മയ്യഴി : മാഹി സെന്റ് തെരേസ ബസിലിക്കയിൽ വിശുദ്ധ അമ്മത്രേസ്യയുടെ തിരുനാൾ നാലാംദിനത്തിലേക്ക് കടന്നു. തിങ്കളാഴ്ച വൈകിട്ട് ചാന്ത രൂപത അധ്യക്ഷൻമാർ. എഫ്രേം നരിക്കുളം ബിഷപ്പിന് ഇടവക വികാരിയും കോഴിക്കോട് രൂപത വികാരി ജനറലുമായ മോൺ. ഡോ. ജൻസൺ പുത്തൻവീട്ടിലിന്റെ നേതൃത്വത്തിൽ സ്വീകരണം നൽകി. തുടർന്ന് ദിവ്യബലി, നൊവേന, പ്രദക്ഷിണം, പരിശുദ്ധ കുർബാനയുടെ ആശീർവാദം എന്നിവയുണ്ടായി. ജോൺ ഓഫ് ആർക്ക് കുടുംബ യൂണിറ്റ് അംഗങ്ങൾ സഹായികളായി. ചൊവ്വ വൈകിട്ട് 5.30ന് ജപമാല, ആറിന് ദിവ്യബലി.

മയ്യഴി:മാഹി സെന്റ്‌ തെരേസ ബസിലിക്ക ദേവാലയത്തിൽ വിശുദ്ധ അമ്മത്രേസ്യയുടെ തിരുനാൾ ആഘോഷത്തിന്‌ കൊടിയേറി. ശനിയാഴ്‌ച കോഴിക്കോട് രൂപത വികാരി ജനറൽ മോൺ. ജെൻസെൻ പുത്തൻവീട്ടിൽ കൊടി ഉയർത്തിയതിനുശേഷം തിരുസ്വരൂപം പൊതുവണക്കത്തിനായി ദേവാലയത്തിനകത്ത് പ്രതിഷ്ഠിച്ചു.
രമേശ് പറമ്പത്ത്‌ എംഎൽഎ, മുൻ മന്ത്രി ഇ വത്സരാജ്, മാഹി പൊലീസ് സൂപ്രണ്ട് ജി ശരവണൻ, സ്വാമി പ്രേമന്ദ എന്നിവർ പങ്കെടുത്തു. ദിവ്യബലിക്ക് മോൺ. ജെൻസൻ പുത്തൻവീട്ടിൽ കാർമികത്വം വഹിച്ചു. ദിവസവും വൈകിട്ട് നടക്കുന്ന ദിവ്യബലിക്കുശേഷം നൊവേന, പ്രദക്ഷിണം, പരിശുദ്ധ കുർബാനയുടെ ആശീർവാദം എന്നിവയുണ്ടാകും.
പ്രധാന തിരുനാൾ ദിനമായ 14ന് തിരുനാൾ ജാഗരത്തിൽ വൈകിട്ട് ആറിന്
ആഘോഷ ദിവ്യബലിയും നഗരപ്രദക്ഷിണവുമുണ്ടാകും.15ന് പുലർച്ചെ ഒന്നുമുതൽ രാവിലെ ആറുവരെ ശയനപ്രദക്ഷിണം. രാവിലെ 10.30ന് സാഘോഷ ദിവ്യബലിയും പകൽ മൂന്നിന്‌ മേരിമാതാ കമ്യൂണിറ്റിഹാളിൽ സ്നേഹസംഗമവും നടക്കും. സമാപന ദിവസമായ 22ന് രാവിലെ 10.30ന് ദിവ്യബലി അർപ്പിക്കും. -ഉച്ചയ്‌ക്കുശേഷം തിരുസ്വരൂപം അൾത്താരയിലേക്ക് മാറ്റുന്നതോടെ സമാപിക്കും.

എടക്കാട്:എടക്കാട്‌ ബ്ലോക്കിൽ സമ്പൂർണ പോഷക കാലിത്തീറ്റയായ സൈലേജ്‌ ഇനി സുലഭമായി ലഭിക്കും. സൈലേജ്, ടി എം ആർ (ടോട്ടൽ മിക്സഡ് റേഷൻ)നിർമാണം ഏച്ചൂർ കമാൽ പീടികയിൽ തുടങ്ങി. പച്ചപ്പുല്ലിനു ക്ഷാമമുള്ള വേനൽ കാലത്ത്‌ പശുക്കൾക്ക്‌ നൽകാവുന്ന മികച്ച തീറ്റയാണ്‌ സൈലേജ്. എടക്കാട്‌ ബ്ലോക്ക്‌ പഞ്ചായത്താണ്‌ ഇത്‌ നിർമിച്ച്‌ ക്ഷീരകർഷകർക്ക്‌ വിതരണം ചെയ്യുന്നത്‌.ഓരോ പിടി തീറ്റയിലും സമ്പൂർണ പോഷകങ്ങള്‍ ലഭിക്കുന്ന സമ്പൂര്‍ണ കാലിത്തീറ്റ പദ്ധതിയാണിത്‌. പാഴാക്കി കളയുന്ന ഗിനി,തിൻ നേപ്പിയർ പോലെയുള്ള പുല്ലുകൾ കുടുംബശ്രീ സംവിധാനത്തിലൂടെ ശേഖരിച്ച് സംസ്കരിച്ച് സൈലേജ് ആക്കി ക്ഷീര സംഘങ്ങൾ വഴി വിതരണംചെയ്യും. എടക്കാട്‌ ബ്ലോക്ക് പഞ്ചായത്ത് ഇതിനായി 10 ലക്ഷം രൂപ വകയിരുത്തി. മുണ്ടേരി ക്ഷീര സഹകരണ സംഘത്തിലെ 10 വനിതാ സംരംഭകർ ‘പവിഴം’ സൈലേജ് ജെഎൽജി ഗ്രൂപ്പ് ആരംഭിച്ചാണ് പദ്ധതി നടപ്പാക്കുന്നത്.ബ്ലോക്ക് പഞ്ചായത്ത് പ്രസിഡന്റ്‌ പി കെ പ്രമീള ഉദ്‌ഘാടനം ചെയ്‌തു. മുണ്ടേരി പഞ്ചായത്ത് പ്രസിഡന്റ്‌ എ അനീഷ അധ്യക്ഷയായി. ആദ്യ വിൽപന ക്ഷീരവികസന വകുപ്പ് ഡപ്യൂട്ടി ഡയറക്ടർ ഒ സജിനി നിർവഹിച്ചു. കുടുംബശ്രീ ജില്ലാ മിഷൻ കോ ഓഡിനേറ്റർ എം വി ജയൻ, കട്ടേരി പ്രകാശൻ, കെ പി ബാലഗോപാലൻ, എ പങ്കജാക്ഷൻ, മുംതാസ് കെ, സി എം പ്രസീത, ലാവണ്യ, ബ്ലോക്ക് പഞ്ചായത്ത് സെക്രട്ടറി കെ വി പ്രസീത, മുഹമ്മദ് അർഷദ്, മുണ്ടേരി ഗംഗാധരൻ, ലക്ഷ്മണൻ തുണ്ടിക്കോത്ത്, സി ലത, ഗീത തുടങ്ങിയവർ സംസാരിച്ചു.