കൂത്തുപറമ്പ്:ശരീര സൗന്ദര്യ മത്സരരംഗത്ത് പുത്തൻ താരോദയമായി അതിഥിത്തൊഴിലാളി. ബിഹാറിലെ കഗാരിയ സ്വദേശി പത്തൊമ്പതുകാരൻ അർബാസ് ഖാനാണ്‌ ചിട്ടയായ വ്യായാമവും കൃത്യമായ ഭക്ഷണക്രമീകരണവും ശീലിച്ച്‌ മികച്ച ബോഡി ബിൽഡറായി നേട്ടം കൊയ്യുന്നത്‌. നിർമലഗിരിയിയിൽ വെൽഡിങ്‌ തൊഴിലാളിയായ അർബാസ്ഖാൻ ജില്ലാ ബോഡി ബിൽഡിങ് അസോസിയേഷൻ തലശേരിയിൽ സംഘടിപ്പിച്ച ശരീരസൗന്ദര്യ മത്സരത്തിൽ 55 കി ലോഗ്രാം ജൂനിയർ കാറ്റഗറിയിലാണ്‌ സ്വർണം നേടിയത്. മൂന്നുവർഷം മുമ്പ്‌ ജോലി തേടി കേരളത്തിലെത്തിയ യുവാവിന്‌ മെൻസ് ഫിസിക് മുൻ ലോക ചാമ്പ്യൻ ഷിനു ചൊവ്വയെ പരിചയപ്പെട്ടതോടെയാണ് ശരീരസൗന്ദര്യ മത്സരത്തിൽ പങ്കെടുക്കണമെന്ന ആഗ്രഹമുണ്ടായത്. രണ്ടുവർഷമായി നിർമലഗിരി ഡ്രീം ഫിറ്റ്‌ ജിമ്മിൽ ഷിനുവിന്റെ കീഴിൽ പരിശീലനം നടത്തുന്നു. കഴിഞ്ഞ വർഷം ജില്ലാ മത്സരത്തിൽ മൂന്നാംസ്ഥാനം നേടിയിരുന്നു.

കണ്ണൂർ: കണ്ണവത്ത് വിറക് തേടിപ്പോയ യുവതി തിരിച്ചെത്തിയില്ല; പോലീസും വനം വകുപ്പും തിരച്ചിൽ തുടങ്ങി. വിറക് തേടിപ്പോയ യുവതിയെ കാണാതായിട്ട് ആറുദിവസം. പോലീസും വനം വകുപ്പും നാട്ടുകാരും ചേർന്ന് തിരച്ചിൽ നടത്തിയെങ്കിലും കണ്ടെത്താനായില്ല.കണ്ണൂർ കണ്ണവത്തെ സങ്കേതത്തിലെ നാൽപ്പതുകാരിയെയാണ് കഴിഞ്ഞ 31 മുതൽ കാണാനില്ലെന്ന് കണ്ണവം പോലീസിൽ പരാതി ലഭിച്ചത്. വനത്തിൽ വിറക്‌ തേടി പോയതായാണ് പറയുന്നത്.പിന്നീട് ഇവരെക്കുറിച്ച് യാതൊരു വിവരവും ലഭിച്ചിട്ടില്ല. കഴിഞ്ഞദിവസങ്ങളിൽ നാട്ടുകാർ തിരച്ചിൽ നടത്തിയിരുന്നു. തുടർന്ന് വനം വകുപ്പ് ഉദ്യോഗസ്ഥരും കണ്ണവം പൊലീസും കാടിന്റെ വിവിധ ഭാഗങ്ങളിലായി തിരച്ചിൽ നടത്തി. ഇന്നും തിരച്ചിൽ തുടരുകയാണ്.

കൂത്തുപറമ്പ് : ബി.ജെ.പി വേങ്ങാട് ഏരിയ പ്രസിഡന്റ് സനോജ് നെല്ലിയാടനെതിരെ അക്രമം. വെള്ളിയാഴ്ച രാത്രി
വേങ്ങാട് തെരുവിൽ നിന്നും വീട്ടിലേക്ക് ബൈക്കിൽ പോകുന്ന സനോജിനെ ഒരു സംഘം തടഞ്ഞുനിർത്തി ആക്രമിക്കുകയായിരുന്നു. അടിയേറ്റ് ബൈക്കിൽ നിന്നും റോഡിലേക്ക് തെറിച്ചുവീണ സനോജിനെ റോഡിലിട്ടു ചവിട്ടുകയും കല്ലുകൊണ്ട് ആക്രമിക്കുകയും ചെയ്തതായി പരിക്കേറ്റ് തലശ്ശേരി ഇന്ദിരാഗാന്ധി സഹകരണ ആശുപത്രിയിൽ ചികിത്സയിൽ കഴിയുന്ന സനോജ് പറഞ്ഞു.തന്റെ വീടിനടുത്തുള്ള ഒരു ക്ലബ്ബ് സംഘടിപ്പിച്ച പുതുവത്സര പരിപാടിയിൽ മകനെ പങ്കെടുപ്പിക്കണമെന്നാവശ്യപ്പെട്ട് ബാലസംഘത്തിന്റെ ചുമതലയുള്ള പ്രവർത്തകൻ വീട്ടിൽ വരുകയും മകനെ പുതുവത്സര പരിപാടിയിൽ അയക്കാൻ താല്പര്യമില്ലെന്ന് അറിയിക്കുകയും ചെയ്തിരുന്നു. വന്നയാൾ താനുമായി വഴക്കിടുകയും പിന്നീട് കുറച്ചുപേർ സംഘടിച്ചെത്തി തന്നെ ഭീഷണിപ്പെടുത്തുകയുമുണ്ടായി. സംഭവം അന്ന് രാത്രി തന്നെ കൂത്തുപറമ്പ് പോലീസ് സ്റ്റേഷനിൽ വിളിച്ചറിയിച്ചിരുന്നു. ഇതിന് പിന്നാലെയാണ് വെള്ളിയാഴ്ച രാത്രി അക്രമമുണ്ടായത്. ഡി.വൈ.എഫ്.ഐ, സി.പി.എം പ്രവർത്തകരാണ് തന്നെ മർദ്ദിച്ചതെന്ന് സനോജ് പറഞ്ഞു.