കണ്ണൂർ: പരമ്പരാഗതവും സമകാലികവുമായ വാദ്യ ഉപകരണങ്ങളെ സമന്വയിപ്പിച്ച്‌ ആട്ടം കലാസമിതിയും തൃശ്ശൂര്‍ തേക്കിന്‍കാട് ബാന്‍ഡും അവതരിപ്പിച്ച ഫ്യൂഷന്‍ സംഗീതം കണ്ണൂര്‍ ദസറയുടെ മൂന്നാം ദിവസം സദസ്സിനെ അക്ഷരാര്‍ത്ഥത്തില്‍ ഇളക്കി മറിച്ചു.വൈകുന്നേരം പെയ്ത കനത്ത മഴയെ അവഗണിച്ച്‌ അവധി ദിനമായ ഞായറാഴ്ച കലക്ടറേറ്റ് മൈതാനിയില്‍ നിറഞ്ഞു കവിഞ്ഞ ജനക്കൂട്ടത്തിന്റെ മിഴിയും മനവും നിറച്ച്‌ രണ്ടുമണിക്കൂറിലകം നിറഞ്ഞുനിന്ന ഫ്യൂഷന്‍ സംഗീത പെരുമഴ പരമ്ബരാഗത ആസ്വാദകരെയും ന്യൂജന്‍ ആസ്വാദകരെയും ഒരുപോലെ തൃപ്തിപ്പെടുത്തുന്നതായി. പന്തലും നിറഞ്ഞു കവിഞ്ഞു പുറത്തേക്കൊഴുകിയ ജനം കുടചൂടി പരിപാടി ആസ്വദിച്ചത് ദസറയുടെ വിജയത്തിന്റെ വിളംബരമായി.

നേരത്തെ ദസറയുടെ മൂന്നാം ദിനം സാംസ്‌കാരിക സമ്മേളനം ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ എം പി രാജേഷിന്റെ അധ്യക്ഷതയില്‍ സജീവ് ജോസഫ് എം എല്‍ എ ഉദ്ഘാടനം നിര്‍വ്വഹിച്ചു. പല കാരണങ്ങള്‍ കൊണ്ട് രാഷ്ട്രീയ കലുഷിതമായ നമ്മുടെ നാട്ടില്‍ ഐക്യവും, ഒന്നിച്ചുളള കൂട്ടായ്മയിലൂടെയും നേടിയെടുത്ത ഏറ്റവും വലിയ ഉല്‍സവമാണെന്നും, ജാതി മത ചിന്തകള്‍ക്കപ്പുറം നമുക്ക് നല്‍കുന്ന ഏറ്റവും വലിയ സന്ദേശവുമാണ് ദസറയെന്നും ഉദ്ഘാടന പ്രസംഗത്തില്‍ അദ്ദേഹം പറഞ്ഞു.ഹരീഷ് മോഹന്‍ (സംസ്ഥാന ചലച്ചിത്ര അവാര്‍ഡ് ജേതാവ്) മുന്‍ മേയര്‍ സി. സീനത്ത്, കെ.സി ഉമേഷ് ബാബു (പ്രഭാഷകന്‍) എന്നിവര്‍ മുഖ്യാതിഥികളായി . റിജില്‍ മാക്കുറ്റി(ഐഎന്‍സി ), ദിനകരന്‍ കൊമ്ബിലാത്ത് (പത്രപ്രവര്‍ത്തകന്‍), ഇവിജി നമ്ബ്യാര്‍ ( മഹാത്മാ മന്ദിരം ), മനോഹരന്‍ സി. (വ്യാപാരി വ്യവസായി സമിതി ), സിജോയ് (എസ്.ബി.ഐ) എന്നിവര്‍ ചടങ്ങിന് ആശംസകളര്‍പ്പിച്ച്‌ സംസാരിച്ചു. കോര്‍പ്പറേഷന്‍ മേയര്‍ മുസ്ലിഹ് മഠത്തില്‍ ,ഡെപ്യൂട്ടി മേയര്‍ അഡ്വ: പി. ഇന്ദിര, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ സുരേഷ് ബാബു എളയാവൂര്‍, ടാക്‌സ് അപ്പീല്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഷാഹിന മൊയ്തീന്‍, മുന്‍ മേയര്‍ അഡ്വ: ടി.ഒ.മോഹനന്‍ , കൗണ്‍സിലര്‍മാരായ കെ.എം സരസ , മിനി അനില്‍കുമാര്‍ , എന്നിവര്‍ സന്നിഹിതരായി. കൗണ്‍സിലര്‍ കൂക്കിരി രാജേഷ് സ്വാഗതവും, ബിജോയ് തയ്യില്‍ (കൗണ്‍സിലര്‍ ) നന്ദിയും പറഞ്ഞു.തുടര്‍ന്ന് അന്‍ഷിക സുനോജ് അവതരിപ്പിച്ച ഭരതനാട്യം, കോര്‍പ്പറേഷന്‍ ജീവനക്കാര്‍ അവതരിപ്പിച്ച ഡാന്‍ഡിയ നൃത്തം, സിഎച്ച്‌എം ഹയര്‍ സെക്കണ്ടറി വിദ്യാര്‍ത്ഥികള്‍ അവതരിപ്പിച്ച കോല്‍ക്കളി , പ്രിയദര്‍ശിനി നാറാത്ത് ടീമിന്റെ കൈ കൊട്ടി കളി എന്നിവയും അരങ്ങേറി.

കണ്ണൂർ: പ്രവാസി മലയാളികള്‍ക്ക് പുതിയ ലൈസന്‍സ് എടുക്കുന്നതിനും കാലാവധി കഴിഞ്ഞ ലൈസന്‍സുകള്‍ പുതുക്കുന്നതിനും ഒരുദിവസം അഞ്ചുസ്ലോട്ടുകള്‍ നീക്കിവെച്ചിട്ടുണ്ടെന്ന് ഗതാഗതമന്ത്രി കെ.ബി. ഗണേഷ് കുമാര്‍. ഇത് അനുവദിക്കാന്‍ ഏതെങ്കിലും ഉദ്യോഗസ്ഥര്‍ മടിച്ചാല്‍ തന്റെ ഓഫീസില്‍ പരാതിപ്പെടാമെന്നും ഉടന്‍ നടപടിയുണ്ടാകുമെന്നും അദ്ദേഹം അറിയിച്ചു. ഫെയ്‌സ്ബുക്ക് പേജില്‍ പങ്കുവെച്ച വീഡിയോയിലാണ് അദ്ദേഹം ഇക്കാര്യം അറിയിച്ചത്.കേരളത്തിന് പുറത്തുതാമസിക്കുന്ന മലയാളികള്‍ക്കായി ഒരുദിവസത്തെ ടെസ്റ്റിനുവേണ്ടിയുള്ള 40 സ്ലോട്ടുകളില്‍ അഞ്ചെണ്ണം മാറ്റിവെച്ചിട്ടുണ്ട്. ഇത് സംബന്ധിച്ച് ട്രാന്‍സ്‌പോര്‍ട്ട് കമ്മിഷണറുടെ ഉത്തരവുണ്ട്. ഇത് തരാന്‍ ഏതെങ്കിലും ഉദ്യോഗസ്ഥന്‍ മടിച്ചാല്‍ മന്ത്രിയുടെ ഓഫീസുമായി ബന്ധപ്പെടണം. പ്രവൈറ്റ് സെക്രട്ടറിക്ക് പരാതി നല്‍കിയാല്‍ അപ്പോള്‍ത്തന്നെ നടപടിയെടുക്കുമെന്നും മന്ത്രി പറഞ്ഞു.

അപേക്ഷ നല്‍കിയാല്‍ ഒരു തീയതി ലഭിക്കും. ആ തീയതിയുമായി ആര്‍.ടി.ഓയേയോ ജോയിന്റ് ആര്‍.ടി.ഓയേയോ സമീപിച്ചാല്‍ ആവശ്യപ്പെടുന്ന ഏറ്റവും അടുത്ത തീയതി അനുവദിക്കും. തന്നില്ലെങ്കില്‍ മന്ത്രിയുടെ ഓഫീസിലേക്ക് ബന്ധപ്പെടാം. കര്‍ശനമായ നിര്‍ദേശം ആര്‍.ടി.ഒമാര്‍ക്കും ജോയിന്റ് ആര്‍.ടി.ഒമാര്‍ക്കും ഉദ്യോഗസ്ഥര്‍ക്കും നല്‍കിയിട്ടുണ്ട്. ട്രാന്‍സ്‌പോര്‍ട്ട് കമ്മിഷണറുടേയും മന്ത്രിയെന്ന നിലയില്‍ തന്റേയും ഉത്തരവുണ്ട്. അവര്‍ അനുസരിച്ചേ പറ്റുകയുള്ളൂ എന്നും മന്ത്രി വ്യക്തമാക്കി.കാലാവധി കഴിയുന്നതിന് ആറുമാസം മുമ്പേയും പുതുക്കാം. തീര്‍ന്നാല്‍ ഒരുവര്‍ഷത്തില്‍ ഉള്ളില്‍വരെ ഫൈനടയ്ക്കാതെ പുതുക്കാം. പക്ഷേ, ആ സമയത്ത് വാഹനംഓടിക്കാന്‍ പാടില്ല. അടുത്ത നാലുവര്‍ഷത്തിനുള്ളില്‍ ഫൈനോടെ പുതുക്കാം. നാലുവര്‍ഷം കഴിഞ്ഞാണെങ്കില്‍ ലേണേഴ്‌സ് ലൈസന്‍സ് ലഭിക്കുന്നതുമുതലുള്ള നടപടികളിലൂടെ വീണ്ടും കടന്നുപോകേണ്ടിവരുമെന്നും ഗണേഷ് കുമാര്‍ പറഞ്ഞു. പരിവാഹന്‍ വെബ്‌സൈറ്റിലെ സാരഥി ലിങ്കുവഴി വിദേശത്തിരുന്നും അപേക്ഷ നല്‍കാം. പണം ഓണ്‍ലൈനായി അടക്കാമെന്നും മന്ത്രി ഓര്‍മിപ്പിച്ചു.

കണ്ണൂർ:വിവരസാങ്കേതികവിദ്യ ലോകത്തിന്റെ സ്‌പന്ദനമാവുന്ന കാലത്ത്‌ പയ്യാവൂർ സേക്രട്ട്‌ ഹാർട്ട്‌ എച്ച്‌എസ്‌എസിലെ മിടുക്കർ വികസിപ്പിച്ചെടുത്തത്‌ ചില്ലറ സംഭവമല്ല. സ്‌കൂളിലെ നാഷണൽ സർവീസ്‌ സ്‌കീമിനു വേണ്ടി ഒരു കിടിലൻ വെബ്‌സൈറ്റ്‌. എൻ.എസ്‌.എസ്‌ വളന്റിയർമാരായ പ്ലസ്‌ വൺ വിദ്യാർഥികൾ എങ്ങനെ ഒരു വെബ്‌സൈറ്റ്‌ നിർമിച്ചുവെന്ന ചോദ്യത്തിന്‌ പ്രസക്തിയില്ല. കാരണം കാലത്തിന്‌ മുമ്പേ അറിവിന്റെ ലോകത്തേക്ക്‌ പറക്കുന്ന പുതുതലമുറയാണിതെന്ന്‌ ഈ മിടുക്കർ ലോകത്തോട്‌ വിളിച്ചുപറയുകയാണ്‌.
സ്‌കൂളിലെ എൻഎസ്‌എസ്‌ പ്രവർത്തനങ്ങൾ ലോകത്തെ അറിയിക്കുകയാണ്‌ വെബ്‌സൈറ്റിന്റെ ലക്ഷ്യം. nss.shhss.payyavoor.in ആണ്‌ വെബ്‌സൈറ്റിന്റെ വിലാസം. കംപ്യൂട്ടർ പ്രോഗ്രാമിങ്‌ സ്വന്തമായി പഠിച്ചാണ്‌ വിദ്യാർഥികളുടെ സംഘം വെബ്‌സൈറ്റ്‌ നിർമിച്ചത്‌. ഐടി അധ്യാപകരായ ഷൈബു, ബോണി എന്നിവരാണ്‌ മാർഗനിർദേശം നൽകിയത്‌. ചുരുങ്ങിയ മാസങ്ങളെടുത്ത്‌ പൂർത്തിയാക്കിയ വെബ്‌സൈറ്റ്‌ എൻഎസ്‌എസ്‌ ദിനമായ സെപ്‌തംബർ 24നാണ്‌ പ്രിൻസിപ്പൽ ബിനോയ്‌ ലോഞ്ച്‌ ചെയ്‌തത്‌.

അണിയറയിൽ പത്താംക്ലാസ്സുകാരുടെ ഐടി കമ്പനി

പത്താം ക്ലാസുകാരായ രണ്ട്‌ പേർ തുടങ്ങിയ കോഡ്‌ കേവ്‌ എന്ന ഫ്രീലാൻസ്‌ ഐടി കമ്പനിയാണ്‌ ഈ വെബ്‌സൈറ്റ്‌ നിർമിക്കാൻ സഹായകമായത്‌. പയ്യാവൂർ സേക്രഡ്‌ ഹാർട്ട്‌ സ്‌കൂളിലെ പ്ലസ്‌ വൺ വിദ്യാർഥി ശ്രാവൺ നാരായണനും ഇരിയണ്ണി ജിവിഎച്ച്‌എസ്‌എസ്‌ പ്ലസ്‌വൺ വിദ്യാർഥി ശ്രീനന്ദും ചേർന്ന്‌ കഴിഞ്ഞവർഷം തുടങ്ങിയ സ്‌റ്റാർട്ട്‌അപ്പാണിത്‌. കംപ്യൂട്ടർ കോഡിങ്‌ പരിശീലനത്തിനും വെബ്‌സൈറ്റ്‌ നിർമാണത്തിനും സഹായിക്കുന്ന സ്‌റ്റാർട്ട്‌ അപ്‌ സോഫ്‌റ്റ്‌വെയർ എൻജിനിയർമാർ നിർമിക്കുന്ന നിലവാരത്തിലാണ്‌ ഈ മിടുക്കർ തയ്യാറാക്കിയത്‌. ശ്രാവൺ കമ്പനിയുടെ സിഇഒയും ശ്രീനന്ദ്‌ ചീഫ്‌ മാർക്കറ്റിങ്‌ ഓഫീസറുമാണ്‌. ഇവരുടെ കൂട്ടുകാരൻ ഇർഷാദാണ്‌ ചീഫ്‌ ടെക്‌നിക്കൽ ഓഫീസർ.