കണ്ണൂർ : എട്ടാം ക്ലാസിൽ ഈ വർഷം സബ്ജക്ട് മിനിമം നടപ്പാക്കുമെന്നു മന്ത്രി വി.ശിവൻകുട്ടി പറഞ്ഞു. ദേശീയ അധ്യാപക ക്ഷേമ ഫൗണ്ടേഷന്റെ കീഴിൽ പ്രവർത്തിക്കുന്ന കണ്ണൂർ ശിക്ഷക് സദന്റെ നവീകരണം പൂർത്തിയാക്കിയതിന്റെയും പുതിയ ഹാളിന്റെയും ഉദ്ഘാടനം മന്ത്രി നിർവഹിച്ചു. അടുത്ത വർഷം 9 ാം ക്ലാസിലും അതിന്റെ അടുത്ത വർഷം 10 ാം ക്ലാസിലും സബ്ജക്ട് മിനിമം നടപ്പാക്കും. എല്ലാ അധ്യാപകരുടെയും പിന്തുണയും സഹായവും മന്ത്രി അഭ്യർഥിച്ചു. ഭിന്നശേഷി കുട്ടികളുടെ അധ്യാപകർ അവരെ സ്വന്തം മക്കളെപ്പോലെ പരിചരിക്കുന്നവരാണ്. സർക്കാർ/എയ്ഡഡ് മേഖലയിലെ ഈ അധ്യാപകർക്ക് കൂടുതൽ ആനുകൂല്യം നൽകുന്നതും സ്‌കൂളുകളിൽ കൂടുതൽ ഉപകരണങ്ങൾ നൽകുന്നതും സർക്കാരിന്റെ സജീവ പരിഗണനയിലാണെന്നും മന്ത്രി പറഞ്ഞു.

മന്ത്രി രാമചന്ദ്രൻ കടന്നപ്പള്ളി അധ്യക്ഷനായി. ദേശീയ അധ്യാപക ഫൗണ്ടേഷൻ കേരള അസി. സെക്രട്ടറി ആർ.സുനിൽകുമാർ, പി.കെ.അൻവർ, കണ്ണൂർ ജില്ലാ വിദ്യാഭ്യാസ ഉപഡയറക്ടർ കെ.എൻ.ബാബു മഹേശ്വരി പ്രസാദ്, കണ്ണൂർ റീജനൽ ഡെപ്യൂട്ടി ഡയറക്ടർ ആർ.രാജേഷ് കുമാർ, പയ്യന്നൂർ വിഎച്ച്എസ്​സി അസി. ഡയറക്ടർ ഉദയ കുമാരി, വിദ്യാകിരണം ജില്ലാ കോഓർഡിനേറ്റർ കെ.സി.സുധീർ, ദേശീയ അധ്യാപക ക്ഷേമ ഫൗണ്ടേഷൻ സംസ്ഥാന പ്രവർത്തക സമിതി അംഗം കെ.സി.സ്നേഹശ്രീ, എ.കെ.ബീന എന്നിവർ പ്രസംഗിച്ചു. ഒന്നരക്കോടി രൂപ ചെലവഴിച്ചാണ് കണ്ണൂർ ശിക്ഷക്‌ സദൻ നവീകരിച്ചത്. എയർ കണ്ടീഷൻ ചെയ്ത ഓഡിറ്റോറിയം, മിനി ഹാൾ, ഡൈനിങ് ഹാൾ, 14 ഡബിൾ റൂം, ആറ് ഡോർമിറ്ററികൾ എന്നിവയാണു സജ്ജീകരിച്ചത്. 3 നിലകളിലായാണു നിർമാണം. ലിഫ്റ്റും ഉണ്ട്.

കണ്ണൂർ : പി.പി. ദിവ്യ കണ്ണൂർ ജില്ലാ പഞ്ചായത്ത് പ്രസിഡന്റ് സ്ഥാനത്തുനിന്ന് പുറത്ത്. ദിവ്യയെ മാറ്റാൻ സി.പി.എം. തീരുമാനിച്ചതിനു പിന്നാലെ രാജിക്കത്ത് സാമൂഹിക മാധ്യമത്തിൽ ദിവ്യ പോസ്റ്റ് ചെയ്തു. പകരം കെ.കെ. രത്നകുമാരിയെ നിയോഗിക്കുമെന്ന് സി.പി.എം. കണ്ണൂർ ജില്ലാ സെക്രട്ടേറിയറ്റ് പത്രക്കുറിപ്പിൽ അറിയിച്ചു. ജില്ലാ കമ്മിറ്റി അംഗമായ ദിവ്യയെ തരംതാഴ്ത്തിയേക്കും.എ.ഡി.എം. നവീൻ ബാബുവിന്റെ ആത്മഹത്യയുമായി ബന്ധപ്പെട്ടാണ് നടപടി.

വൈകീട്ട് ജില്ലാ സെക്രട്ടേറിയറ്റ് യോഗത്തിലാണ് ദിവ്യയെ നീക്കാൻ തീരുമാനമായത്. അഴിമതിക്കെതിരായ സദുദ്ദേശ്യ വിമർശനമാണ് ജില്ലാപഞ്ചായത്ത് പ്രസിഡന്റ് നടത്തിയതെങ്കിലും യാത്രയയപ്പ് യോഗത്തിലെ ചില പരാമർശങ്ങൾ ഒഴി വാക്കേണ്ടതായിരുന്നു എന്ന നിലപാട് പാർട്ടി പത്രക്കുറിപ്പിൽ ആവർത്തിച്ചിട്ടുണ്ട്. കേസെടുത്ത് അന്വേഷണം നടക്കുന്നതിനാൽ ദിവ്യ ഒഴിവാകണമെന്ന് ജില്ലാ സെക്രട്ടേറിയറ്റ് വിലയിരുത്തിയെന്നും അത് ദിവ്യ അംഗീകരിച്ചുവെന്നും പത്രക്കുറിപ്പിൽ അറിയിച്ചു. ജില്ലാ സെക്രട്ടേറിയറ്റിലുണ്ടായ ധാരണ സംസ്ഥാന സെക്രട്ടറി എം.വി. ഗോവിന്ദനെ അറിയിച്ചിരുന്നു. സംസ്ഥാന സെക്രട്ടേറിയറ്റ് യോഗംവരെ കാത്തിരുന്ന് നടപടി വൈകിപ്പിക്കേണ്ടതില്ലെന്നായിരുന്നു സംസ്ഥാന നേതാക്കളിലുമുണ്ടായ

ആലോചന.

കണ്ണൂർ:പ്രതിസന്ധിയുടെ പടവുകൾ ചവിട്ടിക്കയറിയ ഒരു പൊതുവിദ്യാലയം ഉയിർത്തെഴുന്നേറ്റതിന്റെ കഥയാണ്‌ മാങ്ങാട്‌ എൽപി സ്‌കൂളിന്‌ പറയാനുള്ളത്‌. എന്തു വിലകൊടുത്തും നാടിന്റെ ഹൃദയമായ പൊതുവിദ്യാലയത്തെ സംരക്ഷിക്കുമെന്ന മാനേജ്‌മെന്റിന്റെയും നാടിന്റെയും നിശ്‌ചയദാർഢ്യമാണ്‌ ദേശീയപാതയ്‌ക്ക്‌ സമീപം തലയെടുപ്പോടെ നിൽക്കുന്നത്‌. പൊതുവിദ്യാഭ്യാസത്തിന്റെ മികവ്‌ കൂട്ടുന്ന പ്രവർത്തനങ്ങളുമായി സ്‌കൂളിന്റെ പുതിയകെട്ടിടം വ്യാഴാഴ്‌ച വൈകിട്ട്‌ മന്ത്രി വി ശിവൻകുട്ടി ഉദ്‌ഘാടനംചെയ്യും.
1893ൽ കളരിയായി തുടങ്ങിയ സ്ഥാപനത്തെ മാങ്ങാട്‌ അരയാലയിലെ കണ്ടമ്പേത്ത്‌ കൃഷ്‌ണൻ എഴുത്തച്ഛനാണ്‌ എഴുത്തുപള്ളിക്കൂടമാക്കിയത്‌. വിദ്യാസമ്പന്നനും ജ്യോതിഷിയുമായ എഴുത്തച്ഛൻ നരോത്ത്‌പറമ്പിൽ സ്ഥാപിച്ച വിദ്യാലയം 1930ന്‌ ശേഷമാണ്‌ ദേശീയപാതയ്ക്ക്‌ സമീപത്തേക്ക്‌ മാറിയത്‌. അദ്ദേഹത്തിന്റെ പിൻമുറക്കാരനായ സി കെ കൃഷ്‌ണൻ നമ്പ്യാരുടെ മക്കളാണ്‌ നിലവിൽ സ്‌കൂൾ മാനേജ്‌മെന്റ്‌.

2022ൽ ദേശീയപാത വികസനത്തിന്റെ ഭാഗമായി സ്‌കൂളിന്റെ സ്ഥലം ഏറ്റെടുത്തപ്പോൾ അഞ്ച്‌ ക്ലാസ്‌ മുറികൾ നഷ്‌ടമായി. സ്‌കൂൾ പ്രവർത്തനങ്ങൾ എങ്ങനെ മുന്നോട്ടുപോവുമെന്ന ആശങ്കയുയർന്നെങ്കിലും നാടിന്റെ കൂട്ടായ്‌മ തുണച്ചു. അന്നുമുതൽ മാങ്ങാട്‌ നൂറുൽ ഹിദായത്ത്‌ കമ്മിറ്റി മദ്രസയിലാണ്‌ സ്‌കൂൾ ഭാഗികമായി പ്രവർത്തിച്ചത്‌. കഴിഞ്ഞ ഒക്‌ടോബർ മുതൽ മാർച്ച്‌ 31 വരെ പൂർണമായും സ്‌കൂൾ മദ്രസയിലേക്ക്‌ മാറി.
ദേശീയപാതയ്‌ക്ക്‌ സ്ഥലം ഏറ്റെടുത്തപ്പോൾ സ്‌കൂളിലെ പ്രധാനകെട്ടിടം മാത്രമാണ്‌ ബാക്കിയായത്‌. ആ കെട്ടിടമുൾപ്പടെ പൊളിച്ച്‌ പുതിയ രണ്ടു നില കെട്ടിടം മാനേജ്‌മെന്റ്‌ നിർമിച്ചു. പ്രധാനാധ്യാപകൻ ടി ദിലീപനും വിദ്യാലയ വികസനസമിതിയുംചേർന്ന്‌ പ്രവർത്തനങ്ങൾ ഏകോപിപ്പിച്ചു. നിലവിൽ പത്തു ക്ലാസ് മുറിയും ലാബുമടങ്ങുന്ന പുതിയ കെട്ടിടത്തിലാണ്‌ പ്രവർത്തിക്കുന്നത്‌. എൽകെജി മുതൽ അഞ്ചുവരെ 160 കുട്ടികൾ പഠിക്കുന്നുണ്ട്‌.