തിരുവനന്തപുരം: ഫയര്‍മാന്‍ ട്രെയിനി, ഫയര്‍മാന്‍ (ഡ്രൈവര്‍) ട്രെയിനി ഉള്‍പ്പെടെ 40 തസ്തികകളിലേക്ക് പുതിയ വിജ്ഞാപനം പ്രസിദ്ധീകരിക്കാന്‍ പി.എസ്.സി. യോഗം അനുമതി നല്‍കി. ഡിസംബര്‍ 16-ന്റെ ഗസറ്റില്‍ പ്രസിദ്ധീകരിക്കും. അതിനുശേഷം ഓണ്‍ലൈനില്‍ അപേക്ഷിക്കാം. 2025 ജനുവരി 15 വരെ അപേക്ഷ സ്വീകരിക്കും.മെഡിക്കല്‍ കോളേജുകളില്‍ സ്റ്റാഫ് നഴ്സ്, ജൂനിയര്‍ പബ്ലിക് ഹെല്‍ത്ത് നഴ്സ്, ഭൂജല വകുപ്പില്‍ അസിസ്റ്റന്റ് എന്‍ജിനിയര്‍, ജൂനിയര്‍ ജിയോഫിസിസിസ്റ്റ് തുടങ്ങിയവയും വിജ്ഞാപനങ്ങളുടെ കൂട്ടത്തിലുണ്ട്. ജില്ലാതലത്തില്‍ ഹൈസ്‌കൂള്‍ ടീച്ചര്‍ (സംസ്‌കൃതം) വിജ്ഞാപനവും പ്രസിദ്ധീകരിക്കും.കേരള ബാങ്കില്‍ ക്ലര്‍ക്ക്/കാഷ്യര്‍, ഓഫീസ് അറ്റന്‍ഡന്റ് തസ്തികകള്‍ക്ക് സാധ്യതാപട്ടിക തയ്യാറാക്കാനും യോഗം നിര്‍ദേശിച്ചു. മെഡിക്കല്‍ കോളേജില്‍ തിയേറ്റര്‍ ടെക്നീഷ്യന്‍, ഹൗസിങ് ബോര്‍ഡില്‍ അസിസ്റ്റന്റ് തസ്തികകള്‍ക്കും സാധ്യതാ പട്ടിക തയ്യാറാക്കും. വ്യവസായവാണിജ്യ വകുപ്പില്‍ അസിസ്റ്റന്റ് ഡയറക്ടര്‍ക്ക് ചുരുക്കപ്പട്ടികയും കൃഷിവകുപ്പില്‍ മെക്കാനിക്കിന് റാങ്ക്പട്ടികയും പ്രസിദ്ധീകരിക്കാനും യോഗം നിര്‍ദേശിച്ചു.

കേരളത്തില്‍ കുട്ടികള്‍ക്കെതിരായ ലൈംഗികാതിക്രമങ്ങള്‍ കുതിച്ചുയരുന്നു. സ്കൂളുകളിലും വീടുകളിലും പോലും കൊച്ചു കുട്ടികള്‍ സുരക്ഷിതരല്ലെന്ന റിപ്പോർട്ട് പുറത്ത് വിട്ട് കേരള സർക്കാർ.കേരള സംസ്ഥാന ബാലാവകാശ സംരക്ഷണ കമ്മീഷൻ അടുത്തിടെ പുറത്തിറക്കിയ റിപ്പോർട്ട് അനുസരിച്ച്‌, ഇത്തരം കേസുകളില്‍ 21 ശതമാനം കുട്ടികളുടെ വീടുകളിലും നാല് ശതമാനം സ്കൂളുകളിലും ആണ് റിപ്പോർട്ട് ചെയ്യപ്പെട്ടിട്ടുള്ളത് എന്നാണ് ഞെട്ടിക്കുന്ന വാർത്ത.’ലൈംഗിക കുറ്റകൃത്യങ്ങളില്‍ നിന്ന് കുട്ടികളെ സംരക്ഷിക്കല്‍ (പോക്‌സോ) നിയമത്തിന് കീഴിലുള്ള 4,663 കേസുകളില്‍ 988 (21 ശതമാനം) സംഭവങ്ങള്‍ കുട്ടികളുടെ വീടുകളിലും 725 (15 ശതമാനം) പ്രതികളുടെ വീടുകളിലും 935 (20 ശതമാനം) പൊതുസ്ഥലങ്ങളിലും വച്ചാണ് നടക്കുന്നത്. റിപ്പോർട്ട് വ്യക്തമാക്കുന്നു.

173 കേസുകളില്‍ സ്‌കൂളുകളിലും 139 എണ്ണം വാഹനങ്ങളിലും 146 എണ്ണം മറ്റ് സ്ഥലങ്ങളിലും 166 സംഭവങ്ങള്‍ ഒറ്റപ്പെട്ട പ്രദേശങ്ങളിലുമായി നടന്നതായും റിപ്പോർട്ടില്‍ ചൂണ്ടിക്കാട്ടുന്നു.2023ല്‍ കേരളത്തില്‍ ആകെ 4663 പോക്‌സോ കേസുകളാണ് റിപ്പോർട്ട് ചെയ്തത്.പോലീസ് കണക്കുകള്‍ പ്രകാരം തിരുവനന്തപുരത്താണ് ഏറ്റവും കൂടുതല്‍ കേസുകള്‍ രേഖപ്പെടുത്തിയത്, പത്തനംതിട്ട ജില്ലയിലാണ് ഏറ്റവും കുറവ്.ഈ വർഷം റിപ്പോർട്ട് ചെയ്യപ്പെട്ട 4,663 പോക്‌സോ കേസുകളില്‍, 4,701 കുട്ടികള്‍ അതിജീവിച്ചവരാണ്, ഇത് പല കേസുകളിലും ഒന്നില്‍ കൂടുതല്‍ ഇരകള്‍ ഉള്‍പ്പെട്ടിട്ടുണ്ടെന്ന് സൂചിപ്പിക്കുന്നു.’പോക്‌സോ നിയമത്തെക്കുറിച്ചും ശിശുസൗഹൃദ നടപടിക്രമങ്ങളെക്കുറിച്ചും കുട്ടികളെ ബോധവത്കരിക്കേണ്ടതിൻ്റെ ആവശ്യകതയും അവർക്ക് സ്വയം പ്രതിരോധ പരിശീലനം നല്‍കേണ്ടതിൻ്റെ ആവശ്യകതയും ഇത് എടുത്തുകാണിക്കുന്നു,’ റിപ്പോർട്ട് പറയുന്നു.

കോഴിക്കോട്: നഗരത്തിലെ ലോഡ്ജ്മുറിയില്‍ യുവതിയെ മരിച്ചനിലയില്‍ കണ്ടെത്തി. മലപ്പുറം വെട്ടത്തൂര്‍ പട്ടിക്കാട് സ്വദേശി ഫസീലയെയാണ് ചൊവ്വാഴ്ച എരഞ്ഞിപ്പാലത്തെ ലോഡ്ജില്‍ മരിച്ചനിലയില്‍ കണ്ടെത്തിയത്. യുവതിക്കൊപ്പം താമസിച്ചിരുന്ന അബ്ദുള്‍ സനൂഫ് എന്നയാളെ തിങ്കളാഴ്ച രാത്രി മുതല്‍ കാണാതായിട്ടുണ്ട്. സംഭവത്തില്‍ പോലീസ് അന്വേഷണം ആരംഭിച്ചു.24-ാം തീയതി രാത്രി 11 മണിയോടെയാണ് യുവാവും യുവതിയും ലോഡ്ജില്‍ മുറിയെടുത്തത്. കഴിഞ്ഞദിവസം രാത്രി പത്തുമണിയോടെ മുറിയില്‍നിന്ന് പുറത്തുപോയ യുവാവ് പിന്നീട് തിരികെ എത്തിയില്ലെന്നാണ് വിവരം. തുടര്‍ന്ന് നടത്തിയ പരിശോധനയിലാണ് മുറിയില്‍ യുവതിയെ മരിച്ചനിലയില്‍ കണ്ടത്.മുറിയില്‍ നിന്ന് ആധാര്‍ കാര്‍ഡ്, റേഷന്‍ കാര്‍ഡ് തുടങ്ങിയ രേഖകള്‍ പോലീസ് കണ്ടെടുത്തു. നടക്കാവ് പോലീസാണ് സംഭവത്തില്‍ കേസെടുത്ത് അന്വേഷണം നടത്തുന്നത്.