കണിച്ചാർ: 40 വർഷത്തെ കോൺഗ്രസ് ഭരണത്തിന് തടയിട്ട് എൽ.ഡി.എഫ് പിടിച്ചെടുത്ത കണിച്ചാർ പഞ്ചായത്ത് ഉപതിരഞ്ഞെടുപ്പിൽ എൽ.ഡി.എഫിന് മിന്നും ജയം. പഞ്ചായത്തിന്റെ സമസ്ത മേഖലകളിലും അടിസ്ഥാന സൗകര്യങ്ങളിലൂന്നി മികവാർന്ന ഭരണം കാഴ്ച വെച്ച പഞ്ചായത്ത് പ്രസിഡന്റ് ആന്റണി സെബാസ്റ്റ്യനും ഭരണസമിതിക്കുമുള്ള അംഗീകാരം കൂടിയാണ് എൽ.ഡി.എഫ് സ്ഥാനാർഥി രതീഷ് പൊരുന്നന്റെ 199 വോട്ട് ഭൂരിപക്ഷത്തോടെയുള്ള വിജയം.

പോൾ ചെയ്ത 888 വോട്ടുകളിൽ 536 വോട്ടുകൾ എൽ.ഡി.എഫ് നേടിയപ്പോൾ യു.ഡി.എഫ് സ്ഥാനാർഥി സിന്ധു ചിറ്റേരിക്ക് 337 വോട്ടുകളാണ് ലഭിച്ചത്. എൻ.ഡി.എ സ്ഥാനാർഥി സിന്ധു പവിക്ക് 11 വോട്ടുകളേ നേടാനായുള്ളൂ. യു.ഡി.എഫ് റിബൽപി.സി.റിനീഷിന് മൂന്ന് വോട്ടുകൾ ലഭിച്ചപ്പോൾ അപര സ്ഥാനാർഥി സിന്ദുവിന് ഒരു വോട്ട് ലഭിച്ചു.

13 സീറ്റുകളിൽ ഏഴ് സീറ്റ് നേടിയാണ് എൽ.ഡി.എഫ് പഞ്ചായത്ത് ഭരണം പിടിച്ചത്.ഇതിൽ ഒരാൾ സർക്കാർ ജോലി ലഭിച്ചതിനാൽ രാജിവെച്ച ഒഴിവിലേക്കാണ് ഉപതിരഞ്ഞെടുപ്പ് നടന്നത്. കഴിഞ്ഞ തവണ ലഭിച്ചതിനേക്കാൾ 129 വോട്ടുകൾ ഇത്തവണ എൽ.ഡി.എഫ് സ്ഥാനാർഥി നേടി.

കൊളക്കാട് : കണിച്ചാർ പഞ്ചായത്ത് ഭരണം എൽ. ഡി. എഫ് നിലനിർത്തുമോ, അതല്ല യു. ഡി. എഫ് തിരിച്ചു പിടിക്കുമോ എന്നറിയാൻ ഇനി മണിക്കൂറുകൾ മാത്രം. പഞ്ചായത്തിലെ ചെങ്ങോം വാര്‍ഡില്‍ ഇന്ന് നടന്ന ഉപതിരഞ്ഞെടുപ്പില്‍ 76.4% പോളിംഗ് നടന്നുവെന്നാണ് പ്രാഥമിക കണക്കുകൾ. 1162 വോട്ടര്‍മാരില്‍ 888 പേര്‍ ഓടപ്പുഴ ഗവ. എല്‍.പി. സ്‌കൂളിലെ പോളിംഗ് ബൂത്തില്‍ വോട്ട് ചെയ്യാനെത്തി. എല്‍. ഡി. എഫിലെ രതീഷ് പൊരുന്നന്‍, യു.ഡി .എഫിലെ സിന്ധു ചിറ്റേരി, എന്‍.ഡി.എയുടെ സിന്ധു പവി എന്നിവരാണ് പ്രധാന സ്ഥാനാർഥികൾ. കോൺഗ്രസ് റിബൽ പി.സി.റിനീഷ്, അപര സ്ഥാനാർഥി സിന്ധു എന്നിവരും മത്സര രംഗത്തുണ്ട്. എല്‍.ഡി.എഫിന് ഏഴും യു. ഡി. എഫിന് ആറും അംഗങ്ങളാണ് ഉണ്ടായിരുന്നത് . സര്‍ക്കാര്‍ ജോലി ലഭിച്ചതിനെ തുടര്‍ന്ന് എല്‍.ഡി. എഫ് അംഗം വി.കെ.ശ്രീകുമാര്‍ രാജിവെച്ചതോടെയാണ് തിരഞ്ഞെടുപ്പ് വേണ്ടി വന്നത്. ഈ വാര്‍ഡിലെ വിജയം ഇരു മുന്നണിക്കും നിര്‍ണായകമാണ്. വോട്ടെണ്ണല്‍ ബുധനാഴ്ച രാവിലെ 10ന് തൊണ്ടിയിൽ സെയ്ന്റ് ജോൺസ് യു.പി.സ്‌കൂളില്‍ നടക്കും.എൽ. ഡി. എഫ് വിജയിച്ചാൽ പഞ്ചായത്ത് ഭരണം ആന്റണി സെബാസ്റ്റ്യന് നിലനിർത്താം. മറിച്ചാണെങ്കിൽ നഷ്ടപ്പെട്ട ഭരണം യു.ഡി.എഫിനൊപ്പമാവും. 11 മണിയോടെ ഫലം അറിയാനാവും.

കണിച്ചാർ : ഉപതിരഞ്ഞെടുപ്പ് നടക്കുന്ന കണിച്ചാർ ആറാം വാർഡ്‌ ചെങ്ങോത്ത് യു. ഡി. എഫ് സ്ഥാനാർഥി ആരെന്ന കാര്യത്തിൽ തർക്കമെന്ന് സൂചന. പത്രിക പിൻവലിക്കേണ്ട അവസാന ദിവസമായ തിങ്കളാഴ്ച സമയപരിധി കഴിഞ്ഞിട്ടും യു.ഡി.എഫ് ഡമ്മി
സ്ഥാനാർഥി പത്രിക പിൻവലിക്കാത്തതോടെയാണ് കോൺഗ്രസിലെ തമ്മിലടി പുറത്തായത്. യു. ഡി. എഫ്. സ്ഥാനാർഥിയായി സി . കെ.സിന്ധുവും ഡമ്മി സ്ഥാനാർഥിയായി പി.സി. റിനീഷുമാണ് കോൺഗ്രസ് നേതാക്കൾക്കൊപ്പമെത്തി കഴിഞ്ഞ ദിവസം പത്രിക സമർപ്പിച്ചത്. യൂത്ത് കോൺഗ്രസ് മണ്ഡലം നേതാവും പട്ടികവർഗ കോൺഗ്രസിന്റെ ബ്ലോക്ക്‌ കമ്മറ്റി അംഗവും കോൺഗ്രസ് ഭരിക്കുന്ന കൊളക്കാട് പട്ടിക വർഗ സഹകരണ സംഘം സെക്രട്ടറിയുമാണ് പി. സി. റിനീഷ്. യഥാർത്ഥത്തിൽ യു. ഡി. എഫ് സ്ഥാനാർഥിയായി പരിഗണിക്കേണ്ടിയിരുന്നത് റിനീഷിനെയാണെന്ന് കോൺഗ്രസിലെ ഒരു വിഭാഗം ആഗ്രഹിച്ചിരുന്നു. വാർഡിൽ സുപരിചിതയല്ലാത്തയാളാണ് സിന്ധുവെന്നും ഗ്രൂപ്പ് പോരാണ് സ്ഥാനാർഥി വിഷയത്തിൽ അനിശ്ചിതത്വത്തിന് കാരണമെന്നും ആരോപണമുണ്ട്. അതേ സമയം, എൽ. ഡി. എഫ് സ്ഥാനാർഥി പി. സി.രതീഷിന്റെ സഹോദരനാണ് യു. ഡി. എഫ് ഡമ്മി സ്ഥാനാർഥിയായി പത്രിക നൽകിയ പി. സി.റിനീഷ്. പേരിലും രൂപത്തിലുമുള്ള സാമ്യം മുതലാക്കി എൽ. ഡി. എഫ് വോട്ടുകൾ ഭിന്നിപ്പിച്ച് വിജയം നേടാനുള്ള കോൺഗ്രസ് തന്ത്രമായും സ്ഥാനാർഥി വിവാദത്തെ വിലയിരുത്താം. വ്യക്തമായ ഭൂരിപക്ഷത്തോടെ വിജയിച്ച വാർഡ് നിലനിർത്താൻ കഴിയുമെന്നാണ് എൽ. ഡി. എഫ് കേന്ദ്രങ്ങളുടെ വിലയിരുത്തൽ. പ്രസിഡന്റ് ആന്റണി സെബാസ്റ്റ്യൻ്റെ നേതൃത്വത്തിലുള്ള ഭരണ സമിതി പഞ്ചായത്തിലെ വിവിധ പ്രദേശങ്ങളിൽ നടത്തിയ അടിസ്ഥാന സൗകര്യ വികസനം ഭരണം നിലനിർത്താൻ സഹായിക്കുമെന്നും എൽ.ഡി.എഫ് കണക്ക് കൂട്ടുന്നു.