കണ്ണൂര്‍: എംപോക്‌സ് രോഗലക്ഷണങ്ങളെന്ന് സംശയിച്ച് ആശുപത്രിയില്‍ പ്രവേശിപ്പിച്ച യുവതിയുടെ പരിശോധനാഫലം നെഗറ്റീവ്. യുവതിക്ക് ചിക്കന്‍പോക്‌സ് ആണെന്ന് സ്ഥിരീകരിച്ചു. പരിയാരം മെഡിക്കല്‍ കോളജില്‍ ഐസോലേഷനില്‍ പ്രവേശിച്ച യുവതിയുടെ പരിശോധനാഫലമാണ് പുറത്തുവന്നത്.സെപ്തംബര്‍ ഒന്നിന് വിദേശത്ത് നിന്നെത്തിയ യുവതിക്കാണ് എംപോക്സ് രോഗ ലക്ഷണങ്ങള്‍ കണ്ടത്. കഴിഞ്ഞ ഒരാഴ്ചയായി രോഗ ലക്ഷണങ്ങള്‍ പ്രകടിപ്പിച്ച ഇവരെ കഴിഞ്ഞ ദിവസം രാവിലെയാണ് ആശുപത്രിയില്‍ പ്രവേശിപ്പിച്ചത്. സംശയത്തിന്റെ അടിസ്ഥാനത്തിലാണ് പരിയാരം മെഡിക്കല്‍ കോളജില്‍ ഐസോലേഷനിലേക്ക് മാറ്റിയത്.കഴിഞ്ഞ ദിവസം വിദേശത്തു നിന്നെത്തിയ മലപ്പുറം സ്വദേശിക്ക് എംപോക്സ് സ്ഥിരീകരിച്ചിരുന്നു. രാജ്യത്തെ രണ്ടാമത്തെ എംപോക്സ് കേസായിരുന്നു മലപ്പുറത്ത് റിപ്പോര്‍ട്ട് ചെയ്തത്. യുഎഇയില്‍ നിന്നും എത്തിയ 38 കാരനാണ് രോഗം സ്ഥിരീകരിച്ചത്. യുവാവിന് പനിയും, ശരീരത്തില്‍ ചിക്കന്‍പോക്‌സിന് സമാനമായ രീതിയില്‍ തടിപ്പുമുണ്ടായിരുന്നു. സംശയം തോന്നിയ ഡോക്ടര്‍ സാംപിൾ പരിശോധനയ്ക്ക് അയക്കുകയും രോ​ഗം സ്ഥിരീകരിക്കുകയും ചെയ്തിരുന്നു.

കണ്ണൂർ:മലബാർ കാൻസർ കെയർ സൊസൈറ്റിയും തിരുവനന്തപുരം റീജനൽ കാൻസർ സെന്ററും ചേർന്ന് നടത്തുന്ന കാൻസർ ഫോളോ അപ് ക്ലിനിക് 28-ന് രാവിലെ 9 മുതൽ കണ്ണൂർ ഏർലി കാൻസർ ഡിറ്റക്‌ഷൻ സെന്ററിൽ നടത്തും.ആർ.സി.സിയിലെ ഡോ. എ.എൽ ലിജീഷ്, ഡോ. അശ്വിൻ കുമാർ എന്നിവർ നേതൃത്വം നൽകും.ആർ.സി. സിയിൽ ചികിത്സ പൂർത്തിയാക്കി പുന:പരിശോധന നിർദേശിച്ചവർക്കും പരിശോധന ആവശ്യമുള്ളവർക്കും ഫോളോ അപ് ക്ലിനിക്കിൽ പങ്കെടുക്കാം.കണ്ണൂർ, കോഴിക്കോട്, വയനാട്, കാസർകോട് ജില്ലകളിൽ നിന്നുള്ള പങ്കെടുക്കാൻ ആഗ്രഹിക്കുന്നവർ 25-ന് വൈകിട്ട് 4 മണിക്ക് മുൻപ് റജിസ്റ്റർ ചെയ്യണം. ഫോൺ: 0497 2705309, 0497-2703309.

പരിയാരം:കണ്ണൂർ ഗവണ്മെൻ്റ് ആയുർവേദ കോളേജിൽ സ്ത്രീകളുടെയും കുട്ടികളുടെയും ആശുപത്രിയിൽ ദിവസ വേതന അടിസ്ഥാനത്തിൽ ഡ്രൈവറെ നിയമനത്തിന് അപേക്ഷ ക്ഷണിച്ചു.എസ്.എസ്.എൽ.സി വിജയം, എച്ച്.ഡി.വി ലൈസൻസ്, അഞ്ച് വർഷത്തിൽ കുറയാത്ത പ്രവൃത്തി പരിചയം എന്നിവ അഭികാമ്യം.ആംബുലൻസ്, ബസ് എന്നിവ ഓടിക്കുന്നതിന് പ്രാവീണ്യം വേണം. പ്രായം 50 കവിയരുത്. അഭിമുഖം 23-ന് പകൽ 11-ന് ആസ്പത്രി സൂപ്രണ്ട് ഓഫീസിൽ.