കോളയാട് ടൗൺ സൗന്ദര്യ വത്കരണ പ്രവൃത്തി ഉദ്ഘാടനം കെ.കെ.ഷൈലജ എം.എൽ.എ നിർവഹിക്കുന്നു

കോളയാട് : മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി കോളയാട് ടൗൺ സൗന്ദര്യ വത്കരണ പ്രവൃത്തികൾ തുടങ്ങി.ടൗൺ ഭാഗത്തെ ഒരു കിലോമീറ്റർ മെക്കാഡം ടാറിങ്, പാതയോരത്ത് കൈവരികൾ, നടപ്പാതകൾക്ക് ടൈൽ പാകൽ, ദിശാ സൂചന ബോർഡുകൾ, ആവശ്യനുസരണം സീബ്ര ലൈനുകൾ, വ്യാപാരികളുടെ സഹായത്തോടെ പൂച്ചെടികൾ വെച്ചുപിടിപ്പിക്കൽ തുടങ്ങിയവയാണ് നടപ്പിലാക്കുക. പദ്ധതിക്കായി രണ്ട് കോടി രൂപയുടെ ഭരണാനുമതിയായി.

കോളയാട് ടൗണിൽ നടന്ന പ്രവൃത്തി ഉദ്ഘാടനം കെ. കെ. ഷൈലജ എം.എൽ.എ നിർവഹിച്ചു. പഞ്ചായത്ത് വൈസ് പ്രസിഡന്റ് കെ.ഇ. സുധീഷ് കുമാർ അധ്യക്ഷനായി. പേരാവൂർ ബ്ലോക്ക് പഞ്ചായത്ത്‌ സ്ഥിരം സമിതി അധ്യക്ഷൻ എ. ടി. കെ.മുഹമ്മദ്, മുൻ പഞ്ചായത്ത്‌ പ്രസിഡന്റുമാരായ കെ. പി.സുരേഷ്കുമാർ, കെ. ടി. ജോസഫ്, പഞ്ചായത്ത്‌ മെമ്പർ റോയ് പൗലോസ്, രാഷ്ട്രീയ പാർട്ടി പ്രതിനിധികളായ ഷിജിത്ത് വായന്നൂർ, സാജൻ ചെറിയാൻ, ജനാർദ്ദനൻ, വ്യാപാരി പ്രതിനിധി മനോജ്‌ പഞ്ചായത്ത്‌ അസി. സെക്രട്ടറി എ.സി.അനീഷ്, പഞ്ചായത്ത്‌ മെമ്പർ പി.സുരേഷ് എന്നിവർ സംസാരിച്ചു.

പേരാവൂർ: വാരപ്പീടിക പത്തേക്കർ വളവിൽ വെച്ച് കാട്ടുപോത്തിടിച്ച് സ്കൂട്ടർ യാത്രക്കാരനായ ടാപ്പിംഗ് തൊഴിലാളിക്ക് പരിക്കേറ്റു. നിടുംപുറംചാലിലെ വളളിയാംകുഴിയിൽ സാജു ജോസഫിനാണ് (47) പരിക്കേറ്റത്. അപകടത്തിൽ സ്കൂട്ടറിനും കേടുപാടുകളുണ്ടായി. ചിറ്റാരിപ്പറമ്പിലെ റബർ തോട്ടത്തിലേക്ക് പോകുന്ന വഴി വെള്ളിയാഴ്ച പുലർച്ചെ 4.30-ഓടെയാണ് സംഭവം. ഈ റോഡിൽ പലപ്പോഴായി കാട്ടുപോത്തുകളിറങ്ങി അപകടങ്ങളുണ്ടാവാറുണ്ട്.

കണ്ണവം: മഹല്ല് മുസ്‌ലിം ജമാഅത്ത് അൻവാറുൽ ഇസ്‌ലാം പള്ളി മദ്രസ കമ്മിറ്റി നടത്തുന്ന കണ്ണവം വെളുമ്പത്ത് മഖാം ശരീഫ് ഉറൂസ് 28, 29, 20, ഒക്ടോബർ ഒന്ന്, രണ്ട് തീയതികളിൽ നടക്കും. 28-ന് രാവിലെ 10-ന് ഉറൂസ് പരിപാടികൾക്ക് തുടക്കം കുറിച്ച് സയ്യിദ് മുഹമ്മദ് സഫ് വാൻ തങ്ങൾ പതാക ഉയർത്തും. തുടർന്ന് പാണക്കാട് സയ്യിദ് മുഈനലി ശിഹാബ് തങ്ങൾ ഉദ്ഘാടനം ചെയ്യും. ഉച്ചക്ക് രണ്ടിന് മജ്‌ലിസുന്നൂർ ആത്മീയ സദസ്സ്, 2.30-ന് ഇസ്‌ലാമിക ചരിത്ര കഥാപ്രസംഗം, രാത്രി എട്ടിന് സ്വലാത്ത് വാർഷികം എന്നിവയും ഉണ്ടാകും.

29-ന് രാവിലെ ഒൻപതിന് മതവിജ്ഞാന സദസ്. ഉച്ചക്ക് രണ്ടിന് നടക്കുന്ന സൗഹൃദ സംഗമം സ്പീക്കർ എ എൻ ഷംസീർ ഉദ്ഘാടനം ചെയ്യും. രാത്രി ഏഴിന് ദിക്ർ ദുആ മജ്‌ലിസ്. 30-ന് രാവിലെ മതവിജ്ഞാന സദസ്, ഉച്ചക്ക് രണ്ടിന് മദ്ഹുറസൂൽ പ്രഭാഷണം കേരള മുസ്‌ലിം ജമാഅത്ത് സംസ്ഥാന ജനറൽ സെക്രട്ടറി സയ്യിദ് ഖലീലുൽ ബുഖാരി കടലുണ്ടി ഉദ്ഘാടനം ചെയ്യും. അബ്ദുലത്തീഫ് സഖാഫി കാന്തപുരം മുഖ്യ പ്രഭാഷണം നടത്തും.

ഒക്ടോബർ ഒന്നിന് രാവിലെ 10-ന് നടക്കുന്ന പൊതു സമ്മേളനം സമസ്ത പ്രസിഡണ്ട് സയ്യിദ് മുഹമ്മദ് ജിഫ്രി മുത്തുകോയ തങ്ങൾ ഉദ്ഘാടനം ചെയ്യും. സമാപന ദിവസമായ രണ്ടിന് രാവിലെ 10-ന് സമാപന പ്രാർത്ഥന സദസ് സയ്യിദ് മശ്ഹൂർ അസ്‌ലം തങ്ങൾ ഉദ്ഘാടനം ചെയ്യും. കൂട്ടപ്രാർഥനക്ക് ചെറുമോത്ത് ഉസ്താദ് നേതൃത്വം നൽകും. തുടർന്ന് അന്നദാനവുൻ ഉണ്ടാകും.