പേരാവൂർ:സെയ്ന്റ് ജോസഫ്‌സ് എച്ച്.എസ്.എസ്73-ആം വാർഷികാഘോഷവും യാത്രയയപ്പ് സമ്മേളനവും പേരാവൂർ പഞ്ചായത്ത് പ്രസിഡന്റ് പി.പി വേണുഗോപാലൻ ഉദ്ഘാടനം ചെയ്തു. ആർച്ച് പ്രീസ്റ്റ് ഫാ. മാത്യു തെക്കേമുറി അധ്യക്ഷനായി. കോർപ്പറേറ്റ് മാനേജർ ഫാ.മാത്യു ശാസ്താംപടവിൽ മുഖ്യപ്രഭാഷണം നടത്തി. സർവീസിൽ നിന്നും വിരമിക്കുന്ന കെ.വി ലൗലി, ഷാജു പോൾ, സെലിൻ ജോസഫ് എന്നിവരെ ആദരിച്ചു.

പ്രിൻസിപ്പാൾ കെ.വി.സെബാസ്റ്റ്യൻ, പ്രഥമാധ്യാപകൻ സണ്ണി.കെ.സെബാസ്റ്റ്യൻ, ജില്ലാ പഞ്ചായത്തംഗം വി.ഗീത, നൂറുദ്ദീൻ മുള്ളേരിക്കൽ, രാജു ജോസഫ്, കെ.ബാബു , സിബി തോമസ്, സോജൻ വർഗീസ്, രാജീവ്.കെ.നായർ എന്നിവർ സംസാരിച്ചു. കല, വിദ്യാഭ്യാസ, സാഹിത്യ, കായിക മേഖലകളിൽ കഴിവ് തെളിയിച്ച വിദ്യാർത്ഥികളെ അനുമോദിച്ചു.

പേരാവൂര്‍: പഞ്ചായത്ത് പ്രസിഡന്റിന്റെയടക്കം ഫോട്ടോ മോര്‍ഫ് ചെയ്ത് സമൂഹമാധ്യമത്തില്‍ അശ്ലീലമായി പ്രചരിപ്പിച്ച കേസില്‍ യുവാവ് അറസ്റ്റില്‍. വായന്നൂര്‍ കണ്ണമ്പള്ളിയിലെകുന്നുമ്മല്‍ അഭയ് (20) ആണ് വയനാട് പടിഞ്ഞാറെത്തറയില്‍ നിന്ന് അറസ്റ്റിലായത്. കൂത്തുപറമ്പ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.അഭയിന്റെ ഫോണ്‍ കസ്റ്റഡിയിലെടുത്ത അന്വേഷണസംഘം കൂടുതല്‍ അന്വേഷണം നടത്തിവരികയാണ്. സമാനമായ സംഭവത്തില്‍ അഭയിനെതിരെ പേരാവൂര്‍ പോലീസ് മുന്‍പും കേസെടുത്തിരുന്നു.കഴിഞ്ഞ ദിവസമാണ് കോളയാട് പഞ്ചായത്ത് പ്രസിഡന്റിനെയടക്കം 12 ഓളം സ്ത്രീകളുടെ ഫോട്ടോ മോര്‍ഫ് ചെയ്ത് സമൂഹമാധ്യമത്തില്‍ അഭയ് പ്രചരിപ്പിച്ചത്.

പേരാവൂർ : ചെവിടിക്കുന്ന് പെട്രോൾ പമ്പിനു സമീപം ട്രാവലറിന് തീപിടിച്ച സംഭവത്തിൽ സമയോചിതമായി പെട്രോൾ പമ്പിലെ എക്സ്റ്റിംഗ്യൂഷർ പ്രവർത്തിപ്പിച്ച് തീയണച്ച് വൻ അപകടം ഒഴിവാക്കിയത് ഓടൻതോട് സ്വദേശി ആറുമാക്കൽ ജിനിൽ . മഹീന്ദ്ര ഫൈനാൻസിലെ ജീവനക്കാരനായ ഈ മുൻ സൈനികന്റെ സമയോചിതമായ ഇടപെടലാണ് നാടിനെ വൻ വിപത്തിൽ നിന്നും രക്ഷിച്ചത്. കേവലം 25 മീറ്റർ ദൂരം മാത്രമായിരുന്നു പെട്രോൾ പമ്പിൽ നിന്നുള്ള അകലം. ട്രാവലറിന് തൊട്ടു പുറകിൽ കാറിൽ സഞ്ചരിക്കുകയായിരുന്നു ജിനിൽ. അഗ്നിരക്ഷാ സേന എത്തുന്നതിനു മുൻപേയായിരുന്നു ജിനിലിന്റെ രക്ഷാ പ്രവർത്തനം.

ഓടിക്കൊണ്ടിരുന്ന ട്രാവലറിനുള്ളിൽ തീ പിടിച്ചതിനെത്തുടർന്ന് ഡ്രൈവർ പുറത്തേക്ക് ചാടി രക്ഷപ്പെടുകയായിരുന്നു. നിയന്ത്രണം വിട്ട ട്രാവലർ പെട്രോൾ പമ്പിന് സമീപത്തെ സ്വകാര്യ വ്യക്തിയുടെ സ്ഥലത്തെ ഷീറ്റുകൊണ്ടുള്ള മതിലിൽ ഇടിച്ച് നില്കുകയായിരുന്നു. വ്യാഴാഴ്ച ഉച്ചക്ക് രണ്ട് മണിയോടെയായിരുന്നു സംഭവം.