പേരാവൂർ : ചെറുകിട വ്യാപാരികളെ നേരിട്ട് ബാധിക്കുന്ന കെട്ടിട വാടക ഇനത്തിലെ ജി.എസ്.ടി പ്രശ്നം വ്യാപാരികളെ സംരക്ഷിക്കുന്ന തരത്തിൽ പുനർ ക്രമീകരിക്കണമെന്ന് ഭാരതീയ വ്യാപാരി വ്യവസായി സംഘം (ബി.വി.വി.എസ് ) ഇരിട്ടി താലൂക്ക് കൺവെൻഷൻ ആവശ്യപ്പെട്ടു.ഓൺലൈൻ വ്യാപാരങ്ങൾക്ക് നിയന്ത്രണം വരുത്തി ഗ്രാമീണ , ചെറുകിട വ്യാപാര രംഗത്ത് നിലനിൽക്കുന്ന മാന്ദ്യത്തിന് പരിഹാരം കണ്ടെത്തണമെന്നും കൺവെൻഷൻ ആവശ്യപ്പെട്ടു. പേരാവൂരിൽ നടന്ന കൺവെൻഷൻ ജില്ലാ പ്രസിഡന്റ് പി.എസ്.പ്രകാശ് ഉദ്ഘാടനം ചെയ്തു. ജനറൽ സെക്രട്ടറി ഇ.പി.സുമേഷ്, ബാലകൃഷ്ണൻ, എ. സുമേഷ്, രതീശൻ ഗായത്രി എന്നിവർ സംസാരിച്ചു.

പേരാവൂർ: പല ക്രഷറുകളും പൂട്ടിയിട്ടതിനാൽ അനുദിനം കൂടുന്ന ക്രഷർ ഉത്പന്നങ്ങളുടെ വില സ്ഥിരപ്പെടുത്താൻ സർക്കാർ ഇടപെടണമെന്ന് കൺസ്ട്രക്ഷൻ വർക്കേഴ്‌സ് ആൻഡ് സൂപ്പർവൈസേഴ്‌സ് അസോസിയേഷൻ പേരാവൂർ മേഖലാ സമ്മേളനം ആവശ്യപ്പെട്ടു. വീടുകൾക്ക് നമ്പർ ലഭിക്കാൻ ഭീമമായ ലേബർ സെസ് കൂടി അടക്കണമെന്ന വ്യവസ്ഥ പുന:പരിശോധിക്കണമെന്നും സി.ഡബ്ല്യു.എസ്.എ ആവശ്യപ്പെട്ടു.സംസ്ഥാന കമ്മിറ്റിയംഗം കെ.വി.സതീശൻ ഉദ്ഘാടനം ചെയ്തു. മേഖലാ പ്രസിഡന്റ് കെ.ദിവാകരൻ അധ്യക്ഷനായി. കെ.ജെ.ഷാജൻ, എ.പ്രദീപൻ, യു.മധു, ഇ.ചന്ദ്രൻ, എം.വി.ഗംഗാധരൻ, പി.ഗിരീഷ് കുമാർ, പ്രവീൺ കുമാർ, കെ.കെ.ഷാജി, കെ.ജെ.റൈജു എന്നിവർ സംസാരിച്ചു.ഭാരവാഹികൾ: കെ.ജെ.ഷാജൻ (പ്രസി.), പി.സന്തോഷ്, ശ്രീനി (വൈസ്.പ്രസി.), എ.പ്രദീപൻ (സെക്ര.), ഷിജൊ ജേക്കബ്, സി.പ്രകാശൻ (ജോ.സെക്ര.), കെ.ജെ.ഷാജി (ഖജാ.).

പേരാവൂർ: സി.പി.എം പേരാവൂർ ഏരിയക്ക് കീഴിലെ ലോക്കൽ കമ്മിറ്റികളുടെ സമ്മേളനം പൂർത്തിയായി. ഇതിൽ അഞ്ച് ലോക്കൽ കമ്മിറ്റികളിൽ ഔദ്യോഗിക പാനലിനെതിരെ മത്സരം നടന്നു.ചിലയിടങ്ങളിൽ ഔദ്യോഗിക പാനലിലുള്ളവർ തോറ്റപ്പോൾ ചിലയിടങ്ങളിൽ പാനലിനെതിരെ മത്സരിച്ചവരും തോറ്റു.

പേരാവൂർ ഏരിയാ കമ്മിറ്റിക്ക് കീഴിൽ കൊട്ടിയൂർ, കേളകം, അടക്കാത്തോട്, കണിച്ചാർ, കൊളക്കാട്, മണത്തണ, പേരാവൂർ, കാക്കയങ്ങാട്, മുഴക്കുന്ന്, നിടുംപൊയിൽ, കോളയാട് എന്നിങ്ങനെ11 ലോക്കൽ കമ്മിറ്റികളാണുള്ളത്. ഇതിൽ കൊട്ടിയൂർ, കേളകം, അടക്കാത്തോട്, കാക്കയങ്ങാട് ലോക്കൽ കമ്മിറ്റികളിലാണ് ഔദ്യോഗിക പാനലിനെതിരെ മത്സരമുണ്ടായത്. മുഴക്കുന്ന് ലോക്കലിൽ സെക്രട്ടറി സ്ഥാനത്തേക്കും മത്സരം നടന്നു.

കൊട്ടിയൂരിൽ ഔദ്യോഗിക പാനലിൽ മത്സരിച്ച പി.വി.ഹരിലാൽ തോറ്റപ്പോൾ എതിരെ മത്സരിച്ച എമിൽ മാത്യു വിജയിച്ചു. കേളകത്ത് ഔദ്യോഗിക പാനലിലെ ബീന ഉണ്ണിയാണ് പരാജയമറിഞ്ഞത്. ഇവിടെ ജോർജ് കറുകപ്പള്ളി, രാജേഷ്, സുമേഷ് തത്തുപാറ, എൻ.ബി.ബെസ്റ്റിൻ എന്നിവർ എതിരായി മത്സരിക്കുകയും സുമേഷ് തത്തുപാറ വിജയിക്കുകയും ചെയ്തു.അടക്കാത്തോടിൽ ഔദ്യോഗിക പാനലിനെതിരെ മത്സരിച്ച തമ്പി എന്ന തോമസിന് വിജയിക്കാനായില്ല.

കാക്കയങ്ങാട് ലോക്കലിലാണ് ശക്തമായ മത്സരം നടന്നത്. നിലവിലെ ലോക്കൽ കമ്മിറ്റിയംഗങ്ങളായ ബാബു ജോസഫിനെയും എൻ.ഗംഗാധരനെയും ഔദ്യോഗിക പാനലിൽ നിന്നൊഴിവാക്കിയെങ്കിലും ഇരുവരും മത്സരിക്കുകയും ബാബു ജോസഫ് ഏറ്റവുമധികം വോട്ടുകൾ നേടി വിജയിക്കുകയും ചെയ്തു. എന്നാൽ ഗംഗാധരൻ പരാജയപ്പെട്ടു. കൂടാതെ ഔദ്യോഗിക പാനലിനെതിരെ മത്സരിച്ച കെ.രഞ്ജിത്ത്, കെ.പി.ബീന, എ.രഞ്ജിത്ത് എന്നിവരും വിജയിച്ചു. ഔദ്യോഗിക പാനലിലെ കെ.ഉണ്ണിക്കൃഷ്ണൻ, വി.വി.റാഫി, ജഗതി ബിജു എന്നിവരാണ് പരാജയമറിഞ്ഞത്.

സി.പി.എമ്മിന്റെ ഉറച്ച കോട്ടയായ മുഴക്കുന്ന് ലോക്കലിലെ ഔദ്യോഗിക പാനലിൽ സെക്രട്ടറി സ്ഥാനത്തേക്ക് പരിഗണിച്ച എൻ.സനോജിനെതിരെ മത്സരിച്ച സി.ഗോപാലനാണ് പരാജയപ്പെട്ടത്. മുൻ ലോക്കൽ സെക്രട്ടറി കൂടിയാണ് സി.ഗോപാലൻ. നവംബർ 22 മുതൽ 25 വരെ കോളയാടിലാണ് പേരാവൂർ ഏരിയാ സമ്മേളനം നടക്കുക.