മണ്ണാര്‍ക്കാട്: വിനോദയാത്രകള്‍ക്ക് പുതിയ അവസരമൊരുക്കുന്ന കെ.എസ്.ആര്‍.ടി.സി. ബജറ്റ് ടൂറിസം സെല്ലിന്റെ ഭാഗമായി മണ്ണാര്‍ക്കാട് ഡിപ്പോയില്‍നിന്നും സര്‍വീസുകള്‍ തുടങ്ങുന്നു. ഡിസംബറിലെ ശനി, ഞായര്‍ ദിവസങ്ങളിലാണ് വിനോദസഞ്ചാര കേന്ദ്രങ്ങളിലേക്കുള്ള സര്‍വീസുകള്‍ നടത്തുക. നെല്ലിയാമ്പതി, ആലപ്പുഴ, മലക്കപ്പാറ, മറയൂര്‍ എന്നിവിടങ്ങളിലേക്ക് ചുരുങ്ങിയചെലവിലുള്ള യാത്രയ്ക്കാണ് ഇതോടെ അവസരമൊരുങ്ങുന്നത്.

കാടും മലയും പുഴകളും കായലുമെല്ലാം ഈ യാത്രയില്‍ ആസ്വദിക്കാം. ഒന്ന്, രണ്ട് ദിവസങ്ങളിലൊതുങ്ങുന്ന യാത്രകളാണ് ആസൂത്രണം ചെയ്തിട്ടുള്ളത്. ഇതിന്റെ ഭാഗമായുള്ള ‘ടൂര്‍ ഡയറി’ പുറത്തിറക്കി. ഡിസംബര്‍ ഒന്ന്, എട്ട്, 14, 22, 28 തുടങ്ങിയ ദിവസങ്ങളിലാണ് ഇവിടെനിന്നും യാത്രകളുണ്ടായിരിക്കുക.

ഒന്ന്, എട്ട് തീയതികളില്‍ നെല്ലിയാമ്പതിയിലേക്കാണ് യാത്ര. രാവിലെ ആറിന് ഡിപ്പോയില്‍നിന്ന് പുറപ്പെടും. സീതാര്‍കുണ്ട്, കേശവന്‍പാറ, വരട്ടുമല, പോത്തുണ്ടി ഡാം എന്നിവിടങ്ങള്‍ സന്ദര്‍ശിച്ച് രാത്രി എട്ടിന് മണ്ണാര്‍ക്കാട്ട് തിരിച്ചെത്തും. ഒരാള്‍ക്ക് 590 രൂപയാണ് വരുന്നത്. 14-നാണ് ആലപ്പുഴയാത്ര. വേഗ ഹൗസ് ബോട്ട് സവാരിയുള്‍പ്പെടെ ആസ്വദിക്കാം. 1,040 രൂപയാണ് വരുന്നത്. പുലര്‍ച്ചെ നാലിന് ബസ് പുറപ്പെടും. രാത്രി 10-ന് തിരിച്ചെത്തും.

22-നാണ് മലക്കപ്പാറ യാത്ര. അതിരപ്പള്ളി, വാഴച്ചാല്‍, ഷോളയാര്‍ ഡാം എന്നിവിടങ്ങള്‍ സന്ദര്‍ശിക്കാം. 970 രൂപയാണ് ഈടാക്കുന്നത്. പുലര്‍ച്ചെ അഞ്ചിന് പുറപ്പെടും. രാത്രി 10-ന് തിരിച്ചെത്തും.

മറയൂരിലേക്ക് രണ്ടുദിവസത്തെ യാത്രയാണ് ക്രമീകരിച്ചിരിക്കുന്നത്. 28-ന് രാത്രി 10-ന് പുറപ്പെട്ട് 29-ന് രാത്രി മടങ്ങിയെത്തും. 1,880 രൂപയാണ് വേണ്ടത്. ജീപ്പ് സഫാരിയും ഉച്ചഭക്ഷണവും ഇതിലുള്‍പ്പെടുമെന്ന് ടൂറിസം സെല്‍ അധികൃതര്‍ അറിയിച്ചു. അഞ്ചുവയസ്സിന് താഴെയുള്ള കുട്ടികള്‍ക്ക് ടിക്കറ്റെടുക്കേണ്ടതില്ല. 40 സീറ്റുള്ള ഓര്‍ഡിനറിയും 50 സീറ്റുകളുള്ള ഫാസ്റ്റ് പാസഞ്ചര്‍ ബസുകളാണ് ഉപയോഗിക്കുക.

വരുമാനംകുറഞ്ഞ ബസുകള്‍ ടൂറിസത്തിന്

അതേസമയം, ഡിപ്പോയില്‍ ആവശ്യത്തിന് ബസുകളില്ലാത്ത പ്രതിസന്ധികൂടി തരണം ചെയ്യേണ്ടതുണ്ടെന്നും അധികൃതര്‍ പറഞ്ഞു. ജെല്ലിപ്പാറ-മൂലഗംഗലിലേക്കുള്ള ഓര്‍ഡിനറി സര്‍വീസ് ഞായറാഴ്ച റദ്ദാക്കിയാണ് നെല്ലിയാമ്പതിയിലേക്ക് പോകാന്‍ ഉപയോഗിക്കുക. മറ്റ് ഡിപ്പോകളില്‍നിന്ന് ഫാസ്റ്റ് പാസഞ്ചര്‍ ബസ് ലഭ്യമായില്ലെങ്കില്‍ ഡിപ്പോയിലെ വരുമാനംകുറഞ്ഞ, ഞായറാഴ്ചകളിലെ മറ്റ് ഫാസ്റ്റ് പാസഞ്ചര്‍ സര്‍വീസ് റദ്ദാക്കി ദീര്‍ഘദൂര വിനോദയാത്ര നടത്തുമെന്നും അധികൃതര്‍ പറഞ്ഞു. ശിരുവാണി, ഊട്ടിയടക്കം കൂടുതല്‍ ടൂര്‍പാക്കേജുകള്‍ തുടങ്ങാനും പദ്ധതിയുണ്ട്. ഫോണ്‍: 9446353081, 8075347381, 04924 225150.

കൊല്ലം: റേഷൻ കാർഡുകൾ മുൻഗണനാ വിഭാഗത്തിലേക്ക് മാറ്റുന്നതിന് അക്ഷയകേന്ദ്രം, ഓൺലൈൻ സേവനങ്ങൾ മുഖേന അപേക്ഷ സ്വീകരിച്ചു തുടങ്ങി.അർഹരായ ഒട്ടേറെ കുടുംബങ്ങൾ ഇനിയും പട്ടികയിൽ ഇടംനേടിയിട്ടില്ല. അതേസമയം, അനർഹർ ആനുകൂല്യങ്ങൾ കൈപ്പറ്റുന്നെന്നും ജനപ്രതിനിധികളും ഉദ്യോഗസ്ഥരും വെളിപ്പെടുത്തുന്നു.2009-ലെ ബി.പി.എൽ.പട്ടികയിലുൾപ്പെട്ട സാക്ഷ്യപത്രം, 2009-ലെ ബി.പി.എൽ.പട്ടികയിലുൾപ്പെടാത്ത കുടുംബങ്ങൾ മുൻഗണനാ വിഭാഗത്തിലേക്ക് അർഹരാണെന്ന തദേശസ്ഥാപന സെക്രട്ടറിയുടെ സാക്ഷ്യപത്രം, വീടില്ലാത്തവർ പഞ്ചായത്ത്/ നഗരസഭാ സെക്രട്ടറിയുടെ സാക്ഷ്യപത്രം, സ്ഥലമില്ലാത്തവർ വില്ലേജ് ഓഫീസറുടെ സാക്ഷ്യപത്രം, വരുമാന സർട്ടിഫിക്കറ്റ്, വീടിന്റെ വിസ്തീർണം കാണിക്കുന്ന സർട്ടിഫിക്കറ്റ്, നികുതിച്ചീട്ട് പകർപ്പ്, ഗുരുതര രോഗങ്ങളുള്ളവർ ഡോക്ടറുടെ സാക്ഷ്യപത്രം, പരമ്പരാഗത തൊഴിൽചെയ്തു ജീവിക്കുന്നവർ ബന്ധപ്പെട്ട അധികാരികളുടെ സാക്ഷ്യപത്രം എന്നിവ സഹിതം ഡിസംബർ 10 വരെയാണ് അപേക്ഷ സമർപ്പിക്കേണ്ടത്.

ഇവർക്ക് അപേക്ഷിക്കാനാകില്ല

റേഷൻ കാർഡിലെ ഏതെങ്കിലും അംഗം സർക്കാർ അല്ലെങ്കിൽ പൊതുമേഖലാ ജീവനക്കാരൻ, ആദായനികുതിദായകൻ, സർവീസ് പെൻഷണർ, 1000-ൽ കൂടുതൽ ചതുരശ്രയടിയുള്ള വീടിന്റെ ഉടമ, നാലോ അധികമോ ചക്രവാഹന ഉടമ, പ്രൊഫഷണൽസ്‌ (ഡോക്ടർ, എൻജിനിയർ, അഭിഭാഷകൻ തുടങ്ങിയവർ), കാർഡിലെ എല്ലാ അംഗങ്ങൾക്കുംകൂടി ഒരേക്കർ സ്ഥലമുള്ളവർ (എസ്.ടി.വിഭാഗം ഒഴികെ), 25000 രൂപയിൽ കൂടുതൽ പ്രതിമാസ വരുമാനമുള്ളവർ

വേണം സാക്ഷ്യപത്രങ്ങൾ…

* തദേശസ്ഥാപന സെക്രട്ടറി ഒപ്പിട്ട വീടിന്റെ വിസ്തീർണം തെളിയിക്കുന്ന സർട്ടിഫിക്കറ്റ്

* വാടകവീടാണെങ്കിൽ അതിന്റെ കരാർപത്രം (200 രൂപ മുദ്രപത്രത്തിൽ രണ്ടു സാക്ഷികളുടെ ഒപ്പുസഹിതം) വാടകയ്ക്കെന്നു തെളിയിക്കുന്ന രേഖകൾ.

* 2009-ലെ ബി.പി.എൽ. സർവേ പട്ടികയിലെ അംഗമാണെങ്കിലും അല്ലെങ്കിലും ബി.പി.എൽ.കാർഡിന് അർഹനാണെന്ന് പഞ്ചായത്ത് സെക്രട്ടറിയുടെ സാക്ഷ്യപത്രം

* മാരക രോഗങ്ങളുണ്ടെങ്കിൽ അതിന്റെ മെഡിക്കൽ സർട്ടിഫിക്കറ്റ് / അംഗപരിമിത സർട്ടിഫിക്കറ്റ്

* സർക്കാർ പദ്ധതി മുഖേന ലഭിച്ച വീടാണെങ്കിൽ അതിന്റെ സർട്ടിഫിക്കറ്റ്

* 21 വയസ്സ്‌ പൂർത്തീകരിച്ച പുരുഷൻമാരില്ലാത്ത നിരാലംബരായ വിധവകളാണെങ്കിൽ നോൺ റീമാരേജ് സർട്ടിഫിക്കറ്റ്.

* സ്വന്തമായി വീടോ സ്ഥലമോ ഇല്ലാത്തവർ ബന്ധപ്പെട്ട ഓഫീസറുടെ സാക്ഷ്യപത്രം (വീട് ഇല്ലാത്തവർ പഞ്ചായത്ത് സെക്രട്ടറിയുടെയും സ്ഥലമില്ലാത്തവർ വില്ലേജ് ഓഫീസറുടെയും)

* വില്ലേജിൽനിന്നുള്ള വരുമാന സർട്ടിഫിക്കറ്റ്

ഇവിടെ സ്വീകരിക്കില്ല

മുൻഗണനാവിഭാഗത്തിൽ ഉൾപ്പെടുത്താനുള്ള അപേക്ഷകൾ കളക്ടർ, ജില്ലാ സപ്ലൈ ഓഫീസ്, താലൂക്ക് സപ്ലൈ ഓഫീസ് എന്നിവിടങ്ങളിൽ സ്വീകരിക്കില്ല.

കൊട്ടാരക്കര: താലൂക്ക് ഓഫീസിലെ ക്രമക്കേടുകൾ സംബന്ധിച്ച അന്വേഷണത്തിന്റെയും നടപടികളുടെയും തുടർച്ചയായി ഒരാളൊഴികെ എല്ലാ ഡെപ്യൂട്ടി തഹസിൽദാർമാരെയും സ്ഥലം മാറ്റി. റവന്യു പ്രിൻസിപ്പൽ സെക്രട്ടറിയുടെ ശുപാർശ അനുസരിച്ച് ഡെപ്യൂട്ടി തഹസിൽദാർമാരായ ജി.അജേഷ്, റെജി കെ.ജോർജ്, ആർ.ഷിജു, സരിത ചന്ദ്രൻ എന്നിവരെ പത്തനാപുരം താലൂക്കിലേക്ക് സ്ഥലം മാറ്റിക്കൊണ്ട് ലാൻഡ് റവന്യു കമ്മിഷണർ ഉത്തരവിറക്കി. ഇവരെ പൊതുജനസമ്പർക്കം കുറഞ്ഞ ഓഫീസുകളിലോ സെക്‌ഷനുകളിലോ മാത്രമേ നിയമിക്കാവൂ എന്ന പരാമർശത്തോടെയാണ് ഉത്തരവ്.

ഭിന്നശേഷിക്കാരനായതിനാൽ ഡെപ്യൂട്ടി തഹസിൽദാർ അജിമോനെ സ്ഥലംമാറ്റത്തിൽനിന്ന്‌ ഒഴിവാക്കി. കൈക്കൂലി ആരോപണത്തിൽ കുടുങ്ങിയ തഹസിൽദാർ എം.കെ.അജികുമാർ, ഡെപ്യൂട്ടി തഹസിൽദാർ വി.അനിൽകുമാർ, ഡ്രൈവർ ടി.മനോജ് എന്നിവരെ മുൻപുതന്നെ സർവീസിൽനിന്ന്‌ സസ്പെൻഡ് ചെയ്യുകയും താത്കാലിക ഡ്രൈവർ ആർ.മനോജ്കുമാറിനെ പിരിച്ചുവിടുകയും ചെയ്തിരുന്നു.

വ്യാപക കൈക്കൂലി എന്ന പരാതിയെ തുടർന്ന്‌ കഴിഞ്ഞ മേയ് 30-നാണ് റവന്യു വകുപ്പ് അണ്ടർ സെക്രട്ടറി കൊട്ടാരക്കര താലൂക്ക്‌ ഓഫീസിൽ രഹസ്യപരിശോധന നടത്തിയത്. പാറ ക്വാറിക്ക് അനുമതി തേടാനെന്ന വ്യാജേന എത്തിയ മേലധികാരിയെ തിരിച്ചറിയാതെ കൈക്കൂലി ആവശ്യപ്പെട്ട ഉദ്യോഗസ്ഥർ കുടുങ്ങുകയായിരുന്നു.

തുടർന്ന് റവന്യു വിജിലൻസ് നടത്തിയ അന്വേഷണത്തിലും സമാനമായ ക്രമക്കേടുകൾ കണ്ടെത്തി. റവന്യു വകുപ്പ് അഡീഷണൽ സെക്രട്ടറി ജെ.ബിജുവിന്റെ നേതൃത്വത്തിൽ കഴിഞ്ഞ ജൂലായിൽ വിശദമായ പരിശോധനയും മൊഴിയെടുപ്പും നടത്തുകയും കുറ്റാരോപിതരായി കണ്ടെത്തിയവർക്കെതിരേ നടപടി ശുപാർശ റിപ്പോർട്ട് നൽകുകയുമായിരുന്നു.

എന്നാൽ കുറ്റാരോപിതരിൽനിന്ന്‌ വിശദീകരണം തേടാതെയും കൃത്യമായ തെളിവുകളില്ലാതെയും കേട്ടുകേൾവിയുടെ അടിസ്ഥാനത്തിലും മാത്രമുള്ളതാണ് നടപടിയെന്ന ആരോപണവും ഉയരുന്നുണ്ട്.

ഗുരുതരമായ കണ്ടെത്തലുകളാണ് അന്വേഷണസംഘത്തിന്റെ റിപ്പോർട്ടിലുള്ളതെങ്കിലും കൈക്കൂലി ആരോപണത്തിന് കൃത്യമായ തെളിവുകളില്ലെന്ന് റിപ്പോർട്ടിൽതന്നെ പറയുന്നു. പല ജീവനക്കാരുടെയും മൊഴികളാണ് കൈക്കൂലി ആരോപണത്തെ സാധൂകരിക്കുന്നത്. താലൂക്ക് ഓഫീസ് റവന്യു ഇന്റലിജൻസിന്റെ നിരന്തര നിരീക്ഷണത്തിലാക്കുക, ഫയലുകൾ തീർപ്പാക്കാൻ അദാലത്ത് നടത്തുക തുടങ്ങിയ നിർദേശങ്ങളും റവന്യു അഡീഷണൽ സെക്രട്ടറിയുടെ റിപ്പോർട്ടിൽ ഉണ്ടായിരുന്നു.

നടപടിക്കു കാരണമായ പ്രധാന കണ്ടെത്തലുകൾ

* പാറ, ചെളി ഖനനത്തിന് അനുമതി തേടിയുള്ള ഫയലുകളിലും പരാതികളിലും യഥാസമയം നടപടിയെടുക്കുന്നില്ല

* 2008 മുതലുള്ള ആയിരത്തിയെണ്ണൂറോളം പരാതികൾ തീർപ്പാകാതെ കിടക്കുന്നു

* സർവേ അപേക്ഷകളിൽ മുൻഗണനാക്രമം തെറ്റിക്കുന്നു, 2013 മുതലുള്ള 900 ഫയലുകൾ കെട്ടിക്കിടക്കുന്നു ‌

* സ്ഥിരം ഡ്രൈവറെ ഒഴിവാക്കി താത്കാലിക ഡ്രൈവറുമായി ഖനനകേന്ദ്രങ്ങളിലും മണ്ണെടുപ്പുകേന്ദ്രങ്ങളിലും പരിശോധന നടത്തുന്നു

* ചട്ടവിരുദ്ധമായി വാഹന ഉപയോഗം

* ഖനനക്കാരുടെ ഇടനിലക്കാരനായി താത്കാലിക ഡ്രൈവർ പ്രവർത്തിച്ചു

* അനധികൃത ഖനനം നടത്തിയതിന് വലിയ തുക പിഴയീടാക്കാൻ ഹൈക്കോടതി ഉത്തരവിട്ട കേസിൽ ക്വാറിക്ക്‌ അനുകൂലമായി താലൂക്ക് സർവെയറിൽനിന്ന്‌ തഹസിൽദാർ വിശദീകരണം തേടി

* അനധികൃത ഖനനം സംബന്ധിച്ച് കുളക്കട സ്വദേശി നൽകിയ പരാതിയുടെ തീയതി തിരുത്തി മേലധികാരികൾക്കു സമർപ്പിച്ചു

* ഡ്രൈവറുടെ മുറിയിൽ ചില ഡെപ്യൂട്ടി തഹസിൽദാർമാർ ഉൾപ്പെടെ പങ്കെടുക്കുന്ന മദ്യസത്കാരങ്ങൾ നടക്കുന്നു

* പാറ ക്വാറിയും ഖനന മാഫിയുമായി ബന്ധപ്പെട്ട കോക്കസ് താലൂക്ക്‌ ഓഫീസ് കേന്ദ്രമായി പ്രവർത്തിക്കുന്നു.