കാക്കയങ്ങാട് : പതിനാറാമത് ദേശിയ കളരി ചാമ്പ്യൻഷിപ്പിൽ സീനിയർ വുമൺ ചവിട്ടിപൊങ്ങൽ വിഭാഗത്തിൽ കാക്കയങ്ങാട് സ്വദേശിനി എ. അശ്വനി സ്വർണ്ണ മെഡൽ നേടി. ഏഴ് സ്വർണ്ണം, രണ്ട് വെങ്കലം ഉൾപ്പെടെ വിവിധ ദേശിയ ചാമ്പ്യൻഷിപ്പിൽ ഒൻപത് മെഡലുകൾ അശ്വനി നേടിയിട്ടുണ്ട്. നേപ്പാളിൽ നടന്ന ഇന്റർനാഷണൽ സോഫ്റ്റ്‌ ബേസ് ബോൾ ചാമ്പ്യൻഷിപ്പിൽ ഇന്ത്യക്കായി സ്വർണ്ണ മെഡൽ നേടിയ അശ്വനി ദേശിയ സോഫ്റ്റ്‌ ബേസ് ബോൾ ചാമ്പ്യൻഷിപ്പിൽ സ്വർണ്ണ മെഡൽ നേടുകയും ബെസ്റ്റ് പ്ലയർ അവാർഡിന് അർഹത നേടുകയും ചെയ്തിരുന്നു. കാക്കയങ്ങാട് പഴശ്ശിരാജ കളരി അക്കാദമി ടീം അംഗമായ അശ്വനിയുടെ പരിശീലകൻ പി. ഇ. ശ്രീജയൻ ഗുരുക്കൾ ആണ്. പാറക്കണ്ടി പറമ്പിൽ കെ മധുസൂദനന്റെയും എ.ആശരതിയുടെയും മകളാണ് അശ്വതി. സംസ്ഥാന കളരി താരം ഐശ്വര്യ ഏക സഹോദരി ആണ്.

കാക്കയങ്ങാട് : അങ്കണവാടി വർക്കർ റാങ്ക് ലിസ്റ്റിൽ ക്രമക്കേടാരോപിച്ച് ബി.ജെ.പി മുഴക്കുന്ന് പഞ്ചായത്ത് ഓഫീസിലേക്ക് മാർച്ച് നടത്തി. റാങ്ക് ലിസ്റ്റിൽ സി.പി.എം നേതാക്കളുടെ സ്വന്തക്കാരേയും ബന്ധുക്കളേയും തിരുകിക്കയറ്റിയെന്നാരോപിച്ചാണ് ബി. ജെ.പി മുഴക്കുന്ന് പഞ്ചായത്ത് കമ്മറ്റി മാർച്ചും ധർണ്ണയും നടത്തിയത്. ജില്ലാ കമ്മറ്റിയംഗം സി.ബാബു ഉദ്ഘാടനം ചെയ്തു. പഞ്ചായത്ത് കമ്മറ്റി പ്രസിഡൻ്റ് എം.ഹരിദാസ് അധ്യക്ഷത വഹിച്ചു. എൻ.വി.ഗിരീഷ് , പി.കെ. ഷാബു, സുജേഷ് പാലക്ക,ജയൻ നാൽപ്പാടി,പി.കെ ഗിരീഷ്, ധന്യ രാജേഷ് എന്നിവർ പ്രസംഗിച്ചു.

മുഴക്കുന്ന് : തളിപ്പറമ്പ് നൃത്താഞ്ജലി നൃത്ത വിദ്യാലയത്തിലെ പഠിതാക്കളായ അമ്മമാരുടെ നേതൃത്വത്തിൽ മുഴക്കുന്ന് മൃദംഗ ശൈലേശ്വരി ക്ഷേത്ര മണ്ഡപത്തിൽ നൃത്തച്ചുവടുകൾ വെച്ച് നടന്ന അരങ്ങേറ്റം ശ്രദ്ധേയമായി. നൃത്താധ്യാപികയും നൃത്താഞ്ജലിയുടെ ഡയറക്ടറുമായ ജസീന്ത ജെയിംസിന്റെ നേതൃത്വത്തിലായിരുന്നു അരങ്ങേറ്റം. ആധുനിക ജീവിതത്തിൽ ശരീരത്തിന് വ്യായാമം വേണം എന്ന ചില അമ്മമാരുടെ ആഗ്രഹപ്രകാരമാണ് ജസീന്ത ജെയിംസ് അമ്മമാരുടെ സംഘത്തെ നൃത്തം പഠിപ്പിക്കാൻ തുടങ്ങിയത്. ഇവരുടെ രണ്ടുവർഷത്തെ നൃത്ത പഠനത്തിന് ശേഷമാണ് ഇപ്പോൾ മൃദംഗ ശൈലേശ്വരി ക്ഷേത്രത്തിൽ അരങ്ങേറ്റം നടത്തിയത്. അമ്മായി അമ്മയും മരുമകളും, റിട്ട. അദ്ധ്യാപിക, സ്റ്റാഫ് നേഴ്‌സ്, വീട്ടമ്മമാർ എന്നിവരടങ്ങിയ നൃത്ത സംഘത്തിൽ ജസീന്ത അടക്കം പന്ത്രണ്ടോളം അമ്മമാർ വേദയിൽ ചുവടുവെച്ചു.

ഭരതനാട്യത്തിലെ പ്രധാന ഇനങ്ങളായ പുഷ്പാഞ്ജലി, ജതി സ്വരം, ശബ്ദം, തോടി രാഗത്തിലുള്ള വർണ്ണം എന്നിവയാണ് ഒരു മണിക്കൂറോളം നീണ്ടുനിന്ന പരിപാടിയിൽ ഇവർ മൃദംഗ ശൈലേശ്വരിക്ക് മുന്നിൽ അവതരിപ്പിച്ചത്. പ്രശസ്ത നർത്തക ദമ്പതികളായ പത്മഭൂഷൺ വി.പി. ധനഞ്ജയൻ ശാന്ത ധനഞ്ജയൻ എന്നിവരെകൂടാതെ എൻ.വി. കൃഷ്ണൻ, സീതാ ശശിധരൻ എന്നിവരുടെ ശിഷ്യകൂടിയാണ് നൃത്താധ്യാപികയായ ജസീന്ത ജെയിംസ്. ഭരതനാട്യത്തിൽ ഡിപ്ലോമ നേടിയ ജസീന്ത നർത്തകിയും അഭിനേത്രിയും മുൻ കലാതിലകം കൂടിയായ ജാനറ്റ് ജെയിം സിന്റെ അമ്മകൂടിയാണ്.