കോഴിക്കോട്: ഭൂമി തരംമാറ്റുന്നതിന് കൈകൂലി ആവശ്യപ്പെട്ട വില്ലേജ് ഓഫീസർ വിജിലൻസിന്റെ പിടിയിലായി. പന്തീരാങ്കാവ് വില്ലേജ് ഓഫീസർ പേരാവൂർ തെറ്റുവഴി പാലയാട്ടുകരി സ്വദേശി മുത്തേരി പുതിയ വീട്ടിൽ അനിൽ കുമാറിനെ (52) യാണ് അര ലക്ഷം രൂപ കൈക്കൂലി വാങ്ങുന്നതിനിടയിൽ വിജിലൻസ് അറസ്റ്റ് ചെയ്തത്. മലപ്പുറം ജില്ലയിലെ കരുവാരക്കുണ്ട് സ്വദേശി പന്തീരാങ്കാവ് വില്ലേജ് പരിധിയിൽപെട്ട സ്ഥലത്ത് പെട്രോൾ പമ്പ് തുടങ്ങുന്നതിനായി സുഹൃത്തിൻ്റെ പേരിൽ നിന്ന് പാട്ടത്തിനെടുത്ത ഒരേക്കർ സ്ഥലത്തിൽ നിന്ന് 30 സെന്റ് സ്ഥലം തരം മാറ്റുന്നതിന് അപേക്ഷ നൽകിയിരുന്നു.

അപേക്ഷ അന്വേഷിച്ചു ചെന്നയാളോട് അനിൽ കുമാർ
10 ലക്ഷം രൂപ കൈക്കൂലി ആവശ്യപ്പെട്ടു. ശനിയാഴ്ച ആദ്യ ഗഡുവായ രണ്ടുലക്ഷം രൂപ നൽകണമെന്ന് പറഞ്ഞു. തുടർന്ന് പരാതിക്കാരൻ ഈ വിവരം കോഴിക്കോട് യൂണിറ്റ് വിജിലൻസ് ഡെപ്യൂട്ടി പോലീസ് സൂപ്രണ്ടിനെ അറിയിച്ചു. രാത്രി എട്ടുമണിക്ക് കോഴിക്കോട് മെഡിക്കൽ കോളേജിന് സമീപം പരാതിക്കാരൻ്റെ കാറിൽ വെച്ച് അര ലക്ഷം രൂപ കൈക്കൂലി വാങ്ങവേ അനിൽ കുമാറിനെ വിജിലൻസ് സംഘം കൈയോടെ പിടികൂടി. ഇയാളെ കോഴിക്കോട് വിജിലൻസ് കോടതിയിൽ ഹാജരാക്കി. ഇതിന് മുൻപും ഇയാൾ കൈക്കൂലി കേസിൽ സസ്പെൻഷൻ നേരിട്ടിരുന്നു. അനിൽ കുമാറിനെതിരെ വകുപ്പുതല നടപടിയുണ്ടാവുമെന്നാണ് വിവരം.

മാനന്തവാടി: വയനാട് കളക്ട്രേറ്റിന് മുന്നിൽ ആത്മഹത്യാ ശ്രമം. കളക്ട്രേറ്റിന് മുന്നിൽ സമരം നടത്തുന്ന ജെയിംസ് കാഞ്ഞിരത്തിനാൽ എന്നയാളാണ് പ്രെട്രോളൊഴിച്ച് ആത്മഹത്യയ്ക്ക് ശ്രമിച്ചത്.2015 മുതൽ വനംവകുപ്പ് അന്യായമായി തട്ടിയെടുത്ത 12 ഏക്കർ ഭൂമി വിട്ടുകിട്ടണം എന്ന് ആവശ്യപ്പെട്ട് കാഞ്ഞിരത്തിനാൽ കുടുംബം കളകട്രേറ്റിന് മുമ്പിൽ സമരം ചെയ്യുന്നുണ്ട്. കാഞ്ഞിരത്തിനാൽ ജോർജ് എന്ന വ്യക്തി തുടങ്ങിയ സമരം പിന്നീട് ജെയിംസ് ഏറ്റെടുക്കുകയായിരുന്നു.മുൻ ജില്ലാ കളക്ടർ രേണുരാജ് ഈ കുടുംബത്തിന് അനുകൂലമായി റിപ്പോർട്ടും സമർപ്പിച്ചിരുന്നു. എന്നാൽ മറ്റ് നടപടികൾ ഉണ്ടായില്ല.മുസ്ലീം ലീഗ് പ്രവർത്തകർ ഇന്ന് നടത്തിയ സമരത്തിൻറെ ഭാഗമായി ഈ സമരപ്പന്തലിന് കേടുപാട് സംഭവിച്ചിരുന്നു. ഇതോടെയാണ് ജെയിംസിന്റെ ആത്മഹത്യാ ശ്രമം. പിന്നീട് പോലീസ് എത്തി ഇയാളെ അനുനയിപ്പിക്കുകയായിരുന്നു.(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ ‘ദിശ’ ഹെല്‍പ് ലൈനില്‍ വിളിക്കുക. Toll free helpline number: 1056, 0471-2552056).

തിരുവനന്തപുരം: പോക്‌സോ കേസില്‍ ട്യൂഷന്‍ അധ്യാപകന് 111 വര്‍ഷം കഠിന തടവ് വിധിച്ച് കോടതി. പ്ലസ് വണ്‍ വിദ്യാര്‍ഥിനിയെ ലൈംഗികമായി പീഡിപ്പിച്ച കേസിലാണ് ശിക്ഷാവിധി വന്നത്. സര്‍ക്കാര്‍ ഉദ്യോഗസ്ഥനായ പ്രതി കുട്ടിയെ വീട്ടിലേക്ക് വിളിച്ചുവരുത്തി പീഡിപ്പിപ്പിക്കുകയായിരുന്നു.തിരുവനന്തപുരം പ്രത്യേക പോക്‌സോ കോടതിയാണ് ശിക്ഷ വിധിച്ചത്.