പേരാവൂർ : തുടർപഠനത്തിന് വലിയ സാധ്യതകളാണ് ഇപ്പോഴുള്ളതെന്നും ജാഗ്രതയോടെ കോഴ്‌സുകൾ തിരഞ്ഞെടുക്കാൻ വിദ്യാർത്ഥികൾക്ക് കഴിയണമെന്നും സ്പീക്കർ എ.എൻ. ഷംസീർ പറഞ്ഞു. കുട്ടികളുടെ അഭിരുചി മനസ്സിലാക്കി അവർക്കുകൂടി താല്പര്യമുള്ള കോഴ്സ് പഠിപ്പിക്കാൻ രക്ഷിതാക്കൾ ശ്രദ്ധിക്കണമെന്നും സ്പീക്കർ അഭ്യർത്ഥിച്ചു.

പേരാവൂർ റീജണൽ ബാങ്ക് “വിജയോത്സവം 2024” ഉദ്ഘാടനം ചെയ്ത് സംസാരിക്കുകയായിരുന്നു സ്പീക്കർ. ബാങ്ക് പ്രസിഡന്റ് വി.ജി. പദ്മനാഭൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് കെ. സുധാകരൻ, പഞ്ചായത്ത് പ്രസിഡന്റ് പി.പി. വേണുഗോപാലൻ, ജില്ലാ പഞ്ചായത്തംഗങ്ങളായ ജൂബിലി ചാക്കോ, വി. ഗീത, പഞ്ചായത്തംഗങ്ങളായ എം. ഷൈലജ, റജീന സിറാജ്, ബേബി സോജ, ബാങ്ക് സെക്രട്ടറി എം.സി. ഷാജു, വി. പദ്മനാഭൻ, എ.കെ. ഇബ്രാഹിം, കെ. ഉണ്ണികൃഷ്ണൻ എന്നിവർ സംസാരിച്ചു.

ബാങ്ക് പ്രവർത്തന പരിധിയിൽ ഈ വർഷം എം.ബി. ബി.എസ് പാസായവർ, വിവിധ കായിക മത്സരങ്ങളിൽ അന്തർ ദേശീയ -ദേശീയ മെഡലുകൾ ലഭിച്ചവർ,  ഡിഗ്രികളിൽ റാങ്ക് നേടിയവർ, പ്ലസ് ടു-എസ്. എസ്. എൽ.സിയിൽ ഉന്നതവിജയം നേടിയവർ, വിവിധ മേഖലകളിൽ കഴിവ് തെളിയിച്ചവർ ഉൾപ്പെടെ 203 പേരെ ആദരിച്ചു.

പേരാവൂർ: ഭാരതീയ വ്യാപാരി വ്യവസായി സംഘം പേരാവൂർ യൂണിറ്റ് ഉടനുണ്ടാവാൻ സാധ്യത. ഇതിനുള്ള പ്രാരംഭ പ്രവർത്തനങ്ങൾ ഇതിനകം തുടങ്ങിക്കഴിഞ്ഞു. പേരാവൂരിലെ പ്രമുഖ വ്യാപാര സംഘടനയിൽ നിന്നുമുള്ള നിരവധി അംഗങ്ങൾ ഭാരതീയ വ്യാപാരി വ്യവസായി സംഘത്തിൽ (ബി.വി.വി.എസ്) ചേരുമെന്നാണ് ലഭിക്കുന്ന വിവരം. നിടുംപൊയിലിലും യൂണിറ്റ് രൂപീകരിക്കാൻ ശ്രമങ്ങൾ തുടങ്ങിയിട്ടുണ്ട്. പേരാവൂർ ബ്ലോക്കിലെ കേളകത്താണ് നിലവിൽ ബി.വി.വി.എസിന് യൂണിറ്റുള്ളത്. 110 അംഗങ്ങൾ കേളകത്തുണ്ട്. ഇവരിൽ 90 ശതമാനം അംഗങ്ങളും വ്യാപാരി വ്യവസായി ഏകോപന സമിതിയിൽ നിന്നും വിട്ടു വന്നവരാണെന്ന് ബി.വി.വി.എസ് കേളകം യൂണിറ്റ് ഭാരവാഹികൾ പറഞ്ഞു. മികച്ച പ്രവർത്തനമാണ് കേളകത്ത് ബി.വി.വി.എസ് നടത്തുന്നത്.

പേരാവൂരിൽ മൂന്ന് വ്യാപാര സംഘടനകൾ നിലവിലുണ്ട്. വ്യാപാരി വ്യവസായി ഏകോപന സമിതി, വ്യാപാരി വ്യവസായി സമിതി, യുണൈറ്റഡ് മർച്ചൻറ്സ് ചേംബർ എന്നീ സംഘടനകളാണ് പേരാവൂരിലുള്ളത്. ഇതിന് പുറമെയാണ് ഭാരതീയ വ്യാപാരി വ്യവസായി സംഘം പേരാവൂരിൽ യുണിറ്റ് രൂപീകരിക്കാനൊരുങ്ങുന്നത്.

പേരാവൂർ : അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് മലബാർ ട്രെയിനിങ് കോളേജ് എൻ. എസ്. എസ്.യൂണിറ്റ് ലഹരി വിരുദ്ധ ഫ്ലാഷ് മോബും ജനസദസ്സും സംഘടിപ്പിച്ചു. സിവിൽ എക്സൈസ് ഓഫീസർ പി. എസ്. ശിവദാസ് ഉദ്ഘാടനം ചെയ്തു. എൻ. എസ്. എസ്. സ്റ്റുഡന്റ് കോ ഓർഡിനേറ്റർ കെ. അനഘ അധ്യക്ഷത വഹിച്ചു. സബ് ഇൻസ്പെക്ടർ വി. ജെ.ജോസഫ്, പ്രീത കുര്യാക്കോസ്, അർസൽ അസീബിൻ മുഹമ്മദലി എന്നിവർ സംസാരിച്ചു.