കണ്ണൂർ: കൊടിമരം സ്ഥാപിക്കുന്നതുമായി ബന്ധപ്പെട്ട് കണ്ണൂർ ​ഗവ.ഐ.ടി.ഐയിൽ എസ്.എഫ്.ഐ-കെ.എസ്.യു സംഘർഷം. കെ.എസ്.യു പ്രവർത്തകർ കൊടിമരം സ്ഥാപിച്ചതുമായി ബന്ധപ്പെട്ടുയർന്ന തർക്കമാണ് സംഘർഷത്തിനിടയാക്കിയത്. പോലീസ് ലാത്തി വീശി. സംഘർഷത്തെത്തുടർന്ന് ഐ.ടി.ഐക്ക് അനിശ്ചിതകാല അവധി പ്രഖ്യാപിച്ചു. വെള്ളിയാഴ്ച വിദ്യാർത്ഥി സംഘടനകളുമായി ചർച്ച നടത്തുമെന്ന് കണ്ണൂർ എ.സി.പി അറിയിച്ചു.

എസ്.എഫ്.ഐക്ക് വലിയ ആധിപത്യമുള്ള കണ്ണൂർ ​ഗവ. ഐ.ടി.ഐയില്‍ ഏതാനും മാസങ്ങൾക്കുമുൻപാണ് കെ.എസ്.യു യൂണിറ്റ് സ്ഥാപിച്ചത്. യൂണിയൻ തിരഞ്ഞെടുപ്പിന് മുന്നോടിയായി കെ.എസ്.യു പ്രവർത്തകർ കഴിഞ്ഞദിവസം കൊടിമരം സ്ഥാപിച്ചിരുന്നു. ഇത് ബുധനാഴ്ച രാവിലെ നോക്കുമ്പോൾ കാണാനില്ലായിരുന്നു. ഇതിന് പിന്നിൽ എസ്.എഫ്.ഐ പ്രവർത്തകരാണെന്ന് കെ.എസ്.യു ആരോപിച്ചു. ഇതിനെച്ചൊല്ലി സംഘർഷവും നടന്നിരുന്നു.

കഴി‍ഞ്ഞദിവസത്തെ സംഘർഷത്തിലുൾപ്പെട്ട ചില കെ.എസ്.യു പ്രവർത്തകരെ പുറത്താക്കണമെന്നാവശ്യപ്പെട്ട് എസ്.എഫ്.ഐയുടെ ഉപരോധം പ്രിൻസിപ്പാളിന്റെ ഓഫീസിന് മുന്നിൽ നടന്നിരുന്നു. ബുധനാഴ്ച തിരഞ്ഞെടുപ്പ് നാമനിർദേശം നൽകാനും പ്രിൻസിപ്പാളിനെ കാണാനും പുറത്തുനിന്നുള്ള കെ.എസ്.യു പ്രവർത്തകർ ഇവിടേക്കെത്തിയിരുന്നു. ഇവർ കൊടിമരം സ്ഥാപിക്കാൻ ശ്രമിച്ചപ്പോൾ തിരഞ്ഞെടുപ്പ് ചട്ടം നിലനിൽക്കുന്നതിനാൽ കൊടി സ്ഥാപിക്കാൻ കഴിയില്ലെന്ന് പോലീസ് ഇവരോട് പറഞ്ഞു.

ഈ സമയം എസ്.എഫ്.ഐയുടേയും കെ.എസ്.യുവിന്റെയും ജില്ലാ നേതാക്കൾ സ്ഥലത്തുണ്ടായിരുന്നു. ഈ സാഹചര്യം നിലനിൽക്കേ കെ.എസ്.യു പ്രവർത്തകർ കൊടി കെട്ടി. തുടർന്ന് രണ്ട് കൂട്ടരും ഇരുചേരികളിലായി നിൽക്കുമ്പോൾ ഒരു എസ്.എഫ്.ഐ പ്രവർത്തകൻ ഈ കൊടി എടുത്തുമാറ്റിയതാണ് വൻ സംഘർഷത്തിലേക്ക് നയിച്ചത്. സംഭവത്തിൽ ഇരു സംഘടനകളുടേയും പ്രവർത്തകർ പരിക്കുണ്ട്.

കേളകം: ചെങ്ങോം നെല്ലിക്കുന്നിൽ കാർ യാത്രക്കാരോട് അപമര്യാദയായി പെരുമാറിയ എസ്.ഐക്ക് സ്ഥലം മാറ്റം. കേളകം എസ്.ഐ വി.വി.ശ്രീജേഷിനെയാണ് ജില്ലാ ക്രൈം ബ്രാഞ്ചിലേക്ക് അന്വേഷണ വിധേയമായി സ്ഥലം മാറ്റിയത്. ശിക്ഷാനടപടിയുടെ കൂടി ഭാഗമായാണ് സ്ഥലം മാറ്റമെന്നും അറിയുന്നു.

കഴിഞ്ഞ ഞായറാഴ്ചയാണ് സംഭവം. നെല്ലിക്കുന്നിൽ കേളകം പോലീസ് സംഘം വാഹന പരിശോധന നടത്തുന്നുണ്ടായിരുന്നു . ഈ സമയം, അതുവഴി കാറിലെത്തിയ പൂളക്കുറ്റി സ്വദേശികളെ കൈകാണിച്ച് നിർത്തുകയും കാർ ഡ്രൈവർ മദ്യപിച്ചിട്ടുണ്ടോ എന്ന് ബ്രീത്തിങ്ങ് അനലൈസറുപയോഗിച്ച് പോലീസ് പരിശോധിക്കുകയുമുണ്ടായി. പോലീസും കാർ ഓടിച്ചയാളും തമ്മിൽ വാക്ക് തർക്കമുണ്ടാവുകയും എസ്.ഐ. കാർ ഡ്രൈവറെ അസഭ്യം പറയുകയും ചെയ്തതോടെയാണ് താൻ കാറിൽ നിന്നിറങ്ങിമൊബൈലിൽ ദൃശ്യം പകർത്താൻ തുടങ്ങിയതെന്ന് കേസിൽ പ്രതിചേർക്കപ്പെട്ട കാർ യാത്രക്കാരനായ മറ്റത്തിൽ നിപു പറഞ്ഞു.

ഇതോടെ എസ്.ഐയും കൂടെയുള്ള പോലീസുകാരും തന്നെ മർദ്ദിക്കുകയും ബലമായി പോലീസ് ജീപ്പിൽ കയറ്റുകയും ഫോൺ തട്ടിയെടുക്കുകയും ചെയ്തുവെന്ന് നിപു പറഞ്ഞു. സ്റ്റേഷനിൽ കൊണ്ടു പോകും വഴിയും സ്റ്റേഷനിലെത്തിച്ചും ഭീഷണിപ്പെടുത്തുകയും മർദ്ദിക്കുകയും ചെയ്തതായും നിപു പറഞ്ഞു. പേരാവൂർ താലൂക്കാസ്പത്രിയിലെത്തിച്ച് ഇരുവരെയും വൈദ്യ പരിശോധന നടത്തിയെങ്കിലും ജാമ്യത്തിൽ വിട്ടയക്കുകയും ചെയ്തു.

എസ്.ഐ തന്നെ മർദ്ദിക്കുന്നതും കേട്ടാലറക്കുന്ന തെറി വിളിക്കുന്നതും ബലമായി ജീപ്പിൽ കയറ്റുന്നതും പ്രദേശവാസി വീഡിയോയിൽ പകർത്തിയിട്ടുണ്ട്. ഇക്കാര്യങ്ങളെല്ലാം കാണിച്ച് ജില്ലാ പോലീസ് സൂപ്രണ്ട്, പേരാവൂർ ഡി.വൈ.എസ്.പി, മനുഷ്യാവകാശ കമ്മീഷൻ തുടങ്ങി വിവിധ വകുപ്പുകൾക്ക് പരാതി നല്കിയതായും കോടതിയിൽ പ്രത്യേകം ഹർജി നല്കിയതായും നിപു പറഞ്ഞു. എസ്.ഐ.ശ്രീജേഷിനെതിരെ ഇതിനു മുൻപും സമാനമായ പരാതികളുണ്ടായിരുന്നു.പൊതു സ്ഥലത്ത് വെച്ച് പോലീസ് സേനക്ക് തന്നെ അപമാനകരമാവും വിധം ശ്രീജേഷ് പെരുമാറിയതായാണ് അധികൃതരുടെ വിലയിരുത്തൽ. ശ്രീജേഷും കൂടെയുള്ള മൂന്നോളം പോലീസുകാരും നിപുവിനെ ജീപ്പിൽ വലിച്ചു കയറ്റുന്നതും അസഭ്യം പറയുന്നതുമായ വീഡിയൊ സമൂഹ മാധ്യമങ്ങളിൽ വൈറലാണ്.

കണ്ണൂർ: ജില്ലാ എംപ്ലോയ്‌മെന്റ് എക്സ്ചേഞ്ചിന്റെ കീഴിലുള്ള എംപ്ലോയബിലിറ്റി സെന്ററിന്റെ ആഭിമുഖ്യത്തിൽ ഡിസംബർ 13 ന് രാവിലെ 10 മണി മുതൽ ഒരു മണി വരെ പ്രമോട്ടർ, ഡിജിറ്റൽ മാർക്കറ്റിങ് എക്സിക്യൂട്ടീവ്, ടെലി കോളർ, പ്ലേസ്മെന്റ് കോ ഓർഡിനേറ്റർ ഷോറൂം സെയിൽസ് എക്സിക്യൂട്ടീവ്, മാനേജർ ട്രെയിനി, സീനിയർ ഡവലപ്മെന്റ് മാനേജർ, ബിസിനസ് ഡവലപ്മെന്റ് മാനേജർ എന്നീ ഒഴിവുകളിലേക്ക് അഭിമുഖം നടത്തും. യോഗ്യത: എസ്എസ് എൽ സി, പ്ലസ് ടു, ഡിഗ്രി. ഉദ്യോഗാർഥികൾക്ക് തിരിച്ചറിയൽ കാർഡിന്റെ പകർപ്പും 250 രൂപയും ഒരു പാസ്പോർട്ട് സൈസ് ഫോട്ടോയും സഹിതം എംപ്ലോയബിലിറ്റി സെന്ററിൽ പേര് രജിസ്റ്റർ ചെയ്ത് ഇന്റർവ്യൂവിനു പങ്കെടുക്കാം. നിലവിൽ രജിസ്റ്റർ ചെയ്ത ഉദ്യോഗാർത്ഥികൾക്കും രജിസ്‌ട്രേഷൻ സ്ലിപ് കൊണ്ടുവന്ന് പങ്കെടുക്കാം. ഫോൺ : 0497 2707610, 6282942066.