കേരള കയർ തൊഴിലാളി ക്ഷേമനിധി ബോർഡ് വിദ്യാഭ്യാസ ധനസഹായത്തിന് അപേക്ഷ ക്ഷണിച്ചു. ക്ഷേമനിധിയിൽ അംഗത്വമെടുത്ത് 2024 മെയ് 31ന് രണ്ട് വർഷം പൂർത്തീകരിച്ച് കുടിശ്ശിക കൂടാതെ വിഹിതം അടച്ചു വരുന്ന തൊഴിലാളികളുടെ മക്കൾക്കാണ് ധനസഹായത്തിന് അർഹത. കേരളത്തിലെ ഗവ. അംഗീകൃത സ്ഥാപനങ്ങളിൽ സർക്കാർ അംഗീകൃത ഫുൾ ടൈം ഡിഗ്രി, പി ജി പ്രൊഫഷണൽ കോഴ്‌സുകൾ, പോളിടെക്‌നിക്, എഞ്ചിനീയറിംഗ്, മെഡിസിൻ, അഗ്രികൾച്ചർ, നഴ്‌സിംഗ്, പാരാമെഡിക്കൽ കോഴ്‌സുകളിൽ ഉപരിപഠനത്തിനാണ് ധനസഹായം. വിദ്യാഭ്യാസ സ്ഥാപന മേധാവി സാക്ഷ്യപ്പെടുത്തി നൽകുന്ന അപേക്ഷാ ഫോം കയർ തൊഴിലാളി ക്ഷേമനിധി ബോർഡിന്റെ എല്ലാ ഓഫീസുകളിലും ജനുവരി 31 വരെ സ്വീകരിക്കുമെന്ന് സിഇഒ അറിയിച്ചു. ഫോൺ : 0477 2251577.

ആയുര്‍വേദ, ഹോമിയോ, സിദ്ധ, യുനാനി ബിരുദ കോഴ്‌സുകളിൽ അപേക്ഷിച്ചവര്‍ക്ക് നാളെ വരെ നീറ്റ് ഫലം സമര്‍പ്പിക്കാം.ഫലം സമര്‍പ്പിക്കാന്‍ നാളെ 11 മണി വരെയാണ് വെബ്‌സൈറ്റില്‍ സൗകര്യം ഉണ്ടാകുക.അപേക്ഷയോടൊപ്പം സമര്‍പ്പിച്ച ഫോട്ടോ, ഒപ്പ്, നേറ്റിവിറ്റി, പത്താം ക്ലാസ് സര്‍ട്ടിഫിക്കറ്റ്, നാഷണാലിറ്റി എന്നിവയിൽ ന്യൂനത ഉണ്ടെങ്കിൽ പരിഹരിക്കാനും അപേക്ഷ ഫീസ് അടക്കാനും സൗകര്യമുണ്ട്.www.cee.kerala.gov.in കൂടുതൽ വിവരങ്ങള്‍ക്ക് സന്ദര്‍ശിക്കുക.

ആധാർ കാർഡ് സൗജന്യമായി പുതുക്കാനുള്ള സമയപരിധി ഡിസംബർ 14 വരെ നീട്ടി. ഈ സമയപരിധിക്ക് ശേഷം, ആധാർ കേന്ദ്രങ്ങളിലെ ഓരോ അപ്‌ഡേറ്റുകൾക്കും പ്രോസസ്സിംഗ് ഫീസ് ഈടാക്കും. ഔദ്യോഗിക ‘മൈ ആധാർ’ പോർട്ടലിലൂടെ ലഭ്യമാകുന്ന സേവനത്തിനുള്ള സമയപരിധി യുഐഡിഎഐ നീട്ടുന്നത് ഇത് രണ്ടാം തവണയാണ് എന്നത് ശ്രദ്ധേയമാണ്. പേര്, വിലാസം മറ്റ് വ്യക്തിപരമായ വിവരങ്ങൾ തുടങ്ങിയവ സൗജന്യമായി ഡിസംബർ 14 വരെ അപ്ഡേറ്റ് ചെയ്യാം. സൗജന്യ അപ്‌ഡേറ്റ് കാലയളവ് അവസാനിച്ചുകഴിഞ്ഞാൽ, ആധാർ കേന്ദ്രങ്ങളിൽ ഡോക്യുമെൻ്റ് അപ്‌ഡേറ്റുകൾക്കായി ഓരോ വ്യക്തിയും 50 രൂപ ഫീസ് നൽകേണ്ടിവരും.

ആധാർ കാർഡ് അപ്ഡേറ്റ് ചെയ്യുമ്പോൾ ആവശ്യമായ രേഖകൾ എന്തൊക്കെ?

നിങ്ങളുടെ ആധാർ കാർഡ് അപ്‌ഡേറ്റ് ചെയ്യുന്നതിന് ചില രേഖകൾ ആവശ്യമാണ്. തിരിച്ചറിയൽ രേഖയായി പാസ്‌പോർട്ടും വോട്ടർ ഐഡിയും വിലാസ തെളിവായി റേഷൻ കാർഡും സാമ്പത്തിക സ്ഥിരീകരണത്തിനുള്ള ബാങ്ക് പാസ്‌ബുക്കും ഇതിൽ ഉൾപ്പെടുന്നു

ആധാർ എങ്ങനെ അപ്‌ഡേറ്റ് ചെയ്യാം

Step 1– myaadhaar.uidai.gov.in,https://myaadhaar.uidai.gov.in എന്ന സൈറ്റിലേക്ക് പോകുക

Step 2 – ‘ myAadhaar’ എന്നതിന് താഴെയുള്ള ‘നിങ്ങളുടെ ആധാർ അപ്‌ഡേറ്റ് ചെയ്യുക’ എന്നതിൽ ക്ലിക്ക് ചെയ്യുക.

Step 3 – ‘ആധാർ വിശദാംശങ്ങൾ അപ്‌ഡേറ്റ് ചെയ്യുക (ഓൺലൈൻ)’ തുടർന്ന് ‘ഡോക്യുമെന്റ് അപ്‌ഡേറ്റ്’ തിരഞ്ഞെടുക്കുക

Step 4 – ആധാർ നമ്പർ നൽകുക, ക്യാപ്‌ച പൂരിപ്പിച്ച് ‘OTP’ ക്ലിക്ക് ചെയ്യുക.

Step 5 – റജിസ്റ്റർ ചെയ്ത മൊബൈൽ നമ്പറിലേക്ക് എത്തിയ OTP നൽകുക.

Step 6 – വിലാസമോ പേരോ പോലുള്ള, അപ്ഡേറ്റ് ചെയ്യേണ്ട വിശദാംശങ്ങൾ തിരഞ്ഞെടുക്കുക.

Step 7 – മാറ്റങ്ങൾ സ്ഥിരീകരിക്കാൻ പുതുക്കിയ ഡോക്യൂമെന്റുകൾ അറ്റാച്ചുചെയ്യുക.