പേരാവൂർ:തലശേരി -–-ബാവലി അന്തർസംസ്ഥാനപാതയിലെ നിടുംപൊയിൽ ചുരം റോഡ്‌ പുനർനിർമാണത്തെ പ്രതിസന്ധിയിലാക്കി വീണ്ടും മണ്ണിടിച്ചിൽ. അടിത്തറ കോൺക്രീറ്റ് ചെയ്തത് ബലപ്പെടുന്നതിന് മുന്നേയാണ് മണ്ണ് ഇടിഞ്ഞുവീണ് ലക്ഷങ്ങളുടെ നഷ്ടം ഉണ്ടായത്. കനത്തമഴയത്ത് നിർമാണം തുടങ്ങിയതിനാൽ റോഡിന്റെ ബലത്തെക്കുറിച്ച്‌ ആശങ്കയുണ്ട്‌. കൂടാതെ പ്രദേശത്തിന്റെ ഭൂമിശാസ്ത്രപരമായ ഘടനയിൽ മാറ്റം വന്നതായി വിദഗ്ധർ വിലയുരുത്തിയിട്ടുണ്ട്‌. ചുരം ഉൾപ്പെടെ പലയിടങ്ങളിലുമായി ഭൂമിയിൽ വിള്ളൽ കണ്ടെത്തിയിട്ടുമുണ്ട്.
ഏറെ പ്രാധാന്യമുള്ള റോഡ് എന്ന മുൻഗണനയിലാണ് അടിയന്തരമായി പുനർനിർമിക്കാൻ ശ്രമമാരംഭിച്ചത്. എന്നാൽ, തുടർച്ചയായ മണ്ണിടിച്ചിൽ വലിയ പ്രതിസന്ധി സൃഷ്ടിക്കുന്നു. രണ്ടാഴ്ച മുമ്പ് റോഡ് മണ്ണിടിഞ്ഞുണ്ടായ അപകടത്തിൽ തൊഴിലാളി മരിച്ചിരുന്നു. പലയിടങ്ങളിലായി ചുരത്തിൽ മൂന്ന് കിലോമീറ്ററോളം നീളത്തിൽ സോയിൽ പൈപ്പിങ് സാധ്യത നിലനിൽക്കുന്നുണ്ട്. വിശദമായ പരിശോധന വേണമെന്നാണ് വിദഗ്ധ പക്ഷം. തിങ്കളാഴ്ച രാത്രിയിലുണ്ടായ മണ്ണിടിച്ചിലിൽ സംരക്ഷണഭിത്തി നിർമിക്കാനായി കെട്ടിയ കമ്പികൾ ഉൾപ്പെടെ തകർന്നു. ലക്ഷങ്ങളുടെ നാശനഷ്ടമാണ് കണക്കാക്കുന്നത്. റോഡ്‌ ഗതാഗതം നിലച്ചതിനാൽ യാത്രക്കാർ ദുരിതത്തിലാണ്‌. അടിയന്തര നടപടിവേണമെന്ന ആവശ്യവും ഉയർന്നിട്ടുണ്ട്‌.

പേരാവൂർ: താലൂക്ക് ആസ്പത്രിയിൽ 2015-2016 കാലയളവിൽ സൂപ്രണ്ടിന്റെ അധിക ചുമതല വഹിച്ചിരുന്ന ഡോ.പി.പി.രവീന്ദ്രനെതിരെ അന്വേഷണത്തിന് വകുപ്പ് തല ഉത്തരവ്. ഇ.സി.ജി. ടെക്നീഷ്യൻ തസ്തികയിൽ യോഗ്യത ഇല്ലാത്ത വ്യക്തിക്ക് നിയമനം നൽകിയതുമായി ബന്ധപ്പെട്ട സംഭവത്തിൽ അന്വേഷണം നടത്തുന്നതിനാണ് ആരോഗ്യ വകുപ്പ് വിജിലൻസ് അഡീഷണൽ ഡയറക്ടറെ നിയമിച്ച് ഉത്തരവിറങ്ങിയത്.ഡോ.പി.പി.രവീന്ദ്രനെതിരെ കെ.എസ്.ആർ ഭാഗം (മൂന്ന്) ചട്ടം 59(ഡി ) പ്രകാരം മുൻപ് അച്ചടക്ക നടപടി ആരംഭിക്കുകയും കാരണം കാണിക്കൽ നോട്ടീസ് നൽകുകയും ചെയ്തിരുന്നു. നോട്ടീസിന് ഡോ.പി.പി.രവീന്ദ്രൻ സമർപ്പിച്ച മറുപടി തൃപ്തികരമല്ലാത്തതിനാലാണ് അച്ചടക്ക നടപടി തുടരുന്നതിന് സർക്കാർ തീരുമാനിച്ചത്. രണ്ട് മാസത്തിനുള്ളിൽ അന്വേഷണം നടത്തി റിപ്പോർട്ട് സമർപ്പിക്കണമെന്നും ആരോഗ്യ കുടുംബ ക്ഷേമ വകുപ്പ് ജോ. സെക്രട്ടറി ചിത്ര.കെ.ദിവാകരൻ നൽകിയ ഉത്തരവിൽ പറയുന്നു.

പേരാവൂർ: എം.കെ.പൂജാ സ്റ്റോർ ആൻഡ് ഓട്ടു പാത്രങ്ങളുടെ നവീകരിച്ച ഷോറൂം പ്രവർത്തനം തുടങ്ങി. പൂജാ സ്റ്റോറിന്റെ ഉദ്ഘാടനം ശ്രീകൃഷ്ണ ക്ഷേത്രം മേൽശാന്തി വി.ഐ.പുരുഷോത്തമൻ നമ്പൂതിരിയും പുതിയ കെട്ടിടത്തിന്റെ ഉദ്ഘാടനം പഞ്ചായത്ത് പ്രസിഡന്റ് പി.പി.വേണുഗോപാലനും നിർവഹിച്ചു. പഞ്ചായത്തംഗങ്ങളായ എം.ഷൈലജ ടീച്ചർ, കെ.ശരത്, ബേബി സോജ, നൂറുദ്ദീൻ മുള്ളേരിക്കൽ, ടി.രഗിലാഷ്, അഷറഫ് ചെവിടിക്കുന്ന്, ഷബി നന്ത്യത്ത്, വി.കെ.വിനേശൻ, അഡ്വ.എം.രാജൻ, കെ.ജയപ്രകാശ്, ഷിജിത്ത് വായന്നൂർ, ജോയിക്കുട്ടി, അനൂപ് നാമത്ത് എന്നിവർ സംസാരിച്ചു.