പേരാവൂർ: യുണൈറ്റഡ് മർച്ചന്റ്‌സ് ചേമ്പർ പേരാവൂർ യൂണിറ്റ് സംഘടിപ്പിക്കുന്ന രണ്ടാമത് എഡിഷൻ നരിതൂക്കിൽ ഗോൾഡ് ആൻഡ് ഡയമണ്ട്‌സ് പേരാവൂർ മിഡ്‌നൈറ്റ് മാരത്തൺ നവംബർ 23 ശനിയാഴ്ച രാത്രി 11 മണിക്ക് പേരാവൂർ പഴയ ബസ് സ്റ്റാൻഡിൽ നിന്ന് ആരംഭിക്കും. മാരത്തണിന്റെ ഒരുക്കങ്ങൾ പൂർത്തിയായതായി സംഘാടകർ അറിയിച്ചു.

പേരാവൂർ പഴയ ബസ് സ്റ്റാൻഡിൽ നിന്നാരംഭിച്ച് ചെവിടിക്കുന്ന്, തൊണ്ടിയിൽ, തെറ്റുവഴിയിലൂടെ ഓടി പഴയ ബസ് സ്റ്റാൻഡിൽ സമാപിക്കും വിധം ഏഴ് കിലോമീറ്റർ ആണ് മാരത്തൺ റൂട്ട്. നാലു പേരടങ്ങുന്ന ടീമുകളായാണ് മത്സരം. സിംഗിളായും പങ്കെടുക്കാം.

ഒന്നു മുതൽ മൂന്ന് വരെ സ്ഥാനങ്ങളിലെത്തുന്ന പുരുഷ വനിതാ ടീമുകൾക്ക് 15,000, 10,000, 5000 രൂപ വീതം ക്യാഷ് പ്രൈസും ഓട്ടം പൂർത്തിയാക്കുന്നവർക്ക് മെഡലും സർട്ടിഫിക്കറ്റും ലഭിക്കും. 50 വയസ്സിന് മുകളിലുള്ള നാല് വനിതാ മത്സരാർത്ഥികൾക്കും 60 വയസ്സിന് മുകളിലുള്ള നാല് പുരുഷ മത്സരാർത്ഥികൾക്കും പ്രോത്സാഹന സമ്മാനം ലഭിക്കും. നാല് മുതൽ പത്ത് വരെ സ്ഥാനങ്ങളിൽ എത്തുന്ന ടീം അംഗങ്ങൾക്കും പ്രോത്സാഹന സമ്മാനങ്ങൾ ലഭിക്കും. അർജുന അവാർഡ് ജേതാവ് ഒളിമ്പ്യൻ ടിന്റു ലൂക്കയാണ് മിഡ്‌നൈറ്റ് മാരത്തണിന്റെ ഇവന്റ് അംബാസിഡർ.

ആരോഗ്യ സംരക്ഷണത്തിന്റെ സുപ്രധാന ഘടകമായ വ്യായാമത്തിലെ ഓട്ടത്തിന് പ്രാധാന്യം നൽകുന്നതിനും മാലിന്യമുക്ത കേരളം എന്ന ആശയം പ്രചരിപ്പിക്കുന്നതിനുമാണ് മിഡ്‌നൈറ്റ് മാരത്തൺ സംഘടിപ്പിക്കന്നത്. 23ന് രാത്രി 10ന് ഉദ്ഘാടന സമ്മേളനം. 10.30ന് സുമ്പാ ഡാൻസ്, 11 മണിക്ക് ഇവന്റ് അംബാസിഡർ ഒളിമ്പ്യൻ ടിന്റു ലൂക്കയും പേരാവൂർ ഡി. വൈ.എസ്.പി. കെ.വി. പ്രമോദനും ഫ്‌ളാഗ് ഓഫ് ചെയ്യും.

പത്രസമ്മേളനത്തിൽ ചെയർമാൻ സൈമൺ മേച്ചേരി, യൂണിറ്റ് പ്രസിഡന്റ് ഷിനോജ് നരിതൂക്കിൽ, ജനറൽ സെക്രട്ടറി വി. കെ. രാധാകൃഷ്ണൻ, ട്രഷറർ നാസർ ബറാക്ക, യൂണിറ്റ് രക്ഷാധികാരി കെ.എം. ബഷീർ എന്നിവർ പങ്കെടുത്തു.

പേരാവൂർ: രക്താർബുദം ബാധിച്ച് മജ്ജ മാറ്റിവെക്കൽ ശസ്ത്രക്രിയക്ക് ചികിത്സയിൽ കഴിയുന്ന പുതുശേരിയിലെ ഫിദ ഷെറിന് സഹായവുമായി ഓട്ടോ ഡ്രൈവർമാർ. പേരാവൂർ ആരാധനാ സ്റ്റാൻഡിലെ ഓട്ടോ ഡ്രൈവർമാർ ചേർന്ന് സ്വരൂപിച്ച തുക കാരായി സുധാകരൻ ചികിത്സ സഹായ കമ്മിറ്റി ഭാരവാഹി കെ.പി.അബുൾ റഷീദിന് കൈമാറി. കെ.സി.സനിൽ കുമാർ, കെ.ജെ.ജോയിക്കുട്ടി,സി.പി.അഫ്‌സൽ, കെ.സുജീവൻ, കെ.കെ.പ്രദീഷ് എന്നിവർ സംസാരിച്ചു.

25 ലക്ഷം രൂപ ചികിത്സാ ചിലവ് വരുന്ന ശസ്ത്രക്രിയക്ക് പണം കണ്ടെത്താൻ നിർധന കുടുബത്തിന് സാധ്യമല്ലാത്ത സ്ഥിതിയാണ്. ഫിദ ഷെറിന്റെ ചികിത്സക്കായി ചികിത്സ കമ്മറ്റി രൂപവത്കരിച്ചിട്ടുണ്ട്. കാനറാ ബാങ്ക് പേരാവൂർ ശാഖയിലെ 110208643800 എന്ന അക്കൗണ്ടിലോ (ഐ.എഫ്.എസ്.സി CNRB 0014221) , 7012291508 ഗൂഗിൾ പേ നമ്പറിലോ സഹായമെത്തിക്കാം.

പേരാവൂർ: ജില്ലയിൽ ആദ്യമായി വ്യാപാരികളുടെ സ്വയം സഹായ സംഘങ്ങൾക്ക് തുടക്കം. വ്യാപാരി വ്യവസായി ഏകോപന സമിതി മണത്തണ യൂണിറ്റിനു കീഴിലാണ് നാലു സ്വയം സഹായ സംഘങ്ങൾ രൂപവത്കരിച്ചത്. വ്യാപാരികളുടെ നൂതന സംരംഭങ്ങളുടെ ഉദ്ഘാടനവും സംഘങ്ങൾക്കുള്ള ധനസഹായ വിതരണവും ജില്ലാ പ്രസിഡന്റ്ദേവസ്യ മേച്ചേരി ഉദ്ഘാടനം ചെയ്തു.യൂണിറ്റ് പ്രസിഡന്റ് സി.എം.ജെ മണത്തണ അധ്യക്ഷത വഹിച്ചു.യൂനിറ്റ് ജനറൽ സെക്രട്ടറി കെ.സി .പ്രവീൺ , സുധീർ ബാബു , യൂത്ത് വിംഗ് പ്രസിഡന്റ് റിജോ ജോസഫ് , വനിതാ വിംഗ് പ്രസിഡന്റ് ബിന്ദു സോമൻ , കെ.കുഞ്ഞുമുഹമ്മദ്, ഷിജി പയ്യംപള്ളി, കെ.സോമൻ , ആർ. രഞ്ജിത്ത് എന്നിവർ സംസാരിച്ചു.