടുനിന്ന് വടക്കോട്ടുള്ള യാത്രക്കാരുടെ ദുരിതം ഇരട്ടിയായി. ഇരുന്ന് പോവാമെന്ന പ്രതീക്ഷ പണ്ടേ പലരും ഉപേക്ഷിച്ചെങ്കിലും ഇപ്പോള്‍ തീവണ്ടിയില്‍ കാലുകുത്താന്‍പോലുമാവാത്ത സ്ഥിതിയാണ്.കോഴിക്കോട്ടുനിന്ന് ഉച്ചയ്ക്ക് 1.25-ന് കോയമ്പത്തൂര്‍ പാസഞ്ചര്‍, 2.05-ന് ഷൊര്‍ണൂര്‍-കണ്ണൂര്‍ പാസഞ്ചര്‍, 2.15-ന് ചെന്നൈ-മംഗളൂരു എഗ്മോര്‍ എക്‌സ്പ്രസ് എന്നിവ പുറപ്പെടുന്ന രീതിയിലാണ് പുതിയ സമയമാറ്റം. ഏതാണ്ട് മുക്കാല്‍മണിക്കൂറിനിടെ മൂന്നു തീവണ്ടികള്‍. അതുകഴിഞ്ഞാല്‍ പിന്നെ കണ്ണൂരിന് വടക്കോട്ടുള്ള തീവണ്ടി പരശുറാം എക്‌സ്പ്രസ് പുറപ്പെടുന്നത് അഞ്ചുമണിക്കാണ്. അതായത് രണ്ടേമുക്കാല്‍ മണിക്കൂര്‍ കാത്തിരിക്കണം.നേരത്തേ എഗ്മോര്‍-മംഗളൂരു എക്‌സ്പ്രസ് 2.45-നായിരുന്നു കോഴിക്കോട്ടുനിന്ന് പുറപ്പെട്ടിരുന്നത്. വൈകുന്നേരമാവുമ്പോഴാണ് പൊതുവേ യാത്രക്കാര്‍ കൂടുന്നത്. അപ്പോഴാണ് ഉണ്ടായിരുന്ന ഒരു തീവണ്ടി അരമണിക്കൂര്‍ നേരത്തേയാക്കിയത്. അതോടെ, നേരത്തേത്തന്നെ യാത്രക്കാര്‍ ശ്വാസംമുട്ടിപ്പോയിരുന്ന പരശുറാമില്‍ ഇപ്പോള്‍ മിക്കദിവസവും കയറിപ്പറ്റാന്‍പോലുമാവാത്ത സ്ഥിതിയായി.

ഷൊര്‍ണൂര്‍-കണ്ണൂര്‍ സ്‌പെഷ്യല്‍ ട്രെയിന്‍ കോഴിക്കോട്ടുനിന്ന് പുറപ്പെടുന്ന സമയം ക്രമീകരിച്ചാല്‍ ചെറുവത്തൂര്‍വരെയുള്ള യാത്രക്കാര്‍ക്കെങ്കിലും ഉപകരിക്കുമെന്ന നിര്‍ദേശം സമയമാറ്റത്തില്‍ റെയില്‍വേ കണക്കിലെടുത്തില്ല. ഷൊര്‍ണൂര്‍-കണ്ണൂര്‍ പാസഞ്ചറിനെ സ്ഥിരമായി വടകരയ്ക്കു മുന്‍പ് പിടിച്ചിടുന്ന പതിവും തുടരും. കണ്ണൂരില്‍നിന്ന് അഞ്ചരയ്ക്ക് ചെറുവത്തൂര്‍ പാസഞ്ചറായി ഓടുന്ന ട്രെയിനാണിത്.

ഏതാണ്ട് നാലോടെ കോഴിക്കോട്ടെത്തുന്ന പരശുറാം അഞ്ചിനാണ് കോഴിക്കോട്ടു നിന്ന് വിടുന്നത്. പതിനഞ്ച് മിനിറ്റ് വ്യത്യാസത്തില്‍ മംഗള എക്‌സ്പ്രസ് കൂടി വരും. റിസര്‍വേഷനില്ലാത്ത യാത്രക്കാര്‍ കയറാവുന്ന കോച്ചുകള്‍ ഇതില്‍ കുറവുമാണ്. 6.05-ന് നേത്രാവതി എക്‌സ്പ്രസ് പോയാല്‍പ്പിന്നെ രാത്രി 1.15-ന് വെസ്റ്റ് കോസ്റ്റ് എക്‌സ്പ്രസാണ് മംഗളൂരുവിലേക്കുള്ള സ്ഥിരംതീവണ്ടി. ഇടയിലുള്ള സ്റ്റേഷനുകളില്‍ സ്റ്റോപ്പില്ലാത്തതിനാല്‍ വന്ദേഭാരത് ഈ യാത്രാപ്രശ്‌നം പരിഹരിക്കുന്നുമില്ല.വൈകീട്ട് ട്രെയിനില്ലാത്ത സമയത്തെ ഇടവേള കുറച്ച് ഷൊര്‍ണൂര്‍-കണ്ണൂര്‍ സ്‌പെഷ്യല്‍ ട്രെയിന്‍ മംഗളൂരുവരെ നീട്ടിയാല്‍ യാത്രക്കാര്‍ക്ക് ഏറെ ആശ്വാസമാവുമായിരുന്നു. വടക്കന്‍ ജില്ലകളിലെ എം.പി.മാര്‍ ഇടപെട്ടാല്‍ കുറേ പ്രശ്‌നങ്ങള്‍ക്കെങ്കിലും പരിഹാരമുണ്ടാക്കാവുന്നതാണ്. മലബാറിലെ യാത്രാപ്രശ്‌നപരിഹാരത്തിന് റെയില്‍വേ പ്രൊട്ടക്ഷന്‍ ഫോറം പ്രതിനിധികളും നിര്‍ദേശങ്ങള്‍ മുന്നോട്ടുവെച്ചിട്ടുണ്ട്.

ചാവക്കാട്: ബി.ജെ.പി. പ്രവര്‍ത്തകനെ വെട്ടിക്കൊലപ്പെടുത്താന്‍ ശ്രമിച്ച കേസില്‍ സി.പി.എം. പ്രവര്‍ത്തകനായ പ്രതിക്ക് 33 വര്‍ഷം ഏഴുമാസം കഠിനതടവും 85,000 രൂപ പിഴയും ശിക്ഷ വിധിച്ചു. വെങ്കിടങ്ങ് പാടൂര്‍ കൊല്ലങ്കിവീട്ടില്‍ സനീഷിനെ(33)യാണ് ചാവക്കാട് അസി. സെഷന്‍സ് കോടതി വിവിധ വകുപ്പുകളിലായി ശിക്ഷിച്ചത്.പാവറട്ടി പെരിങ്ങാട് കളപ്പുരയ്ക്കല്‍ വീട്ടില്‍ വിഷ്ണുപ്രസാദി(35)നെ കൊലപ്പെടുത്താന്‍ ശ്രമിച്ച കേസിലാണ് ശിക്ഷ. കേസിലെ മറ്റൊരു പ്രതി ഹാരിസ് വിചാരണ നേരിടാതെ ഒളിവിലാണ്.2016 ഒക്ടോബര്‍ 21-ന് രാവിലെ 10.30-നാണ് കേസിനാസ്പദമായ സംഭവം. പാടൂര്‍ ഇടിയന്‍ചിറ പാലത്തിന് സമീപം ബൈക്കില്‍ വരുകയായിരുന്ന വിഷ്ണുപ്രസാദിനെ ഒന്നാംപ്രതിയുടെ നേതൃത്വത്തില്‍ കാറിലെത്തിയ സംഘം റോഡിനു കുറുകെ കാര്‍ നിര്‍ത്തി വാളുകൊണ്ട് വെട്ടിപ്പരിക്കേല്‍പ്പിച്ചു. രക്ഷപ്പെടാന്‍ വിഷ്ണുപ്രസാദ് തൊട്ടടുത്തുള്ള വീട്ടില്‍ ഓടിക്കയറി വാതില്‍ അടച്ചെങ്കിലും വാതില്‍ ചവിട്ടിപ്പൊളിച്ച് അക്രമിസംഘം വീട്ടിനുള്ളില്‍ കയറി വിഷ്ണുപ്രസാദിനെ വെട്ടി.

മരിച്ചെന്നു കരുതി കാറില്‍ത്തന്നെ രക്ഷപ്പെട്ടു. ശരീരമാസകലം വെട്ടേറ്റ വിഷ്ണുപ്രസാദ്, അക്രമികള്‍ പോയശേഷം വീടിനു പുറത്തേക്ക് ഇഴഞ്ഞുവരുകയായിരുന്നു. അതുവഴി വന്ന ഓട്ടോറിക്ഷക്കാരനാണ് പാവറട്ടിയിലെ ആശുപത്രിയിലെത്തിച്ചത്. അവിടെനിന്ന് വിദഗ്ധചികിത്സയ്ക്കായി തൃശ്ശൂരിലേക്ക് മാറ്റി. ദിവസങ്ങളോളം  തീവ്രപരിചരണവിഭാഗത്തിലായിരുന്നു.കാലങ്ങളായി മുല്ലശ്ശേരി, തിരുനെല്ലൂര്‍ ഭാഗങ്ങളില്‍ നടന്നുവന്ന ആര്‍.എസ്.എസ്., സി.പി.എം. സംഘട്ടനങ്ങളെത്തുടര്‍ന്നുള്ള രാഷ്ട്രീയവൈരമാണ് ആക്രമണത്തിന് കാരണമെന്നാണ് പോലീസ് പറയുന്നത്. പിഴസംഖ്യ പരിക്കേറ്റ വിഷ്ണുപ്രസാദിന് നല്‍കാന്‍ വിധിയില്‍ പറയുന്നു.പാവറട്ടി പോലീസ് സ്റ്റേഷന്‍ സബ് ഇന്‍സ്‌പെക്ടര്‍ ആയിരുന്ന എസ്. അരുണ്‍ ആണ് കേസ് രജിസ്റ്റര്‍ ചെയ്തത്. ഗുരുവായൂര്‍ പോലീസ് ഇന്‍സ്‌പെക്ടര്‍ ആയിരുന്ന ഇ. ബാലകൃഷ്ണന്‍ അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചു. പ്രോസിക്യൂഷനുവേണ്ടി അഡീഷണല്‍ പബ്ലിക് പ്രോസിക്യൂട്ടര്‍ കെ.ആര്‍. രജിത്കുമാര്‍ ഹാജരായി.