ഇസ്‌തിരിപ്പെട്ടിയിൽ നിന്നും ഷോക്കേറ്റ് ഗൃഹനാഥൻ മരിച്ചു
കൊട്ടാരക്കര: തുണി തേക്കുന്നതിനിടെ വൈദ്യുതാഘാതമേറ്റ് വാളകം അമ്പലക്കര കോയിക്കൽ സിലി ഭവനിൽ അലക്‌സാണ്ടർ ലൂക്കോസ്(48) മരിച്ചു. വെള്ളിയാഴ്ച ഉച്ചയോടെ ആയിരുന്നു സംഭവം. വീട്ടിൽ മറ്റാരും ഉണ്ടായിരുന്നില്ല. ജോലി സ്ഥലത്തായിരുന്ന ഹരിത കർമ്മസേനാംഗമായ ഭാര്യ രാജി അലക്‌സാണ്ടറെ ഫോണിൽ വിളിച്ചെങ്കിലും കിട്ടിയില്ല. തുടർന്ന് വിവരം അറിയിച്ചതിനെ തുടർന്ന് അയൽവാസി എത്തി പരിശോധിച്ചപ്പോഴാണ് ഷോക്കേറ്റ നിലയിൽ അലക്‌സാണ്ടർ ലൂക്കോസിനെ കണ്ടെത്തിയത്. ഉടൻ തന്നെ താലൂക്ക് ആസ്പത്രിയിൽ എത്തിച്ചെങ്കിലും മരിച്ചു. വയയ്ക്കലിൽ ഓഡിറ്റോറിയം ജീവനക്കാരനായിരുന്നു. മൃതദേഹം കൊട്ടാരക്കര താലൂക്ക് ആസ്പത്രി മോർച്ചറിയിൽ. മകൻ: അജു.
