‘പ്രിയപ്പെട്ട ഗവണ്‍മെന്റ്, ഞങ്ങള്‍ എല്ലാ ദിവസവും ഫുട്ബോള്‍ കളിക്കാറുണ്ട്. ജയവും തോല്‍വിയുമുണ്ടാകാറുണ്ടെങ്കിലും കളിക്കാന്‍ നല്ല ഒരു ഫുട്ബോള്‍ ഇല്ലെന്ന വലിയ വിഷമത്തിലാണ് ഞങ്ങള്‍. പൊട്ടിയ ബാസ്‌കറ്റ്‌ബോള്‍ ഉപയോഗിച്ചാണ് ഞങ്ങള്‍ ദിവസവും ഫുട്ബോള്‍ കളിക്കുന്നത്. ഗവണ്‍മെന്റ് ഒരു ഫുട്ബോള്‍ വാങ്ങിതരാമോ’.കുടുംബശ്രീയുടെ നേതൃത്വത്തില്‍ നായരങ്ങാടി ഗവ. യു.പി. സ്‌കൂളില്‍ നടത്തിയ ബാലസഭയ്ക്കു മുന്നോടിയായി സ്ഥാപിച്ച ചോദ്യപ്പെട്ടിയില്‍ ഏഴാം ക്ലാസിലെ ആണ്‍കുട്ടികള്‍ എഴുതിയിട്ട കത്തിലെ വരികളാണിത്.

കത്ത് കിട്ടിയ കോടശ്ശേരി പഞ്ചായത്തിലെ കുടുംബശ്രീ പ്രവര്‍ത്തകര്‍ സാമൂഹികമാധ്യമത്തില്‍ കൗതുകപൂര്‍വം കത്ത് പോസ്റ്റ് ചെയ്തു. പോസ്റ്റ് ശ്രദ്ധയില്‍പ്പെട്ട കോടശ്ശേരിയിലെ ഡി.വൈ.എഫ്.ഐ., എസ്.എഫ്.ഐ. പ്രവര്‍ത്തകരാണ് വിദ്യാര്‍ഥികള്‍ക്കു മൂന്നു ഫുട്ബോളുകള്‍ വാങ്ങിനല്‍കിയത്.ഏഴാം ക്ലാസ് വിദ്യാര്‍ഥികളായ ഹൃദ്വിന്‍, ഹാരിദ്, നീരജ് എന്നിവര്‍ക്ക് ബോള്‍ കൈമാറി. വാര്‍ഡ് അംഗം ഇ.എ. ജയതിലകന്‍ ഉദ്ഘാടനം ചെയ്തു. സി.ഡി.എസ്. ചെയര്‍പേഴ്സണ്‍ ലിവിത വിജയകുമാര്‍ അധ്യക്ഷയായി. പ്രധാനാധ്യാപിക എച്ച്. ബബിത, വി.ജെ. വില്യംസ്, എന്‍.എസ്. സജിത്ത്, കെ. ഷമീര്‍, കെ.എസ്. രാഹുല്‍, ഐ.എസ്. വിഷ്ണു, രമ്യ ബാബു എന്നിവര്‍ പ്രസംഗിച്ചു.

യന്ത്രവത്കൃത വാഹനപരിശോധനാ കേന്ദ്രങ്ങള്‍ക്ക് (ഓട്ടോമേറ്റഡ് ടെസ്റ്റിങ് സെന്റര്‍) സംസ്ഥാനം അനുമതി നല്‍കിയില്ലെങ്കില്‍ ഉപരിതല ഗതാഗതമന്ത്രാലയം നല്‍കും. സംസ്ഥാനങ്ങളുടെ അധികാരത്തില്‍ കൈകടത്തിക്കൊണ്ട് വന്‍കിട കമ്പനികള്‍ക്ക് അനുമതി നല്‍കാനാണ് നീക്കം. ഇതിനുവേണ്ടി കേന്ദ്ര മോട്ടോര്‍വാഹനനിയമം ഭേദഗതിചെയ്യും. 2022-ല്‍ പ്രഖ്യാപിച്ച പദ്ധതി വൈകുന്നതുകൊണ്ടാണ് കേന്ദ്രസര്‍ക്കാര്‍ നിലപാട് കടുപ്പിക്കുന്നത്.ഉപരിതല ഗതാഗതമന്ത്രാലയത്തിന്റെ സോഫ്റ്റ്​വെയർ വഴിയാണ് ഓട്ടോമേറ്റഡ് ടെസ്റ്റിങ് കേന്ദ്രങ്ങള്‍ക്ക് ലൈസന്‍സ് നല്‍കുന്നത്.

സംസ്ഥാനം നടപടി എടുത്തില്ലെങ്കില്‍ അപേക്ഷകര്‍ക്ക് കേന്ദ്രത്തെ സമീപിക്കാനാകും. 2024 ഒക്ടോബര്‍മുതല്‍ ഓട്ടോമേറ്റഡ് ടെസ്റ്റിങ് കേന്ദ്രം നിര്‍ബന്ധമാക്കാന്‍ തീരുമാനിച്ചിരുന്നു. ഇപ്പോള്‍ ആറുമാസത്തെ സാവകാശംകൂടി അനുവദിച്ചിട്ടുണ്ട്.15 വര്‍ഷം പഴക്കമുള്ള വാഹനങ്ങള്‍ പിന്‍വലിക്കണമെങ്കില്‍ പൊളിക്കല്‍ കേന്ദ്രങ്ങള്‍ക്കൊപ്പം ഫിറ്റ്നസ് കേന്ദ്രങ്ങളും ഒരുക്കണം. പരിശോധനയില്‍ പരാജയപ്പെടുന്ന വാഹനങ്ങളാണ് പൊളിക്കേണ്ടത്. സംസ്ഥാനത്ത് റെയില്‍വേയുടെ സഹകരണത്തോടെ രണ്ട് പൊളിക്കല്‍കേന്ദ്രങ്ങള്‍ തുടങ്ങാന്‍ നടപടി തുടങ്ങിയിട്ടുണ്ട്.

19 കേന്ദ്രങ്ങള്‍ക്ക് നീക്കം

കേന്ദ്ര ഇടപെടല്‍ ഉറപ്പായതോടെ 19 ടെസ്റ്റിങ് കേന്ദ്രങ്ങള്‍ തുടങ്ങാന്‍ സംസ്ഥാനസര്‍ക്കാര്‍ നടപടി തുടങ്ങി. ഒപ്പം മോട്ടോര്‍വാഹനവകുപ്പിന്റെ പ്രവര്‍ത്തനരഹിതമായ ഒന്‍പത് ടെസ്റ്റിങ് സെന്ററുകള്‍ നവീകരിക്കും.ഇപ്പോള്‍ ഉദ്യോഗസ്ഥര്‍ നേരിട്ടാണ് വാഹനങ്ങള്‍ പരിശോധിക്കുന്നത്. ബാഹ്യ ഇടപെടലുകള്‍ക്കും ക്രമക്കേടുകള്‍ക്കും ഇത് വഴിവെക്കുന്നുണ്ട്. വാഹനങ്ങളുടെ എന്‍ജിന്‍, സസ്‌പെന്‍ഷന്‍, സ്റ്റിയറിങ്, ലൈറ്റുകള്‍, ബ്രേക്ക് തുടങ്ങിയ ഘടകങ്ങളെല്ലാം കംപ്യൂട്ടര്‍ നിയന്ത്രിത സംവിധാനത്തിലൂടെ പരിശോധിക്കുന്നതാണ് ഓട്ടോമേറ്റഡ് ടെസ്റ്റിങ് സെന്റുകള്‍.

കാസർകോട്: അമ്പലത്തറയിൽ ഭർത്താവ്‍ ഭാര്യയെ കൊലപ്പെടുത്തി. കണ്ണോത്ത് സ്വദേശി ബീന(40)യാണ് മരിച്ചത്. ഭർത്താവ് ദാമോദരനെ പോലീസ് കസ്റ്റഡിയിലെടുത്തു.പുലർച്ചെ രണ്ടുമണിയോടെയാണ് കൊലപാതകം നടന്നതെന്നാണ് വിവരം. ഞായറാഴച രാവിലെ ബീനയെ രക്തത്തിൽ കുളിച്ച് മരിച്ചു നിലയിൽ കണ്ടെത്തുകയായിരുന്നു. കുടുംബ തർക്കത്തെ തുടർന്ന് ദാമോദരൻ ഭാര്യയെ കഴുത്തും ഞെരിച്ചും ഭിത്തിയിൽ തലയിടിപ്പിച്ചും കൊലപ്പെടുത്തുകയായിരുന്നുവെന്നാണ് പോലീസിൽ നിന്ന് ലഭിക്കുന്ന പ്രാഥമിക വിവരം. ദാമോദരൻ അമ്പലത്തറ പൊലീസിൽ കീഴടങ്ങി.കൊലപാതകം നടത്തിയതിനുശേഷം ദാമോദരൻ, വിവരം ബന്ധുവിനെ വിളിച്ച് അറിയിക്കുകയായിരുന്നു. ഇവർക്ക് 21 വയസ്സുള്ള മകനുണ്ട്. ഡൽഹിയിൽ മൊബൈൽ ടെക്നീഷ്യനായി ജോലി ചെയ്യുന്നു. സംഭവ സമയത്ത് മകൻ വീട്ടിൽ ഉണ്ടായിരുന്നില്ല.