അടക്കാത്തോട് : വേനലിൽ കുഴിയടച്ച റോഡ് പൂർണമായി പൊട്ടിപ്പൊളിഞ്ഞതോടെ കേളകം അടയ്ക്കാത്തോട് റോഡിൽ വാഹനയാത്ര ദുരിതമാകുന്നു. അടയ്ക്കാത്തോട് മുതൽ ഇരുട്ടുമുക്ക് വരെയുള്ള ഭാഗത്തെ റോഡാണ് തകർന്നത്. പാറത്തോട് കുടിവെള്ള സംഭരണിയുടെ സമീപത്താകട്ടെ വലിയ കുഴികൾ തന്നെ രൂപപ്പെട്ടിരിക്കുന്നു. കാൽനട യാത്രക്കാർക്ക് റോഡരികിലെ കൃഷിയിടങ്ങളിലൂടെ കയറി നടക്കേണ്ട അവസ്ഥയാണ്. വെള്ളം കെട്ടിക്കിടക്കുന്നതിനാൽ തിരിച്ചറിയാതെ ബൈക്കും സ്കൂട്ടറും മറ്റ് ചെറു വാഹനങ്ങളും കുഴികളിൽ വീണ് അപകടങ്ങളും പതിവാണ്.ചെട്ടിയാംപറമ്പ് മുതൽ അടയ്ക്കാത്തോട് വരെയും റോഡ് പൂർണമായി തകർന്ന അവസ്ഥയിലാണ്. അടയ്ക്കാത്തോട്ടിൽ നിന്ന് ശാന്തിഗിരിയിലേക്കുള്ള റോഡും തകർന്നു തുടങ്ങിയിട്ടുണ്ട്. ബസ് സർവീസുകളടക്കം നൂറു കണക്കിന് വാഹനങ്ങൾ കടന്നു പോകുന്ന റോഡായിട്ടും അറ്റകുറ്റ പണികൾ നടത്താൻ പൊതുമരാമത്ത് വകുപ്പ് നടപടി സ്വീകരിക്കുന്നില്ല. അടക്കാത്തോട്ടിൽ നിന്ന് കേളകത്തേക്കുള്ള എട്ട് കിലോമീറ്റർ ദൂരത്തിൽ കേളകം മുതൽ ഇരുട്ടുമുക്ക് വരെ രണ്ട് കിലോമീറ്റർ ദൂരം മെക്കാഡം ടാറിങ്ങാണ്. റോഡ് പൂർണമായി മെക്കാഡം ടാറിങ് നടത്തണം എന്നാണ് ജനങ്ങൾ ആവശ്യപ്പെടുന്നത്.

കൊട്ടിയൂർ: അമ്പായത്തോട് – തലപ്പുഴ 44-ാ ം മൈൽ ചുരം രഹിത പാത- പ്രാവർത്തികമാക്കണം എന്നാവശ്യപ്പെട്ട് ആലോചന യോഗം ചേരുന്നു.വയനാട് കണ്ണൂർ ജില്ലകളെ തമ്മിൽ ബന്ധിപ്പിച്ചിരുന്ന മാനന്തവാടി നെടുപോയിൽ റോഡ് പൂർണ്ണമായും ഗതാഗത യോഗ്യമല്ലാതായ സാഹചര്യത്തിൽ ആണ് യോഗം വിളിച്ചിരിക്കുന്നത്. നിലവിൽ ഇരു ജില്ലകളും അശ്രയിക്കുന്ന അമ്പായത്തോട്- ബോയ്‌സ് ടൌൺ റോഡ് ഗതാഗത കുരുക്ക് നിമിത്തം വളരെയധികം ബുദ്ധിമുട്ടുകൾ സൃഷ്ടിക്കുന്ന സ്ഥിതിയാണുള്ളത്.ഈ സാഹചര്യത്തിൽ പ്രസക്തമായ കൊട്ടിയൂർ – അമ്പായത്തോട് – തലപ്പുഴ 44-ാ ം മൈൽ ചുരം രഹിത പാത പ്രാവർത്തികമാക്കുന്നതിന് ആവശ്യമായ നടപടികൾ അടിയന്തര പ്രാധാന്യത്തോടെ സ്വീകരിക്കുന്നത് സംബന്ധിച്ച് വിവിധ രാഷ്ട്രീയ പാർട്ടി പ്രതിനിധികൾ, രാഷ്ട്രീയ, സാമൂഹിക, യുവജന സംഘടനാ പ്രതിനിധികൾ, വിവിധ വ്യാപാരി വ്യവസായി സംഘടനാ പ്രതിനിധികൾ, പഞ്ചായത്ത്, ബ്ലോക്ക് പഞ്ചായത്ത് അംഗങ്ങൾ എന്നിവരുടെ സാന്നിധ്യത്തിൽ തിങ്കളാഴ്ച ഉച്ചകഴിഞ്ഞ് 2.30 മണിക്ക് കൊട്ടിയൂർ ഗ്രാമ പഞ്ചായത്ത് മീറ്റിംഗ് ഹാളിൽ വെച്ച് സംഘടിപ്പിക്കുമെന്ന് ബന്ധപ്പെട്ടവർ അറിയിച്ചു.

നിടുംപൊയിൽ : മാനന്തവാടി പേര്യ ചുരം റോഡിൽ റോഡ് പുനർനിർമ്മാണ പ്രവർത്തിക്കിടെയുണ്ടായ അപകടത്തിൽ ഒരാൾ മരിച്ചു. രണ്ട് പേർക്ക് പരിക്ക്. വെള്ളിയാഴ്ച രാവിലെയാണ് സംഭവം.കൂടുതൽ വിവരങ്ങൾ ലഭ്യമായിട്ടില്ല.