കണ്ണൂർ:നല്ല ‘പെട പെടക്കണ’ മീൻ ഇനി കുടുംബശ്രീ വഴിയെത്തും. മായം കലരാത്ത മത്സ്യങ്ങൾ വിൽപ്പനയ്‌ക്ക്‌ എത്തിക്കാനും കൂടുതൽ സ്ത്രീകൾക്ക് തൊഴിൽ നൽകുകയെന്ന ലക്ഷ്യത്തോടെയും മത്സ്യഫെഡുമായി സഹകരിച്ചാണ്‌ പദ്ധതി നടപ്പാക്കുന്നത്‌.അന്യസംസ്ഥാനങ്ങളിൽനിന്നെത്തുന്നതും മായം കലർന്നതുമായ മത്സ്യങ്ങളുടെ വരവ്‌ കൂടുമ്പോൾ നല്ല മത്സ്യം ജനങ്ങൾക്ക്‌ കിട്ടാതാകും. ഇതിനൊരു പരിഹാരവുമായാണ്‌ മത്സ്യഫെഡ്‌ കുടുംബശ്രീയുമായി കൈകോർത്ത്‌ പുതിയ സംരംഭം തുടങ്ങുന്നത്‌. ഒരു വാർഡിൽ ഒരു സ്ഥലം എന്ന രീതിയിൽ മത്സ്യവിപണനകേന്ദ്രം ആരംഭിക്കും.

വ്യക്തിഗതമായും സംഘമായും സംരംഭം തുടങ്ങാം. രജിസ്റ്റർ ചെയ്ത സംരംഭകർക്ക് മത്സ്യം ഹാർബറിൽനിന്ന്‌ മത്സ്യഫെഡ്‌ എത്തിക്കും. മത്സ്യ വിപണനം നടത്താൻ ഇരുചക്ര വാഹനം വാങ്ങുന്നതിന്‌ 70,000 രൂപ കുടുംബശ്രീ വായ്പ അനുവദിക്കും. കൂടാതെ എംപ്ലോയ്‌മെന്റ് എക്സ്ചേഞ്ച് ശരണ്യ, കൈവല്യ, കേസ്‌റൂ, നവജീവൻ എന്നീ പദ്ധതികളിൽനിന്ന്‌ സഹായം ലഭ്യമാക്കുമെന്നും കുടുംബശ്രീ ജില്ലാ മിഷൻ കോ-–-ഓഡിനേറ്റർ എം വി ജയൻ പറഞ്ഞു.
ആദ്യ ഘട്ടമെന്ന നിലയിൽ ഒരു വാർഡിൽ ഒരു മത്സ്യ വിപണന കേന്ദ്രവും തുടർന്ന് കൂടുതൽ കേന്ദ്രങ്ങൾ തുടങ്ങാനുമാണ് ലക്ഷ്യം. കുടുംബശ്രീ ഹോം ഷോപ്പ് ഓണർമാരായി മുച്ചക്ര സ്കൂട്ടർ ഉള്ള ഭിന്നശേഷിക്കാർക്ക് പ്രത്യേക പരിഗണന ലഭിക്കും. സംരംഭം തുടങ്ങാൻ താൽപര്യമുള്ളവർ അവരുടെ വാർഡിലെ സിഡിഎസ് ചെയർപേഴ്‌സണുമായി ബന്ധപ്പെടണം.

കണ്ണൂർ: റവന്യൂ ജില്ലാ സ്‌കൂൾ കലോത്സവം നവംബർ 19 മുതൽ 23 വരെ പയ്യന്നൂരിൽ നടക്കും. നവംബർ 19 ന് വൈകുന്നേരം നാലിന് രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. ടിഐ മധുസൂദനൻ എം.എൽ.എ അധ്യക്ഷനാകും.നവംബർ 18ന് രാവിലെ 11 മുതൽ രജിസ്ട്രേഷൻ നടപടികൾ ആരംഭിക്കും. ആദ്യദിവസം തന്നെ വേദികൾ ഉണരും. 16 വേദികളിലായി 319 ഇനങ്ങളിൽ മത്സരങ്ങൾ നടക്കും. 15 ഉപജില്ലകളിലെ 10,695 കുട്ടികൾ മാറ്റുരയ്ക്കും. രചനാ മത്സരങ്ങൾ ഒന്നാം ദിവസം സമാപിക്കും. 249 ജനറൽ ഇനങ്ങളുണ്ടാവും. സംസ്‌കൃതം കലോത്സവത്തിന് 38 ഇനങ്ങളും അറബിക് കലോത്സവത്തിൽ 32 ഇനങ്ങളും ഉണ്ടാകും.

യുപി, എച്ച്എസ്, എച്ച്എസ്എസ് വിഭാഗങ്ങളിൽ ഏറ്റവും കൂടുതൽ പോയിന്റ് ലഭിക്കുന്ന ഉപജില്ലകൾക്ക് ഓവറോൾ റോളിങ് ട്രോഫി നല്കും. ഓവറോൾ ഒന്ന്, രണ്ട് സ്ഥാനം ലഭിക്കുന്ന ഉപജില്ലകൾക്ക് റോളിങ്ങ് ട്രോഫി നൽകും. സംസ്‌കൃതം, അറബിക് കലോത്സവത്തിൽ കൂടുതൽ പോയിന്റ് ലഭിക്കുന്ന ഉപജില്ലകൾക്ക് റോളിങ് ട്രോഫി നൽകും. എല്ലാ വിഭാഗത്തിലെയും പോയിന്റ് കണക്കിലെടുത്ത് ഏറ്റവും കൂടുതൽ പോയിന്റുള്ള സ്‌കൂളിന് റോളിങ് ട്രോഫി ലഭിക്കും.23 ന് വൈകീട്ട് സമാപന സമ്മേളനം നിയമസഭാ സ്പീക്കർ അഡ്വ എ.എൻ ഷംസീർ ഉദ്ഘാടനം ചെയ്യും. ടിഐ മധുസൂദനൻ എം.എൽ.എ അധ്യക്ഷനാകും.

കണ്ണൂർ: ജില്ലാ പഞ്ചായത്തിന്റെ സ്‌മൈൽ 2024 പദ്ധതിയുടെ ഭാഗമായി പഠന സഹായികളുടെ പ്രകാശനവും ഹയർ സെക്കണ്ടറി പരീക്ഷയിൽ നൂറ് ശതമാനം വിജയം നേടിയ വിദ്യാർഥികൾക്കുള്ള അനുമോദനവും നവംബർ 18ന് ഉച്ചയ്ക്ക് രണ്ടിന് ജില്ലാ പഞ്ചായത്ത് ഓഡിറ്റോറിയത്തിൽ നടക്കും. ജില്ലാ പഞ്ചായത്ത് പ്രസിഡന്റ് അഡ്വ. കെ.കെ രത്‌നകുമാരി ഉദ്ഘാടനം ചെയ്യും. വൈസ് പ്രസിഡന്റ് അഡ്വ. ബിനോയ് കുര്യൻ അധ്യക്ഷത വഹിക്കും.