ഇരിട്ടി: ഇരിട്ടിയിലെ പരാഗ് ടെക്സ്റ്റയില്‍സില്‍ മോഷണം നടത്തിയ പ്രതി പിടിയിൽ. തിരുവനന്തപുരം കാരക്കോണം സ്വദേശി കാട്ടവിഴ പുത്തന്‍വീട്ടില്‍ ദാസനാണ് (61) ഇരിട്ടി പോലീസിന്റെ പിടിയിലായത്. കോഴിക്കോട് കൊയിലാണ്ടിയില്‍ വച്ചാണ് ഇയാള്‍ പോലീസിന്റെ പിടിയിലാവുന്നത്.അവിടെയും ഇയാള്‍ ഒരു മോഷണ ശ്രമം നടത്തിയിരുന്നുവത്രെ. കഴിഞ്ഞ മാസം 17 നാണ് ഇരിട്ടി വണ്‍വേ റോഡിലുള്ള പരാഗ് ടെക്സ്റ്റയില്‍സിന്റെ പുറകു വശത്തെ എക്‌സോസ്റ്റ് ഫാന്‍ ഇളക്കിമാറ്റി അകത്തു കടന്ന് ബാഗില്‍ സൂക്ഷിച്ച രണ്ടര ലക്ഷം രൂപ കവര്‍ന്നത്.

പോലീസ് അന്വേഷണത്തില്‍ സി.സി.ടി വി ദൃശ്യങ്ങങ്ങള്‍ പരിശോധിച്ചപ്പോള്‍ മോഷ്ടാവിനെ തിരിച്ചറിയാന്‍ സാധിച്ചതിന്റെ അടിസ്ഥാനത്തില്‍  നടത്തിയ അന്വേഷണത്തിലാണ് മോഷ്ടാവിനെ പിടികൂടാന്‍ സാധിച്ചത്. നേരത്തേയും ഇയാള്‍ ഇരിട്ടിയില്‍ മോഷണം നടത്തിയിരുന്നു.ഇരിട്ടി പോലീസ് ഇന്‍സ്‌പെക്ടര്‍ എ. കുട്ടികൃഷ്ണന്റെ നേതൃത്വത്തില്‍ എസ്.ഐ ഷറഫുദ്ദീന്‍, സി.പി.ഒമാരായ പ്രബീഷ്, ഷിജോയ്, സുകേഷ്, ബിജു, ജയദേവന്‍ എന്നിവരടങ്ങുന്ന സംഘമാണ് മോഷ്ടാവിനെ പിടികൂടിയത്. ഇന്ന് കോടതിയില്‍ ഹാജരാക്കും.

ആറളം : ജീവകാരുണ്യ പ്രവർത്തനങ്ങൾക്ക് കരുത്തായി ആറളം ചാരിറ്റബിൾ ട്രസ്റ്റിന്റെ കീഴിൽ ആംബുലൻസ് നാടിന് സമർപ്പിച്ചു. ആറളം, പുഴക്കര ദേശങ്ങളുടെ ചിരകാല സ്വപ്നമായ ആംബുലൻസ് സമർപ്പണം നാസർ പൊയ്‌ലന്റെ അധ്യക്ഷതയിൽ ഉസ്താദ് നവാസ് മന്നാനി പനവൂർ ഉത്ഘാടനം നിർവ്വഹിച്ചു.സംസ്കാരിക സമ്മേളനം കെ. വേലായുധൻ (പ്രസിഡന്റ് ഇരിട്ടി ബ്ലോക്ക്‌ പഞ്ചായത്ത്‌ )ഉത്ഘാടനം ചെയ്തു.തുടർന്ന് നടത്തിയ സമ്മാന ദാനം അബൂബക്കർ ചെറിയ കോയ തങ്ങൾ നിർവഹിച്ചു.പിറ്റേന്ന് നടത്തിയ സാംസ്‌കാരിക സമ്മേളനം യഹിയ ബാഖവി പുഴക്കര ഉത്ഘാടനം ചെയ്തു. ശേഷം സി.എ ദാരിമി മാപ്പാട്ടുകരയുടെ നേതൃത്വത്തിൽ ഇസ്ലാമിക കഥാ പ്രസംഗവും നടത്തി .

മാണ്ഡ്യ : മൈസൂരു-ബെംഗളൂരു റൂട്ടിലെ നള്ള കട്ടയിൽ മലയാളികൾ സഞ്ചരിച്ച കാറിൽ കർണാടക ആർ.ടി.സി. ബസ് ഇടിച്ച് ഒരാൾ മരിച്ചു. കൊളക്കാട് മലയാംപടി സ്വദേശികളായ ഒരു കുടുംബ

ത്തിലെ മൂന്നുപേർക്ക് ഗുരുതരമായി പരിക്കേറ്റു. കാർ ഓടിച്ച മണിക്കടവ് ശാന്തിനഗറിലെ കണ്ടങ്കരിയിൽ കെ.ടി.ഗിരീഷ് (48) ആണ് മരിച്ചത്. ഗിരീഷിൻ്റെ സുഹൃത്തിൻ്റെ മക്കളുടെ പഠനവുമായി ബന്ധപ്പെട്ടാണ് മൈസൂരുവിലേക്ക് പോയത്. ചൊവ്വാഴ്ച രാവിലെയാണ് അപകടം. പരിക്കേറ്റവരെ ബന്ദി ഗോപാൽ ബി.ആർ.എം. മൾട്ടി സ്പെഷ്യാലിറ്റി ആസ്പത്രിയിൽ പ്രവേശിപ്പിച്ചു. ഡെയ്‌സിയാണ് ഗിരീഷിൻ്റെ ഭാര്യ. മക്കൾ : ഷോൺ, ഷാരോൺ (ഇരുവരും വിദ്യാർഥികൾ).