കാക്കയങ്ങാട്:ഈ വര്‍ഷത്തെ കണ്ണൂര്‍ യൂണിവേഴ്‌സിറ്റി എന്‍.എസ്.എസ് ബെസ്റ്റ് യൂണിറ്റ് , ബെസ്റ്റ് പ്രോഗ്രാം ഓഫീസര്‍ അവാര്‍ഡുകള്‍ എടത്തൊട്ടി ഡീപോള്‍ ആര്‍ട്‌സ് ആന്‍ഡ് സയന്‍സ് കോളേജ് കരസ്ഥമാക്കി.ബെസ്റ്റ് എന്‍.എസ്.എസ് പ്രോഗ്രാം ഓഫീസര്‍ ആയി ജെസ്സി രാജേഷ് (അസിസ്റ്റന്റ് പ്രൊഫസര്‍),ബെസ്റ്റ് യൂണിറ്റ് ആയി എന്‍.എസ്.എസ് യൂണിറ്റ് നമ്പര്‍ 41 ും തിരഞ്ഞെടുക്കപ്പെട്ടു.വര്‍ഷങ്ങളായി എന്‍.എസ്.എസ് യൂണിറ്റിന്റെ നേതൃത്വത്തില്‍ നടത്തി വരുന്ന ഹൗസിംഗ് പ്രോജക്ട്, സ്‌നേഹപാഥേയം എന്ന ഉച്ചഭക്ഷണ വിതരണം , പച്ചതുരുത്ത് ഡിജിറ്റല്‍ സര്‍വേ, ക്ലീനിംഗ് പ്രോജക്ട്, ലഹരി വിരുദ്ധ – ആരോഗ്യ ബോധവല്‍കരണ പരിപാടികള്‍ എന്നിങ്ങനെ വിദ്യാര്‍ത്ഥികളുടെ സമഗ്ര വികസനവും സമൂഹത്തിന്റെ ക്ഷേമവും ഉറപ്പുവരുത്തുന്ന അനേകം പ്രവര്‍ത്തികളാണ് കോളേജിനെ ഈ അവാര്‍ഡിന് അര്‍ഹമാക്കിയത്.മാനേജ്‌മെന്റ്, സ്റ്റാഫ്, പി ടി എ, വിദ്യാര്‍ത്ഥികള്‍ എന്നിവര്‍ പ്രോഗ്രാം ഓഫീസര്‍ ജെസ്സി രാജേഷിനേയും എന്‍.എസ്.എസ് യൂണിറ്റ് അംഗങ്ങളെയും അഭിനന്ദിച്ചു.

പേരാവൂർ : ബ്ലോക്ക് പരിധിയിൽ കേടായി കിടക്കുന്ന മുഴുവൻ കാർഷിക യന്ത്രങ്ങളും പേരാവൂർ കൃഷിശ്രീ സെന്റർ ഓഫീസ് പരിസരത്ത് സംസ്ഥാന കാർഷിക യന്ത്രവത്കരണ മിഷൻ ഒരുക്കുന്ന കേന്ദ്രീകൃത ക്യാമ്പിൽ അറ്റകുറ്റപ്പണി തീർത്തു നൽകുന്നു. ടാക്ടർ, ടില്ലർ പോലുള്ള കാർഷിക യന്ത്രങ്ങൾ തൽസ്ഥലത്ത് ചെന്ന് പരിശോധിച്ച് അറ്റകുറ്റപ്പണി ചെയ്തു നൽകുന്നു. അറ്റകുറ്റപ്പണി സൗജന്യമാണ്. സ്‌പെയർ പാർട്‌സുകളുടെ ചിലവ് യന്ത്ര ഉടമ വഹിക്കണം. 18 വരെ ക്യാമ്പ് പ്രവർത്തിക്കും. ഫോൺ. 6238619945, 9544432984.

പേരാവൂർ : രക്താർബുദം ബാധിച്ച് മജ്ജ മാറ്റിവെക്കൽ ശസ്ത്രക്രിയക്ക് കോടിയേരി കാൻസർ സെന്ററിൽ പ്രവേശിപ്പിച്ച പേരാവൂർ പുതുശേരിയിലെ ഫിദ ഷെറിന് (20) ജീവിതത്തിലേക്ക് തിരിച്ചെത്താൻ സുമനസുകളുടെ സഹായം വേണം.25 ലക്ഷം രൂപ ചികിത്സാ ചിലവ് വരുന്ന ശസ്ത്രക്രിയക്ക് പണം കണ്ടെത്താൻ നിർധന കുടുബത്തിന് സാധ്യമല്ലാത്ത സ്ഥിതിയാണ്.

ഫിദ ഷെറിന്റെ ചികിത്സക്കായി സണ്ണി ജോസഫ് എം.എൽ.എയും പേരാവൂർ ബ്ലോക്ക് പ്രസിഡന്റ് കെ.സുധാകരൻ ഉൾപ്പെടെയുള്ള ജനപ്രതിനിധികളും രക്ഷാധികാരികളായി ചികിത്സ കമ്മറ്റി രൂപവത്കരിച്ചിട്ടുണ്ട്. കാനറാ ബാങ്ക് പേരാവൂർ ശാഖയിലെ 110208643800 എന്ന അക്കൗണ്ടിലോ (ഐ.എഫ്.എസ്.സി CNRB0014221) , 7012291508 ഗൂഗിൾ പേ നമ്പറിലോ സഹായമെത്തിക്കാം.