ന്യൂഡല്‍ഹി: പരിഷ്‌കരിച്ച ക്രിമിനല്‍ നടപടി ചട്ടം ഭാരതീയ നാഗരിക്ക് സുരക്ഷാ സന്‍ഹിത (ബിഎന്‍എസ്എസ്) 2023 പ്രകാരം വാട്ട്സ്ആപ്പ് വഴിയോ മറ്റ് ഇലക്ട്രോണിക് മോഡുകള്‍ വഴിയോ പ്രതികള്‍ക്ക് നോട്ടീസ് നല്‍കാന്‍ പോലീസിന് കഴിയില്ലെന്ന് സുപ്രീം കോടതി. ജസ്റ്റിസുമാരായ എംഎം സുന്ദ്രേഷും രാജേഷ് ബിന്ദലും അടങ്ങുന്ന ഡിവിഷന്‍ ബെഞ്ചിന്റേതാണ് സുപ്രധാന ഉത്തരവ്. അനുവദനീയമായ സേവന രീതിയിലൂടെ മാത്രമേ നോട്ടീസ് നല്‍കാവൂ എന്ന് സുപ്രീം കോടതി കര്‍ശന നിര്‍ദ്ദേശം പുറപ്പെടുവിച്ചു.

ഇത് സംബന്ധിച്ച് പോലീസ് സേനയ്ക്ക് കൃത്യമായ മാര്‍ഗനിര്‍ദ്ദേശം നല്‍കാന്‍ എല്ലാ സംസ്ഥാനങ്ങളോടും കേന്ദ്ര ഭരണ പ്രദേശങ്ങളോടും സുപ്രീം കോടതി ആവശ്യപ്പെട്ടു. നോയിഡയിലെ ഇ.പി.എഫ്ഒ റീജിയണല്‍ ഓഫീസില്‍ അസിസ്റ്റന്റ് പ്രൊവിഡന്റ് ഫണ്ട് കമ്മീഷണറായിരുന്ന സതേന്ദര്‍ കുമാര്‍ ആന്റിലിന്റെ കേസുമായി ബന്ധപ്പെട്ട ഹര്‍ജിയിലാണ് കോടതിയുടെ ഉത്തരവ്. അഴിമതി നിരോധന നിയമപ്രകാരം സി.ബി.ഐ ഇദ്ദേഹത്തിനെതിരെ ചുമത്തിയ കേസില്‍ സുപ്രീം കോടതി നിരവധി നിര്‍ദ്ദേശങ്ങളാണ് നല്‍കിയത്. ഈ കേസില്‍ ജാമ്യവുമായി ബന്ധപ്പെട്ട് ബെയില്‍ ആക്ട് എന്ന പ്രത്യേക നിയമം പാസാക്കണമെന്നടക്കം കേന്ദ്ര സര്‍ക്കാരിന് സുപ്രീം കോടതി നിര്‍ദ്ദേശം നല്‍കിയിരുന്നു.

വിഷയത്തില്‍ അമിക്കസ് ക്യൂറിയായി നിയോഗിച്ച മുതിര്‍ന്ന അഭിഭാഷകന്‍ സിദ്ധാര്‍ത്ഥ് ലൂത്രയുടെ ശുപാര്‍ശ അംഗീകരിച്ചാണ് സുപ്രീം കോടതിയുടെ തീരുമാനം. ഹൈക്കോടതി രജിസ്ട്രാര്‍ ജനറലുകളോടും എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ചീഫ് സെക്രട്ടറിമാരോടും നിര്‍ദ്ദേശം പാലിക്കുന്നുവെന്നത് ഉറപ്പാക്കി മൂന്നാഴ്ചക്കകം റിപ്പോര്‍ട്ട് സമര്‍പ്പിക്കാന്‍ ആവശ്യപ്പെട്ടിട്ടുണ്ട്.

ന്യൂഡല്‍ഹി: ലോകത്തെ ഏറ്റവും ഉയരംകൂടിയ റെയില്‍വേ പാലമായ ചെനാബ് ബ്രിഡ്ജിലൂടെ വന്ദേ ഭാരത് ട്രെയിനിന്റെ ആദ്യ ട്രയല്‍ യാത്ര നടത്തി. ശ്രീ മാതാ വൈഷ്‌ണോ ദേവി കത്ര സ്‌റ്റേഷനില്‍നിന്ന് ശ്രീനഗര്‍ സ്‌റ്റേഷനിലേക്കാണ് ശനിയാഴ്ച ട്രയല്‍ റണ്‍ നടത്തിയത്. ഇന്ത്യയിലെ ആദ്യത്തെ കേബിള്‍-സ്‌റ്റേ റെയിലായ അന്‍ജിഖാഡ് പാലത്തിലൂടെയാണ് ഈ ട്രെയിന്‍ കടന്നുപോകുക.താഴ്‌വരയിലെ കാലാവസ്ഥയും യാത്രക്കാരുടെ സൗകര്യവും കണക്കിലെടുത്ത് അതിനനുസൃതമായാണ് വന്ദേഭാരത് രൂപകല്പന ചെയ്തിരിക്കുന്നത്. -30 ഡിഗ്രി സെല്‍ഷ്യസില്‍വരെ ട്രെയിനിന് പ്രവര്‍ത്തിക്കാനാവും. വെള്ളം തണുത്തുറയുന്നത് പ്രതിരോധിക്കുന്നതിനായി വിപുലമായ ഹീറ്റിങ് സംവിധാനവുമുണ്ട്.പ്രധാനമന്ത്രി നരേന്ദ്രമോദിയുടെ മേക്ക് ഇന്‍ ഇന്ത്യ പദ്ധതിയുടെ ഭാഗമായ വന്ദേ ഭാരത് ട്രെയിനുകള്‍ ലഭിക്കുന്നതിന് നിരവധി രാജ്യങ്ങള്‍ താത്പര്യം പ്രകടിപ്പിച്ചതായി കേന്ദ്ര റെയില്‍വേ മന്ത്രി അശ്വിനി വൈഷ്ണവ് നേരത്തേ സൂചിപ്പിച്ചിരുന്നു.

ന്യൂഡല്‍ഹി: സിവില്‍ സര്‍വീസസ് പ്രിലിമിനറി പരീക്ഷയ്ക്ക് അപേക്ഷിക്കുമ്പോള്‍ത്തന്നെ പ്രായവും സംവരണവും തെളിയിക്കുന്ന രേഖകള്‍ സമര്‍പ്പിക്കുന്നത് നിര്‍ബന്ധമാക്കി കേന്ദ്രസര്‍ക്കാര്‍. നേരത്തെ, പ്രിലിമിനറി പരീക്ഷ പാസാകുന്നവര്‍ മാത്രം അനുബന്ധരേഖകള്‍ നല്‍കിയാല്‍ മതിയായിരുന്നു.മഹാരാഷ്ട്രയിലെ ഐ.എ.എസ്. പ്രൊബേഷണര്‍ പൂജ ഖേഡ്കര്‍ രേഖകളില്‍ തട്ടിപ്പ് നടത്തിയാണ് പരീക്ഷ പാസായത് എന്ന് കണ്ടെത്തിയതിന് പിന്നാലെയാണ് വ്യവസ്ഥകള്‍ കര്‍ശനമാക്കിയത്. ഇതുസംബന്ധിച്ച പുതിയ ചട്ടങ്ങള്‍ കേന്ദ്രം വിജ്ഞാപനം ചെയ്തു.

ജനന തീയതി തെളിയിക്കുന്നത്. വിദ്യാഭ്യാസ യോഗ്യത എന്നീ രേഖകള്‍ക്കൊപ്പം സംവരണവിഭാഗത്തിലാണ് അപേക്ഷിക്കുന്നതെങ്കില്‍ അതിന്റെ രേഖയും നല്‍കണം. ഓണ്‍ലൈന്‍ അപേക്ഷയ്‌ക്കൊപ്പം ഇവ സമര്‍പ്പിച്ചിട്ടില്ലെങ്കില്‍ രജിസ്‌ട്രേഷന്‍ റദ്ദാകും. ഫെബ്രുവരി 11-ന് വൈകീട്ട് ആറുമണി വരെ അപേക്ഷിക്കാം.