കണിച്ചാർ: മാടായി ഗ്രാമപഞ്ചായത്തിലെ ആറാം വാർഡ് മാടായി-സ്ത്രീ സംവരണം, കണിച്ചാർ ഗ്രാമപഞ്ചായത്തിലെ ആറാം വാർഡ് ചെങ്ങോം-പട്ടികവർഗ സംവരണം എന്നിവിടങ്ങളിൽ ഡിസംബർ പത്തിന് ഉപതിരഞ്ഞെടുപ്പ് നടക്കും. തിരഞ്ഞെടുപ്പ് പെരുമാറ്റച്ചട്ടം നവംബർ 14ന് നിലവിൽ വന്നു. നാമനിർദേശ പത്രിക സമർപ്പിക്കാനുള്ള അവസാന തീയ്യതി നവംബർ 22. സൂക്ഷ്മ പരിശോധന നവംബർ 23. പിൻവലിക്കാനുള്ള അവസാന തീയ്യതി നവംബർ 25. വോട്ടെണ്ണൽ ഡിസംബർ 11നാണ്.ഉപതിരഞ്ഞെടുപ്പ് സംബന്ധിച്ച യോഗം ജില്ലാ തിരഞ്ഞെടുപ്പ് ഓഫീസറായ ജില്ലാ കലക്ടർ അരുൺ കെ വിജയന്റെ അധ്യക്ഷതയിൽ ചേർന്നു. ഇലക്ഷൻ ഡെപ്യൂട്ടി കലക്ടർ കെ.കെ. ബിനി, വരണാധികാരികൾ, ഉപവരണാധികാരികൾ തുടങ്ങിയവർ പങ്കെടുത്തു.

തലശേരി: തലശേരി കടൽപ്പാലത്തിന്‌ മുകളിലൂടെ സുന്ദരകാഴ്‌ചകൾ ആസ്വദിച്ച്‌ ഇനി യാത്രചെയ്യാം. തലശേരി പൈതൃക ടൂറിസം പദ്ധതി മൂന്നാംഘട്ടത്തിൽ കടൽപ്പാലത്തിന്‌ മുകളിൽ ആകാശപാതയാണ്‌ ഒരുങ്ങുന്നത്‌. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന കിഫ്‌ബി ബോർഡ്‌ യോഗം 29.75 കോടി രൂപയുടെ പദ്ധതിക്ക്‌ ധനാനുമതി നൽകി. തലശേരിയുടെ സ്വപ്‌നപദ്ധതികളിലൊന്നാണ്‌ ഇതിലൂടെ യാഥാർഥ്യമാകുന്നത്‌.
കരയിൽ നിന്ന് തുടങ്ങി കടൽപ്പാലംചുറ്റി അർധവൃത്താകൃതിയിലാകും ആകാശപാത. ദീപാലങ്കാരങ്ങൾകൂടിയാവുന്നതോടെ കാഴ്‌ചയുടെ പുത്തനനുഭവമാകും. പദ്ധതിരൂപരേഖ തയ്യാറാക്കാനും മറ്റുമായി കിഫ്ബി, കിഡ്ക് (കെ.ഐ.ഐ.ഡി.സി) ഉദ്യോഗസ്ഥരും സാങ്കേതികവിദഗ്ധരും തലശേരി കടൽപ്പാലത്തിലെത്തി പരിശോധന നടത്തിയിരുന്നു.
തലശേരി കടൽപ്പലവും പരിസരവും ഇതിനകം പ്രധാന ടൂറിസം ഹബ്ബായികഴിഞ്ഞു. സായാഹ്നങ്ങളിൽനൂറുകണക്കിനാളുകളാണ്‌ ഇവിടെ വിശ്രമിക്കാനെത്തുന്നത്‌. ആഘോഷവേളകളിലും അവധിദിനങ്ങളിലും ഇവിടെ ഉത്സവാന്തരീക്ഷമാണ്‌.

ടൂറിസം സർക്യൂട്ടായി വളരും

തലശേരിയുടെ വിനോദസഞ്ചാര വികസനത്തിൽ നിർണായക ചുവടുവയ്‌പാകും ആകാശപാത. തലശേരി – -മാഹി ബൈപ്പാസ്‌ തുറന്നതോടെ വ്യാപാര മാന്ദ്യംനേരിടുന്ന നഗരത്തിലേക്ക്‌ കൂടുതൽ ആളുകളെ ആകർഷിക്കാൻ ഇതിലൂടെ സാധിക്കും. ചിത്രത്തെരുവും പിയർറോഡും പെർഫോമിങ്‌ കേന്ദ്രമായ ഫയർടാങ്ക്‌ കുളവും എല്ലാം ചേരുന്നതാണ്‌ കടൽപ്പാലം പരിസരം. ചരിത്രം സ്‌പന്ദിക്കുന്ന ജവഹർഘട്ടും സെന്റ് ആംഗ്ലിക്കൻ ചർച്ചും തലശേരി കോട്ടയും ഓവർബറീസ് ഫോളിയും ഹെർമൻ ഗുണ്ടർട്ട് മ്യൂസിയവും ഉൾപ്പെടുന്ന തലശേരി ടൂറിസം സർക്യൂട്ടിലെ പ്രധാന കേന്ദ്രമായി ആകാശപാത വരുന്നതോടെ കടൽപ്പാലംമാറും.
തലശേരിയുടെ രുചിവൈവിധ്യത്തിന്റെ കേന്ദ്രംകൂടിയാണിവിടം. പാണ്ടികശാലകൾ പലതും കടകളായി. അതിവേഗം വളരുന്ന തലശേരിയുടെ വികസനത്തിലെ നിർണായക ചുവടുവയ്‌പാണ്‌ ആകാശപാത. ഇതോടെ തലശേരിയുടെ തലപ്പൊക്കം ഇനിയുമേറും.

ഇരിട്ടി:പെരുമ്പറമ്പിലെ ജനവാസമേഖലയിൽ രണ്ടാം ദിവസവും കാട്ടുപന്നിക്കൂട്ടമെത്തി വ്യാപകമായി കൃഷി നശിപ്പിച്ചു. മാതോളി ശ്രീനിവാസൻ, മന്നമ്പേത്ത് പ്രമോദ്കുമാർ എന്നിവരുടെ കൃഷിയിടത്തിലെ കപ്പ, ചേന, ചേമ്പ്, കൂവ എന്നിവ കഴിഞ്ഞ രാത്രിയിൽ തകർത്തു. തിങ്കൾ രാത്രിയിലും കാട്ടുപന്നികളിറങ്ങി ജോണി യോയാക്കിന്റെ 200 നേന്ത്രവാഴകളും കപ്പയും നശിപ്പിച്ചിരുന്നു.മാതോളി ശ്രീനിവാസൻ കൃഷിയിടത്തിന്ചുറ്റും സാരിവിരിച്ച്‌ തീർത്ത വേലിയും തകർത്താണ്‌ വിളവെടുപ്പിന് പാകമായ കപ്പയും കൂവയും ചേമ്പും നശിപ്പിച്ചത്‌. പ്രമോദ്കുമാറിന്റെ വീട്ടുപറമ്പിലെ ചേനയും ചേമ്പുമാണ്‌ നശിപ്പിച്ചത്‌. വനംവകുപ്പ് അധികൃതർ സ്ഥലം സന്ദർശിച്ചു. ഫോറസ്റ്റർ സുനിൽകുമാർ ചെന്നപ്പൊയിൽ, ബീറ്റ് ഫോറസ്റ്റർ ഈടൻ രാജേഷ് എന്നിവരുടെ നേതൃത്വത്തിൽ കൃഷിനഷ്ടം വിലയിരുത്തി. വനമേഖലയിൽനിന്ന്‌ കിലോമീറ്ററോളം അകലെയുള്ള ജനവാസ മേഖലയാണ് കാട്ടുപന്നികൾ താവളമാക്കിയത്‌. പന്നികളെ വെടിവച്ചുകൊല്ലാൻ നടപടി സ്വീകരിക്കുമെന്ന് പഞ്ചായത്ത് പ്രസിഡന്റ് പി രജനി പറഞ്ഞു.