സ്റ്റാറ്റസ് മെന്‍ഷന്‍ അപ്‌ഡേഷന് ശേഷം പുതുപുത്തന്‍ ഫീച്ചറുമായി വാട്‌സാപ്പ് എത്തിയിരിക്കുകയാണ്.വാട്‌സാപ്പ് ഉപഭോക്താക്കള്‍ക്ക് ഇനി മെസേജുകളും സ്റ്റാറ്റസുകളും മിസ് ചെയ്യേണ്ടതില്ല. നമ്മള്‍ കൂടുതലായി ഇടപെടുന്ന ആളുകളുടെ സ്റ്റാറ്റസുകളും മെസേജുകളെയും കുറിച്ച് വാട്‌സാപ്പ് തന്നെ ഇനി നമ്മെ ഓര്‍മിപ്പിക്കും. ഇതിനായി നമ്മള്‍ സ്ഥിരമായി നടത്തുന്ന ആശയവിനിമയങ്ങള്‍ വാട്‌സാപ്പ് വിശകലനം ചെയ്യുമെന്നാണ് റിപ്പോര്‍ട്ട്. എന്നാല്‍ ഈ വിവരങ്ങള്‍ ബാക്കപ്പിലോ സെര്‍വറിലോ സൂക്ഷിക്കില്ലെന്ന് കമ്പനി വ്യക്തമാക്കുന്നു. ഉപഭോക്താവിന് ശല്യമാകാത്ത രീതിയിലാണ് റിമൈന്‍ഡര്‍ നല്‍കുക. ആവശ്യമില്ലെങ്കില്‍ ഈ സേവനം ഓഫ് ചെയ്യാനും സാധിക്കും.

വാട്‌സാപ്പ് ബീറ്റാ (2.24.25.29) ഉപഭോക്താക്കള്‍ക്ക് ഈ സേവനം ഇപ്പോള്‍ ലഭ്യമായി തുടങ്ങിയിട്ടുണ്ട്. ഉടന്‍ തന്നെ മറ്റ് വേര്‍ഷനുകളിലും ഈ അപ്ഡേഷന്‍ ലഭ്യമായി തുടങ്ങും. അടുത്തിടെ വാട്‌സാപ്പ് അവതരിപ്പിച്ച സ്റ്റാറ്റസ് മെന്‍ഷന്‍ ഓപ്ഷനും ഇതിനോടൊപ്പം ശ്രദ്ധേയമാണ്. ഒരു സ്റ്റാറ്റസ് ഇടുമ്പോള്‍ ഗ്രൂപ്പിലെ എല്ലാവരേയും മെന്‍ഷന്‍ ചെയ്യാനും ഇതിലൂടെ സാധിക്കും. നിലവില്‍ അഞ്ച് വ്യക്തികളെ മാത്രമേ ഒരു സ്റ്റാറ്റസില്‍ മെന്‍ഷന്‍ ചെയ്യാന്‍ സാധിക്കൂ. ഗ്രൂപ്പുകളെ മെന്‍ഷന്‍ ചെയ്യാനുള്ള അവസരം ലഭിക്കുന്നതിലൂടെ വ്യക്തികളെ പ്രത്യേകം സ്റ്റാറ്റസുകളില്‍ മെന്‍ഷന്‍ ചെയ്യേണ്ടതുമില്ല. ഗ്രൂപ്പിനെ മെന്‍ഷന്‍ ചെയ്യുന്നതിലൂടെ അംഗങ്ങള്‍ക്ക് മെന്‍ഷനെക്കുറിച്ച് അറിയിപ്പും ലഭിക്കും. ഈ അപ്‌ഡേഷനിലൂടെ അംഗങ്ങള്‍ക്ക് സ്റ്റാറ്റസ് കാണാനാകും.

പഴയ ഐ.ഒ.എസ് വേർഷനുകളിൽ ഓടുന്ന ഐഫോണുകളിൽ വാട്‌സ്‌ആപ് പണി നിർത്തുന്നുവെന്ന വാർത്ത കഴിഞ്ഞ ദിവസമാണ് പുറത്തുവന്നത്. ഐഫോണിനു പുറമെ ആൻഡ്രോയിഡിൻ്റെ പഴയ വേർഷനുകളിലും വാട്‌സ്ആപ് പ്രവർത്തനരഹിതമാകുമെന്നാണ് ഇപ്പോൾ പുറത്തുവരുന്ന റിപ്പോർട്ട്. ഉപയോക്താക്കൾക്കായി മികച്ച ഫീച്ചറുകൾ ലഭ്യമാക്കാനാണ് തീരുമാനമെന്ന് വാട്‌സ്ആപിന്റെറെ മാതൃകമ്പനിയായ മെറ്റ പറയുന്നു.അടുത്ത വർഷം മേയ് അഞ്ച് മുതലാണ് പഴയ ഒ.എസുകളിൽ വാട്‌സ്ആപ് സേവനം അവസാനിപ്പിക്കുന്നത്. ആൻഡ്രോയിഡിൻ്റെ വേർഷൻ 5.0 അല്ലെങ്കിൽ അതിനു ശേഷമുള്ള ഫോണുകളിൽ മാത്രമേ ആറു മാസത്തിനു ശേഷം വാട്‌സ്ആപ് ലഭിക്കുകയുള്ളൂ. ഐ ഒ.എസിൽ 15.1 അല്ലെങ്കിൽ അതിന് ശേഷമുള്ള വേർഷനുകളിൽ മാത്രമാകും വാട്സ്ആപ്പ് സേവനം നൽകുക. പുതിയ അപ്ഡേഷനൊപ്പം വരുന്ന ഫീച്ചറുകൾ പഴയ ഒ.എസിൽ ലഭിക്കില്ലെന്നും അതിനാലാണ് ഒ.എസ് അപ്ഗ്രേഡ് ചെയ്യാൻ ആവശ്യപ്പെടുന്നതെന്നും മെറ്റ വ്യക്തമാക്കി.
ആപ്പിളിന്റെ ഐഫോൺ 5എസ്, ഐഫോൺ 6, ഐഫോൺ 6 പ്ലസ് എന്നീ ഐഫോൺ മോഡലുകളിലാണ് വാട്‌സ്‌ആപ് പ്രവർത്തന രഹിതമാകുക. ഈ ഐഫോണുകളിൽ വാട്സ്ആപ്പിന്റെറെ അപ്ഡേറ്റഡ് വേർഷൻ ഉപയാഗിക്കാനാവില്ലെന്നാണ് ഡബ്ല്യു.എ ബീറ്റഇൻഫോ റിപ്പോർട്ട് ചെയ്യുന്നത്. നിലവിൽ ഐ.ഒ.എസ് 12 അല്ലെങ്കിൽ അതിന് ശേഷമുള്ള സോഫ്റ്റ്വെയറിൽ പ്രവർത്തിക്കുന്ന ഐഫോണുകളിൽ വാട്‌സ്ആപ്പ് ലഭ്യമാണ്. അപ്ഡേഷൻ വരുന്നതോടെ പഴയവയിൽ പ്രവർത്തനം നിലയ്ക്കും.നിങ്ങൾ ഉപയോഗിക്കുന്ന ഫോൺ ഇപ്പോഴും പഴയ പതിപ്പിലാണെങ്കിൽ, ലഭ്യമായ ഏറ്റവും പുതിയ സോഫ്റ്റ്വെയർ പാച്ച് ഇൻസ്റ്റാൾ ചെയ്യുക അല്ലെങ്കിൽ ഫോൺ മാറ്റുക എന്നതാണ് പോംവഴി. എന്തായാലും പുതിയ ഫോണിലേക്ക് മാറും മുമ്പ് എല്ലാ ചാറ്റുകളും ഐക്ലൗഡിലേക്കോ ഗൂഗിൾ ഡ്രൈവിലേക്കോ ബാക്കപ്പ് ചെയ്യാൻ ഓർക്കുക.

ഏറ്റവും പ്രിയപ്പെട്ട ഒന്നിന്റെ നഷ്ടപ്പെടല്‍ ഒരു വ്യക്തിയില്‍ ആഴത്തിലുള്ള വൈകാരികവൈഷമ്യവും കഠിനമായ ശാരീരികവേദനയും സൃഷ്ടിച്ചേക്കും. ഒരു വ്യക്തിയ്ക്ക് മറ്റൊരാളോടുള്ള സ്‌നേഹത്തിന്റേയും മാനസിക അടുപ്പത്തിന്റേയും തോതിനനുസൃതമായി അയാളിലുണ്ടാകുന്ന വിഷമതയിലും വ്യതിയാനമുണ്ടാകാം. മനുഷ്യമസ്തിഷ്‌കത്തിലെ പ്രധാനഭാഗത്തിന്റെ പ്രവര്‍ത്തനങ്ങള്‍ സജീവമാക്കുന്നതില്‍ സ്‌നേഹമെന്ന വികാരത്തിന്റെ പ്രതിഫലവും ആസക്തിയും സുപ്രധാനപങ്ക് വഹിക്കുന്നുവെന്നാണ് പുതിയൊരു പഠനഫലം സൂചിപ്പിക്കുന്നത്. മയക്കുമരുന്ന് പോലുള്ള ലഹരിപദാര്‍ഥങ്ങള്‍ ഉപയോഗിക്കുന്നവരിലും വീഡിയോ ഗെയിം ശീലമാക്കിയവരിലും ഉണ്ടാകുന്ന പെരുമാറ്റങ്ങള്‍ക്ക് പിന്നില്‍ പ്രവര്‍ത്തിക്കുന്ന മസ്തിഷ്‌കഭാഗമാണ് സ്‌നേഹത്തിന്റെ ‘വരുംവരായ്കകള്‍’ നിശ്ചയിക്കുന്നതെന്നാണ് പഠനം പറയുന്നത്. നാം സ്‌നേഹിക്കുന്ന വ്യക്തികളില്‍ നമ്മള്‍ അടിമപ്പെട്ടിരിക്കുന്നു, അക്കാരണത്താലാണ് ബ്രേക്കപ്പ് പോലുള്ളതോ പ്രിയപ്പെട്ടയാളിന്‍റെ വേര്‍പാടോ പല വ്യക്തികളേയും തീവ്രദുഃഖത്തിലേക്ക് തള്ളിവിടുന്നത്. .

ഒക്‌സ്‌ഫോര്‍ഡ് യൂണിവേഴ്‌സിറ്റി പ്രസ്സിന്റെ സെറിബ്രല്‍ കോര്‍ട്ടെക്‌സ് ജേണലില്‍ പ്രസിദ്ധീകരിച്ച പഠനം വിവിധതരത്തിലുള്ള സ്‌നേഹം- പ്രണയം, കുടുംബത്തോടുള്ള ഇഷ്ടം, സുഹൃത്തിനോടുള്ള സ്‌നേഹം, വളര്‍ത്തുമൃഗങ്ങളോടുള്ളത്, പ്രകൃതിയോടുള്ളത്- എത്തരത്തിലാണ് മസ്തിഷ്‌കത്തില്‍ സ്വാധീനം ചെലുത്തുന്നതെന്ന് വിശദീകരിക്കുന്നു. ഫിന്‍ലന്‍ഡിലെ ആള്‍ട്ടോ യൂണിവേഴ്‌സിറ്റിയിലെ ഗവേഷകരാണ് പഠനത്തിനുപിന്നില്‍. വ്യത്യസ്തതരത്തിലുള്ള സ്‌നേഹവുമായി ബന്ധപ്പെട്ടുള്ള മസ്തിഷ്‌കപ്രവര്‍ത്തനത്തെ വിശദമാക്കുന്നതിനോടൊപ്പം സാമൂഹികധാരണയുമായി ബന്ധമുള്ള മസ്തിഷ്‌കത്തിന്റെ വിവിധമേഖലകളെ ഈ പ്രവര്‍ത്തനങ്ങള്‍ സജീവമാക്കുന്നതായും പഠനം കണ്ടെത്തി. എല്ലാ തരത്തിലുള്ള സ്‌നേഹത്തിന്റേയും പൊതുസംഗതിയെന്നത് തലച്ചോറിന്റെ പ്രതിഫലവ്യവസ്ഥയെ ഉത്തേജിപ്പിക്കുന്നു എന്നതാണെന്നും പഠനം കണ്ടെത്തി. കൂടാതെ ആസക്തി നിറഞ്ഞ പെരുമാറ്റങ്ങള്‍ക്ക് പിന്നിലും ഇതാണ് എന്നതും ഗവേഷകര്‍ക്ക് മനസ്സിലാക്കാനായി എന്ന് പഠനത്തില്‍ പറയുന്നു.

പ്രണയവും ദീര്‍ഘകാല വ്യക്തിബന്ധങ്ങളും തലച്ചോറിന്റെ പ്രതിഫല-ആസക്തി വ്യവസ്ഥകളെ ഉപയോഗപ്പെടുത്തുന്നുണ്ടെന്ന കാര്യം ഈ പഠനം സ്ഥിരീകരിക്കുന്നതായി ഐന്‍സ്റ്റീന്‍ കോളേജ് ഓഫ് മെഡിസിന്‍, ന്യൂയോര്‍ക്കിലെ ന്യൂറോ സയന്റിസ്റ്റായ ലൂസി ബ്രൗണ്‍ പറഞ്ഞു. ഒരാള്‍ സ്‌നേഹബന്ധത്തിലായിരിക്കുമ്പോള്‍ മസ്തിഷ്‌കം ഏതുവിധത്തിലായിരിക്കുമെന്നതിന്റെ കൂടുതല്‍ വ്യക്തമായ ചിത്രം ഈ പഠനം നല്‍കുന്നുണ്ടെന്നും അവര്‍ കൂട്ടിച്ചേര്‍ത്തു.

തിരഞ്ഞെടുക്കപ്പെട്ട വ്യക്തികളിലാണ് ഗവേഷകര്‍ പഠനം നടത്തിയത്. ഇതിനായി ബ്രെയിന്‍ സ്‌കാനിങ് ടെക്‌നിക്കായ ഫങ്ഷണല്‍ മാഗ്നെറ്റിക് റിസൊണന്‍സ് ഇമേജിങ് (fMRI) ആണ് ശാസ്ത്രജ്ഞര്‍ ഉപയോഗപ്പെടുത്തിയത്. സ്വന്തം കുഞ്ഞ്, പങ്കാളി, സുഹൃത്ത് എന്നിവരുമായി കൂടുതല്‍ തീവ്രമായ വ്യക്തിപരബന്ധങ്ങളാണ് വ്യക്തികള്‍ക്കുള്ളതെന്നും ഇത് മസ്തിഷ്‌കത്തിന്റെ പ്രതിഫലവ്യവസ്ഥയെ കൂടുതലായി ഉത്തേജിപ്പിക്കുന്നതായും പഠനത്തിന് നേതൃത്വം നല്‍കിയ പാര്‍ട്ടൈല്‍ റിന്നെ ഡച്ച് വെല്ലിനോട് പ്രതികരിച്ചു. വിചാരം, വികാരം, വിവേകം തുടങ്ങിയവയുമായി ബന്ധപ്പെട്ട മസ്തിഷ്‌കഭാഗങ്ങളുടെ പ്രവര്‍ത്തനങ്ങളേയും വ്യക്തികളിലെ സ്‌നേഹമെന്ന വികാരം സജീവമാക്കുന്നതായും പഠനം കണ്ടെത്തി. സാമൂഹികസാഹചര്യങ്ങളിലെ മസ്തിഷ്‌കപ്രവര്‍ത്തനങ്ങളില്‍ വ്യത്യാസമുള്ളതായും പഠനം പറയുന്നു.

വളര്‍ത്തുമൃഗങ്ങളുള്ളവരില്‍ അവയോടുള്ള സ്‌നേഹം തലച്ചോറിന്റെ പ്രവര്‍ത്തനങ്ങളെ സ്വാധീനിക്കുന്നതായും പാര്‍ട്ടൈല്‍ റിന്നെ പറഞ്ഞു. പ്രകൃതിയോടുള്ളതോ കലയോടുള്ളതോ ആയ സ്‌നേഹവും ചിലവ്യക്തികളില്‍ തീവ്രമായി പ്രകടമാകാം. എങ്കിലും വ്യക്തികളോടുള്ളതില്‍നിന്ന് വ്യത്യസ്തമായിരിക്കും ഇത്തരത്തിലുള്ളത്. വ്യത്യസ്തതരത്തിലുള്ള ഇഷ്ടങ്ങള്‍ തലച്ചോറിന്റെ വ്യത്യസ്തഭാഗങ്ങളെ സജീവമാക്കുകയോ ഉത്തേജിപ്പിക്കുകയോ ചെയ്യുന്നുവെന്നാണ് പഠനം പറയുന്നത്. സ്‌നേഹമെന്ന വികാരത്തിന് ഒരു വ്യക്തിയുടെ മസ്തിഷ്‌കപ്രവര്‍ത്തനങ്ങളെ ഏതുവിധത്തില്‍ സ്വാധീനിക്കാന്‍ സാധിക്കുന്നു എന്നതിലേക്ക് പഠനത്തിന് കൂടുതല്‍ വ്യാഖ്യാനങ്ങള്‍ നല്‍കാന്‍ സാധിച്ചിരിക്കുകയാണ്.