കണ്ണൂർ : തന്റെ പ്രതികരണമെന്ന നിലയില്‍ ഇപ്പോള്‍ മാധ്യമങ്ങളില്‍ പ്രചരിച്ചുകൊണ്ടിരിക്കുന്ന വാർത്തകള്‍ തന്റേതല്ലെന്നും മറ്റു വ്യാഖ്യാനങ്ങള്‍ക്ക് ഞാൻ ഉത്തരവാദിയല്ലെന്നും പി.പി ദിവ്യ ഫേസ്ബുക്കില്‍ കുറിച്ചു.
പാർടി സ്വീകരിച്ച നടപടി ഞാൻ അംഗീകരിക്കുന്നുവെന്നും തനിക്ക് പറയാനുള്ളത് പാർടി വേദിയില്‍ പറയുമെന്നും മാധ്യമങ്ങളോടു പറയാനുള്ളത് ഇന്നലെ തന്നെ പറഞ്ഞിട്ടുണ്ടെന്നും ദിവ്യ പറഞ്ഞു.

ഫേസ്ബുക്ക് കുറിപ്പിന്റെ പൂർണരൂപം

എന്റെ പ്രതികരണമെന്ന നിലയില്‍ ഇപ്പോള്‍ മാധ്യമങ്ങളില്‍ വന്നു കൊണ്ടിരിക്കുന്ന വാർത്തകള്‍ എന്റെ അഭിപ്രായമല്ല. അത്തരമൊരു പ്രതികരണം ഞാൻ നടത്തിയിട്ടുമില്ല. മാധ്യമങ്ങളോടു പറയാനുള്ളത് ഇന്നലെ തന്നെ പറഞ്ഞിട്ടുണ്ട്. മറ്റു വ്യാഖ്യാനങ്ങള്‍ക്ക് ഞാൻ ഉത്തരവാദിയല്ല .

ഉത്തരവാദപ്പെട്ട ഒരു പാർട്ടി അംഗം എന്ന നിലയില്‍ എനിക്കു പറയാനുള്ളത് പാർട്ടി വേദികളില്‍ പറയുന്നതാണ് ഇതുവരെ അനുവർത്തിച്ചു വന്ന രീതി. അത് തുടരും, എന്റെ പാർട്ടി സ്വീകരിച്ച നടപടി ഞാൻ അംഗീകരിക്കുന്നു. എന്റെ സഖാക്കളും സുഹൃത്തക്കളും വ്യാജ പ്രചാരണങ്ങളെ തള്ളിക്കളയണമെന്ന് അഭ്യർഥിക്കുന്നു.

കണ്ണൂർ: മദ്രസ വിദ്യാർത്ഥിയെ ഇസ്തിരിപ്പെട്ടി കൊണ്ട് പൊള്ളിച്ച കേസിൽ അധ്യാപകൻ അറസ്റ്റിൽ. കൂത്തുപറമ്പിലെ മദ്രസാ അധ്യാപകനായ ഉമൈർ അഷ്റഫ് ആണ് അറസ്റ്റിലായത്. കഴിഞ്ഞ സെപ്റ്റംബറിലാണ് വിദ്യാർത്ഥിയെ ഇയാൾ ക്രൂരമായി പൊള്ളലേൽപ്പിച്ചത്. ചൂരൽ ഉപയോഗിച്ച് അടിക്കുകയും ചെയ്തു. പഠന കാര്യത്തിൽ ശ്രദ്ധിക്കുന്നില്ലെന്ന് ആരോപിച്ചായിരുന്നു മർദനം. സംഭവത്തിന് ശേഷം ഉമൈർ കർണാടകയിൽ ഒളിവിലായിരുന്നു.

കണ്ണൂർ: ട്രയിനുകളിൽ യാത്ര ചെയുന്നവരെ ആശങ്കയിലാക്കി ഉയർന്ന് വരുന്ന മൊബൈൽ മോഷണം വലിയ പ്രതിസന്ധിയാണ് യാത്രക്കാർക്കിടയിൽ ഉണ്ടാക്കുന്നത്. കണ്ണൂരിൽ മാത്രം ഇതുമായി ബന്ധപ്പെട്ട് കഴിഞ്ഞമാസം ലഭിച്ചത് 20 പരാതികളാണ്. ഇതിൽ 15 ഫോണുകൾ പൊലീസ് ലൊക്കേഷൻ കണ്ടെത്തി തിരികെ പിടിച്ചു നൽകിയിരുന്നു.

ട്രെയിനുകളിൽ നിരീക്ഷണ ക്യാമറകൾ സ്ഥാപിക്കാമെന്ന തീരുമാനം ഉണ്ടായിരുന്നെങ്കിലും നടപടികൾ ഇപ്പോഴും ഇഴയുകയാണ്. എൽ.എച്ച്.ബി.എൽ സി കോച്ചുകളിലാണ് നിലവിൽ സ്ഥാപിച്ചിട്ടുള്ളത്. ഇത് സ്ലീപ്പർ കോച്ചുകളിലും ഘട്ടം ഘട്ടമായി വെക്കുമെന്നാണ് പറഞ്ഞിരുന്നത്.

റെയിൽവെ സ്ക്വാഡ് സുരക്ഷിതമായ യാത്ര ഉറപ്പ് വരുത്താനായി പല ട്രെയിനുകളിലും ഉണ്ടെങ്കിലും മോഷണ കേസുകളുടെ എണ്ണത്തിൽ കുറവില്ല. ഫോണുകളും മറ്റും വള​രെ ശ്രദ്ധയോടെ കരുതണമെന്നും അലസമായി ഇടാൻ പാടില്ലയെന്നും പലർക്കും മുന്നറിയിപ്പ് നൽകുമെങ്കിലും ഇത് പലപ്പോഴും പാലിക്കാറില്ല. ഇത് മോഷ്ടാകൾക്ക് പറ്റിയ അവസരം ഉണ്ടാക്കുന്നു. മോഷ്ടാക്കള്‍ കുട്ടികളെയും ഉപയോ​ഗിക്കുന്നുണ്ടെന്നും പൊലീസ് പറയുന്നു.