തളിപ്പറമ്പ്‌:ഫ്യൂസായ എൽ.ഇ.ഡി ബൾബുകൾ ഉപേക്ഷിക്കാൻ വരട്ടെ. നല്ല ‘ചികിത്സ’ നൽകിയാൽ ഇവ വീണ്ടും പ്രകാശിപ്പിക്കാം. കുറുമാത്തൂർ പഞ്ചായത്തിലെ ഹരിതകർമസേനയാണ്‌ “കിരണം’ എൽഇഡി ബൾബ് റിപ്പയറിങ് യൂണിറ്റ്‌ തുടങ്ങിയത്‌. ഫിലമെന്റ്‌ ബൾബുകളേക്കാൾ എൽഇഡി ബൾബുകൾ ദീർഘകാലം നിൽക്കുമെങ്കിലും കേടാവുന്നതോടെ വലിച്ചെറിയുന്നവയുടെ എണ്ണം വർധിക്കുകയാണ്‌. പ്രവർത്തനക്ഷമമല്ലാതെ വരുമ്പോൾ ബൾബുകൾ ഉപേക്ഷിക്കുന്ന ശീലത്തിൽനിന്നും റിപ്പയർ ചെയ്ത് വീണ്ടും ഉപയോഗിക്കുക എന്നശീലത്തെ പ്രോത്സാഹിപ്പിക്കാനാണ്‌ യൂണിറ്റ്‌ ആരംഭിച്ചത്‌.ഹരിതകർമസേനയുടെ മൂന്നാമത്തെ സംരംഭമാണിത്‌. ഹരിത മാംഗല്യം, ഇനോക്കുലം നിർമാണ യൂണിറ്റുകൾ എന്നിവയാണ്‌ മറ്റ്‌ സംരംഭങ്ങൾ. ഹരിതകേരള മിഷനാണ്‌ ബൾബ്‌ റിപ്പയറിങ്ങിനുള്ള പരിശീലനം നൽകിയത്‌. പ്ലാസ്‌റ്റിക്‌ ശേഖരണത്തോടൊപ്പം വീടുകളിൽനിന്നും ബൾബുകൾ ശേഖരിക്കും. സാധനങ്ങളുടെയും റിപ്പയർ ചിലവുമുൾപ്പെടെ വീടുകളിൽനിന്നും വാങ്ങും.എൽഇഡി ബൾബ് റിപ്പയറിങ് യൂണിറ്റ്‌ പഞ്ചായത്ത് പ്രസിഡന്റ്‌ വി.എം സീന ഉദ്‌ഘാടനംചെയ്‌തു. സി അനിത അധ്യക്ഷയായി. ടി പി പ്രസന്ന, പി. ലക്ഷ്മണൻ, കെ ശശിധരൻ, വി. സഹദേവൻ, എൻ റീജ, എസ്‌ സ്മിത, പി. ദിവ്യ എന്നിവർ സംസാരിച്ചു.

കണ്ണൂർ: പെട്രോളിനും വിലക്കിഴിവ് ഓഫർ..! മാഹിയിൽ നിലവിലുള്ള വിലക്കുറവിന് പിന്നാലെ ജിയോ പമ്പിലാണ് പെട്രോൾ ലിറ്ററിന് മൂന്ന് രൂപ കിഴിവ് ലഭിക്കുന്നത്.ദീപാവലി ഓഫർ എന്ന പേരിൽ തിങ്കളാഴ്ച തുടങ്ങിയ ഓഫർ നവംബർ 19 വരെ നീളും. രാവിലെ പത്ത് മുതൽ വൈകിട്ട് അഞ്ച് വരെയാണ് ഹാപ്പി അവേഴ്സ് എന്ന പേരിൽ വിലക്കിഴിവ് അനുവദിക്കുന്നത്.ലിറ്ററിന് 88.87 രൂപയാണ് 3 രൂപ കിഴിവോടെയുള്ള ഇപ്പോഴത്തെ വില. ഓഫർ നിലവിൽ വന്നതിനെ തുടർന്ന് മാഹി മേഖലയിലെ ഏക ജിയോ പമ്പായ കോപ്പാലത്തെ പമ്പിൽ വാഹനങ്ങളുടെ നീണ്ട നിരയാണ്.ഫുൾ ടാങ്ക് പെട്രോളടിക്കുന്ന വലിയ വാഹനങ്ങൾക്ക് വൻതോതിലുള്ള ലാഭമാണ് പുതിയ ഓഫറിലൂടെ ലഭിക്കുക.

കണ്ണൂര്‍: കണ്ണൂര്‍ യൂണിവേഴ്‌സിറ്റി എംപ്ലോയ്‌മെന്റ് ഇന്‍ഫര്‍മേഷന്‍ ആൻ്റ് ഗൈഡന്‍സ് ബ്യൂറോ ആന്റ് മോഡല്‍ കരിയര്‍ സെന്റർ വിവിധ സ്വകാര്യ സ്ഥാപനങ്ങളിലെ ജോലി ഒഴിവുകളിലേക്ക് പ്ലേസ്‌മെന്റ് ഡ്രൈവ് നടത്തും.നവംബര്‍ രണ്ടിന് രാവിലെ പത്ത് മുതല്‍ ഒന്ന് വരെയാണ് ‘പ്രയുക്തി’ പ്ലേസ്‌മെന്റ് ഡ്രൈവ്.എച്ച് ആര്‍ അഡ്മിന്‍, എച്ച് ആര്‍ എക്‌സിക്യൂട്ടീവ്, അക്കൗണ്ടന്റ്, മള്‍ട്ടി ടെക്‌നിഷ്യന്‍, ഹൗസ് കീപ്പിംഗ് അസോസിയേറ്റ് (റൂം ബോയ്‌സ്), കുക്ക്, അക്കൗണ്ട് അസിസ്റ്റന്റ്, കാഷ്യര്‍, സെയില്‍സ് എക്‌സിക്യൂട്ടീവ്, കിച്ചണ്‍ സ്റ്റീവാര്‍ഡ് (ക്ലീനിങ്) ഇന്‍ഷ്യുറന്‍സ് ഏജന്റ്, സഹായിക് (ഫ്രീലാന്‍സിങ്) എന്നിവയിലാണ് ഒഴിവുകള്‍.എട്ടാം ക്ലാസ്, എസ് എസ് എല്‍ സി, പ്ലസ് ടു, ബിരുദം, ബി കോം, ബി കോം വിത്ത് ടാലി, ഐ. ടി. ഐ, ഐ ടി സി, ഡിപ്ലോമ യോഗ്യത ഉള്ളവർ അന്നേ ദിവസം രാവിലെ 9.30ന് കണ്ണൂര്‍ താവക്കര സെന്‍ട്രല്‍ ലൈബ്രറിയില്‍ പ്രവര്‍ത്തിക്കുന്ന യൂണിവേഴ്‌സിറ്റി എംപ്ലോയ്‌മെന്റ് ഇന്‍ഫര്‍മേഷന്‍ & ഗൈഡന്‍സ് ബ്യൂറോയില്‍ അസ്സല്‍ സര്‍ട്ടിഫിക്കറ്റുകളും മൂന്ന് സെറ്റ് ബയോഡാറ്റയുമായി എത്തണം.ഫോണ്‍: 04972703130.