മട്ടന്നൂർ: ഗൂഗിൾപേ വഴി പണം കൈപ്പറ്റി മയക്കുമരുന്ന് വിതരണം ചെയ്യുന്ന സംഘത്തിലെ പ്രധാനിയെ മട്ടന്നൂർ എസ്.ഐ എ. നിതിന്റെ നേതൃത്വത്തിൽ അറസ്റ്റ് ചെയ്തു. കണ്ണൂക്കര കൊയിലാണ്ടി ഹൗസിൽ കെ. അക്ഷയ് (29) ആണ് പിടിയിലായത്. നിരവധി ക്രിമിനൽ കേസിൽ പ്രതിയാണ് ഇയാളെന്ന് പൊലീസ് പറഞ്ഞു.

കഴിഞ്ഞ 23ന് രാത്രി എം.ഡി.എം.എ സഹിതം രണ്ടുപേരെ പിടികൂടിയിരുന്നു. പേരാവൂർ മുരിങ്ങോടി പെരുമ്പന്ന കടുത്ത നമ്പിയോട്ടെ വാണിയങ്കണ്ടി ഹൗസിൽ വി.കെ. മുഹമ്മദ് അഫ്സൽ (27), താണ കണ്ണൂക്കര വെസ്റ്റ് തൂക്കിലെ പി. നംറിൻ (27) എന്നിവരാണ് പിടിയിലായത്. ഇവരുടെ ഫോൺ പരിശോധിച്ചപ്പോഴാണ് അക്ഷയെക്കുറിച്ച് സൂചന ലഭിച്ചത്. അക്ഷയ്ക്ക് 5000 രൂപ ഗൂഗിൾപേ വഴി അയച്ചാണ് എം.ഡി.എം.എ കൈപ്പറ്റിയതെന്ന് ഇവർ വ്യക്തമാക്കിയിരുന്നു.

നിരവധി പേർക്ക് ഇയാൾ മയക്കുമരുന്ന് വിതരണം ചെയ്യുന്നതായി വ്യക്തമായിട്ടുണ്ട്. ഇയാളെ കോടതി റിമാന്‍റ് ചെയ്തു. അളവ് അനുസരിച്ച് തുക ഇടപാടുകാരോട് പറയുകയും പൈസ കിട്ടിയാൽ എം.ഡി.എം.എ എത്തിച്ചു കൊടുക്കുകയുമാണ് പതിവ്. പെരിങ്ങോത്ത് കാമുകിയുടെ പിതാവിനെ വെട്ടിക്കൊല്ലാൻ ശ്രമിച്ച കേസിലെ പ്രതിയാണ് അക്ഷയ്.

മട്ടന്നൂര്‍:കഥകള്‍, കവിതകള്‍, ചിത്രങ്ങള്‍, ഓര്‍മക്കുറിപ്പുകള്‍.. ഇങ്ങനെ നീളുന്നു മട്ടന്നൂര്‍ നഗരസഭയിലെ അങ്കണവാടി കുരുന്നുകളും അധ്യാപകരും ചേര്‍ന്ന് തയ്യാറാക്കിയ കുഞ്ഞെഴുത്തുകളുടെ പട്ടിക. താളുകള്‍ മറിയുന്തോറും വായനക്കാരെ ബാല്യകാല ഓര്‍മകളിലേക്ക് കൈപിടിച്ച് കൊണ്ടുപോകും ഈ കൈയെഴുത്ത് പ്രതി. നഗരസഭയിലെ 43 അങ്കണവാടികള്‍ തയാറാക്കിയ 43 കൈയെഴുത്ത് മാസികകളാണ് ഒറ്റദിവസം പ്രകാശിപ്പിച്ചത്. ഐ.സി.ഡി.എസിന്റെ അമ്പതാം വാര്‍ഷികാഘോഷത്തിന്റെ ഭാഗമായാണ് മട്ടന്നൂര്‍ ഐ.സി.ഡി.എസ് ഇത്തരമൊരു ആശയമവുമായി മുന്നോട്ടുവന്നത്. കുരുന്നുകളും അധ്യാപകരും രക്ഷിതാക്കളും നാട്ടുകാരും ഒരുമിച്ചപ്പോള്‍ പിറന്നതോ.. സര്‍ഗാത്മക കഴിവുകളുടെ വസന്തം.കുട്ടികളുടെ ശാരീരിക, മാനസിക, ബൗദ്ധിക വികാസത്തിന് ഊന്നൽ നൽകുക, കൈയെഴുത്ത് പ്രോത്സാഹിപ്പിക്കുക, മറ്റ് സർഗാത്മക കഴിവുകൾ പ്രോത്സാഹിപ്പിക്കുക, കുട്ടികൾക്ക് പ്രാവീണ്യമുള്ള മേഖലകളിൽ കൂടുതൽ അവസരങ്ങളൊരുക്കുക, മാനസിക സമ്മർദം ലഘൂകരിക്കുക തുടങ്ങിയ ലക്ഷ്യവുമായാണ് നഗരസഭ ഇത്തരമൊരു പദ്ധതി ആവിഷ്കരിച്ചത്. നാട്ടുകാരുടെ സഹായത്തോടെ അങ്കണവാടികളുടെ ചരിത്രവും അടയാളപ്പെടുത്തിയിട്ടുണ്ട്. ഇങ്ങനെ ഓര്‍മകളുടെ മധുരം നുകരുന്ന നൂറോളം താളുകളാണ് മാസികയിലുള്ളത്.
മികച്ച കൈയെഴുത്ത് മാസിക തെരഞ്ഞെടുക്കാനുള്ള മത്സരത്തിൽ പെരിഞ്ചേരി അങ്കണവാടി ഒന്നാംസ്ഥാനവും വെമ്പടി അങ്കണവാടി രണ്ടാംസ്ഥാനവും നേടി. നഗരസഭാ ചെയർമാൻ എൻ.ഷാജിത്ത് ഉദ്ഘാടനംചെയ്തു. വൈസ് ചെയര്‍മാന്‍ ഒ പ്രീത അധ്യക്ഷയായി. ബാലസാഹിത്യകാരൻ പയ്യന്നൂർ കുഞ്ഞിരാമൻ കൈയെഴുത്ത് മാസിക പ്രകാശിപ്പിച്ചു.ഷീന എം കണ്ടത്തിൽ മുഖ്യഭാഷണം നടത്തി. സ്ഥിരംസമിതി അധ്യക്ഷരായ വി.കെ സുഗതൻ, പി. ശ്രീനാഥ്, പി അനിത, പി. പ്രസീന, ഐ.സി.ഡി.എസ് സൂപ്പർവൈസർ ദീപാ തോമസ്, വിജയകുമാർ പരിയാരം, മനോജ്കുമാർ പഴശ്ശി, ശിവപ്രസാദ് പെരിയച്ചൂർ തുടങ്ങിയവർ സംസാരിച്ചു. അനുശ്രീ പുന്നാടിന്റെ നാടൻപാട്ടുകളും കലാപരിപാടികളുമുണ്ടായി.

മട്ടന്നൂർ :കണ്ണൂര്‍ രാജ്യാന്തര വിമാനത്താവളത്തില്‍ നിന്ന് കെ.എസ്.ആര്‍.ടി.സി. ബസ് സർവീസ് ആരംഭിച്ചു. കിയാല്‍ മാനേജിംഗ് ഡയറക്ടര്‍ സി. ദിനേശ് കുമാര്‍ഫ്‌ളാഗ് ഓഫ് ചെയ്തു.എല്ലാ ദിവസവും രാവിലെ 5.40ന് മട്ടന്നൂരില്‍ നിന്നും ആരംഭിച്ച് 5.50 ന് വിമാനത്താവളത്തില്‍ എത്തിച്ചേരും. 6.20ന് വിമാനത്താവളത്തില്‍ നിന്ന് പുറപ്പെട്ട് ഇരിട്ടിയിലേക്ക് പോകും.പിന്നീട് ഉച്ചയ്ക്ക് കണ്ണൂരില്‍ നിന്ന് 12.15ന് പുറപ്പെട്ട് മട്ടന്നൂര്‍ വഴി 1.40 ന് വിമാനത്താവളത്തില്‍ എത്തുകയും തിരിച്ച് 2.15ന് വിമാനത്താവളത്തില്‍ നിന്ന് പുറപ്പെടുന്ന ബസ്സ് 3 മണിക്ക് ഇരിട്ടിയില്‍ എത്തും.രാത്രി 8.50 ന് ഇരിട്ടിയില്‍ നിന്ന് പുറപ്പെടും 9.35ന് വിമാനത്താവളത്തില്‍ എത്തും. തിരിച്ച് 10.15 ന് വിമാനത്താവളത്തില്‍ നിന്ന് മട്ടന്നൂരിലേക്ക് സര്‍വ്വീസ് നടത്തും.കണ്ണൂര്‍ എയര്‍പോര്‍ട്ടിലേക്കുളള യാത്രാക്ലേശം മനസ്സിലാക്കിയതിന്റെ അടിസ്ഥാനത്തില്‍ ഗതാഗത വകുപ്പ് മന്ത്രി കെ.ബി ഗണേഷ് കുമാര്‍ നേരിട്ട് നല്‍കിയ നിര്‍ദ്ദേശത്തിന്റെ അടിസ്ഥാനത്തിലാണ് ബസ്സ് സര്‍വ്വീസ് ആരംഭിച്ചത്.