ഇരിട്ടി:സർവീസിൽ നിന്ന്‌ വിരമിച്ചശേഷം തൂമ്പയുമായി നേരെ കൃഷിയിടത്തിലേക്കിറങ്ങിയ മൂന്ന്‌ സർക്കാർ ജീവനക്കാരുടെ വിയർപ്പുണ്ട്‌ ആറളം പൂതക്കുണ്ടിലെ മണ്ണിന്‌. പഞ്ചായത്ത്‌ സെക്രട്ടറി എം സുദേശൻ, കെ.എസ്‌.ആർ.ടി.സി കണ്ടക്ടർ നരിക്കോടൻ മുകുന്ദൻ, ഫയർ സ്‌റ്റേഷൻ ഓഫീസർ തോട്ടത്തിൽ മോഹനൻ എന്നിവരാണ്‌ വിരമിച്ചശേഷം കൃഷിയിൽ പുതിയ സർവീസ്‌ ചരിത്രമെഴുതുന്നത്‌. ഇരിട്ടി ചുമട്ടുതൊഴിലാളി യൂണിയൻ(സിഐടിയു) അംഗം കരുവാങ്കണ്ടി രാജീവൻ, കൊച്ചോത്ത്‌ ദാസൻ, മമ്മാലി രവി എന്നിവർ കൂടി ഉൾപ്പെട്ട കർഷകർ പൂതക്കുണ്ടിൽ പാട്ടത്തിനെടുത്ത രണ്ടര ഏക്കറിൽ പച്ചക്കറികൃഷി നടത്തി വിജയവഴിയിലാണ്‌.
കൊറോണ കാലത്ത്‌ മമ്മാലി രവിയും നരിക്കോടൻ മുകുന്ദനും തുടക്കമിട്ട കൃഷിയിലേക്ക്‌ സർവീസിൽ നിന്ന്‌ വിരമിച്ചയുടൻ സുദേശനും മോഹനനും ഒപ്പം ചേർന്നു. പ്രദേശത്തെ നാല്‌ കർഷകരെയും ചേർത്ത്‌ കൃഷി വിപുലപ്പെടുത്തി.കഴിഞ്ഞ കൊല്ലം അഞ്ച്‌ ലക്ഷം രൂപയുടെ പച്ചക്കറി വിറ്റു. അഞ്ച്‌ വർഷങ്ങൾക്ക്‌ മുമ്പാരംഭിച്ച പൂതക്കുണ്ട്‌ കൃഷിക്കൂട്ടായ്മ നാടിന്‌ കരുത്താണിന്ന്‌.
ചുമട്ടുതൊഴിലാളി രാജീവൻ ഇരിട്ടിയിൽനിന്നും ശേഖരിക്കുന്ന പുകയില കെട്ടുകയറാണ്‌ കൃഷിയിടത്തിലെ പടർത്തൽ പന്തൽ. കാരാപീരി, പാവൽ, വെള്ളരി, പയർ, ചീര, ഇളവൻ, മത്തൻ തുടങ്ങിയ ഇനങ്ങളാണ്‌ കൃഷി ചെയ്യുന്നത്‌. ഇത്തവണ കൃഷിയിടത്തിന് ചുറ്റും തണ്ണിമത്തനും പരീക്ഷിക്കുന്നു.റിട്ട. ജീവനക്കാരുടെ പച്ചക്കറി ഇനങ്ങൾക്ക്‌ വിപണിയിൽ നല്ല സ്വീകാര്യതയാണ്‌. പൂതക്കുണ്ട്‌, തോട്ടുകടവ്‌, ആറളം, എടൂർ, കാരാപറമ്പ്‌, പോസ്റ്റാഫീസ്‌ തുടങ്ങിയ സ്ഥലങ്ങളിലെ കടകളിലാണ്‌ വിൽപ്പന.ആറ്‌ പേരും വിളവെടുപ്പിന്‌ പുലർച്ചെ അഞ്ചിനെത്തും. കൃഷിപ്പണിയിലുമുണ്ട്‌ ഇതേ സമയനിഷ്ഠ. നിർദേശങ്ങളുമായി കൃഷി ഓഫീസർ റാംമോഹനും ഒപ്പമുണ്ട്‌.

ഇരിട്ടി:  കൂട്ടുപുഴ എക്സൈസ് ചെക്ക് പോസ്റ്റിൽ ക്രിസ്മസ് പുതുവർഷ സ്പെഷൽ ഡ്രൈവിന്റെ ഭാഗമായി ആദ്യ ദിവസം പരിശോധിച്ചത് 150ഓളം വാഹനങ്ങൾ. കർണാടകയിൽ നിന്നെത്തുന്ന വാഹനങ്ങൾ അരിച്ചു പെറുക്കിയാണു കൂട്ടുപുഴ ചെക്ക് പോസ്റ്റ് വഴി കേരളത്തിലേക്കു കടത്തി വിടുന്നത്. എല്ലാ വാഹനങ്ങളും പരിശോധനയ്ക്കു വിധേയമാക്കുന്നുണ്ട്. വാഹന പരിശോധനയ്ക്കൊപ്പം വാഹനത്തിന്റെ നമ്പർ, ഡ്രൈവറുടെ പേര്, ഫോൺ നമ്പർ തുടങ്ങിയവയും ചെക്പോസ്റ്റിൽ രേഖപ്പെടുത്തുന്നു.7 ഉദ്യോഗസ്ഥർ അടങ്ങുന്ന സംഘം 3 ഷിഫ്റ്റുകളിലായാണു 24 മണിക്കൂറും പരിശോധന നടത്തുന്നത്. സ്പെഷൽ ഡ്രൈവിനോടനുബന്ധിച്ച് 24 മണിക്കൂറും പ്രവർത്തിക്കുന്ന താലൂക്ക് തല കൺട്രോൾ റൂം പ്രവർത്തനവും ആരംഭിച്ചു.

മട്ടന്നൂരിൽ പ്രവർത്തിക്കുന്ന ഇരിട്ടി എക്സൈസ് സർക്കിൾ ഓഫിസിലാണു കൺട്രോൾ റൂം. കൺട്രോൾ റൂമിനു കീഴിൽ മട്ടന്നൂർ, ഇരട്ടി,പേരാവൂർ റേഞ്ച് ഓഫിസുകളിൽ 24 മണിക്കൂർ പ്രവർത്തിക്കുന്ന പട്രോളിങ് സംഘവും ഉണ്ട്. ക്രിസ്മസിനോടനുബന്ധിച്ച് അതിർത്തിയിൽ കേരള കർണാടക എക്സൈസ് സേനകളുടെ സംയുക്ത പരിശോധനയും ഉണ്ടാകും.

ഇരിട്ടി: പഴശ്ശി പദ്ധതി പ്രദേശത്തെ വിനോദസഞ്ചാര സാധ്യതകൾ ഒന്നൊന്നായി പ്രയോജനപ്പെടുത്താൻ തുടക്കംകുറിച്ചതോടെ അകം തുരുത്ത് ദ്വീപും പ്രതീക്ഷയിൽ. കൈയേറ്റമില്ലാത പച്ചത്തുരുത്തായി തലയുയർത്തി നിൽക്കുന്ന ഈ ദ്വീപ്‌ വലിയ സാധ്യതകളാണ് തുറന്നിട്ടിരിക്കുന്നത്. അനാഥമായിക്കിടക്കുന്ന തുരുത്തിനെ പ്രയോജനപ്പെടുത്താനുള്ള നടപടികളും പ്രവർത്തനങ്ങളുമാണ് ഇനി ഉണ്ടാകേണ്ടത്.

വേനക്കാലത്ത് കുടിവെള്ളത്തിനായി പഴശ്ശിയുടെ ഷട്ടർ അടച്ചാൽ നാലുഭാഗവും വെള്ളത്താൽ ചുറ്റപ്പെട്ട അകംതുരത്ത് പ്രകൃതിദത്തമായ പച്ചപ്പിന്റെ ശീതളച്ഛായയാണ് പകർന്നുനൽകുന്നത്. ഇരിട്ടി നഗരത്തിൽനിന്ന്‌ രണ്ടുകിലോമീറ്റർ അകലെ ഇരിട്ടി-എടക്കാനം-പഴശ്ശി പദ്ധതി റോഡിൽ വള്ളിയാടിനും ഇരിട്ടി-തളിപ്പറമ്പ് റോഡിൽ പെരുവംപറമ്പിനും ഇടയിൽ വളപട്ടണം പുഴയുടെ ഭാഗമായ ബാവലിപ്പുഴയിലാണ് അകംതുരത്ത്. പഴശ്ശി ജലസേചനവകുപ്പിന് കീഴിൽ പദ്ധതിക്കായി അക്വയർ ചെയ്ത 15 ഏക്കറോളം വരുന്ന ഭൂമി ജൈവവൈവിധ്യങ്ങളാൽ സമ്പുഷ്ടമാണ്. സസ്യസമ്പത്തിനൊപ്പം ദേശാടനക്കിളികളടക്കമുള്ള പക്ഷികളുടെയും ആയിരക്കണക്കിന് വവ്വാലുകളുടെയും ആവാസകേന്ദ്രം കൂടിയാണ്. പഴശ്ശി പദ്ധതിയും പെരുമ്പറമ്പ് ഇക്കോ പാർക്കും പടിയൂർ ഇക്കോ ടൂറിസം പദ്ധതിയും വള്ള്യാട്ടെ നഗരവനം പദ്ധതിയും യാഥാർഥ്യമായതോടെ അകംതുരുത്ത് ദ്വീപിന് വലിയ സാധ്യതയാണ് കൈവന്നിരിക്കുന്നത്.

നൂറുകണക്കിന് തെങ്ങിൻതോപ്പുകളുള്ള പ്രദേശം പത്തുവർഷം മുൻപുവരെ പഴശ്ശി ജലസേചന വിഭാഗത്തിന് നല്ലൊരു വരുമാനമേഖലകൂടിയായിരുന്നു. ആരും ശ്രദ്ധിക്കാതായതോടെ തെങ്ങുകളെല്ലാം നശിച്ചു. കൂറ്റൻ മരങ്ങൾ ഇടതൂർന്ന് നില്ക്കുന്ന പ്രദേശം പക്ഷി-ജന്തുജീവജാലങ്ങൾക്കും സുരക്ഷിത താവളമാണ്.

നടക്കാതെ പോയ ടൂറിസം സാധ്യതകൾ

കെ.പി. നൂറുദ്ദീൻ വനം മന്ത്രിയായിരുന്നപ്പോൾ ഇവിടെ ഇക്കോ ടൂറിസം പദ്ധതി കൊണ്ടുവരുന്നതിന്‌ ശ്രമം തുടങ്ങിയിരുന്നു. പിന്നീട് കെ.കെ. ശൈലജ എം.എൽ.എ. ആയപ്പോഴും പദ്ധതി പരിഗണനയിലുണ്ടായിരുന്നെങ്കിലും ഇതൊന്നും ഫലം കണ്ടില്ല. ദ്വീപിനെ ടൂറിസം ഭൂപടത്തിൽ എത്തിക്കുന്നതിനുള്ള നടപടികൾ ഹരിത കേരള മിഷനും നടത്തിയെങ്കിലും പച്ചതൊട്ടിട്ടില്ല. പച്ചപ്പും കുളിരും നഷ്ടപ്പെടാതെ ദ്വീപിനെ പുറംലോകത്തിന് തനത് രീതിയിൽ പരിചയപ്പെടുത്താനുള്ള പദ്ധതിയാണ് ഉണ്ടാകേണ്ടത്. ദ്വീപിന് ചുറ്റുമുള്ള പച്ചമുളക്കൂട്ടങ്ങളും വടവൃക്ഷങ്ങളും അപൂർവയിനം സസ്യസമ്പത്തും സംരക്ഷിച്ചുക്കൊണ്ട് പ്രകൃതിക്ക് കോട്ടം തട്ടാത്ത വിധത്തിൽ ദ്വീപിലേക്ക് നടപ്പാലവും നടവഴിയും ഒരുക്കി പ്രകൃതിനിരീക്ഷകർക്കും വിദ്യാർഥികൾക്കും പഠനത്തിനും കാഴ്ചയ്ക്കുമുള്ള സാധ്യതകൾ പ്രയോജനപ്പെടുത്താനുള്ള നടപടികളാണ് വേണ്ടത്.