ഇരിട്ടി:മാലിന്യത്തിൽനിന്ന്‌ ജൈവവളം ഉൽപ്പാദിപ്പിച്ച്‌ വരുമാനത്തിന്റെ പുതിയമാതൃക തുറക്കുകയാണ്‌ ഇരിട്ടി നഗരസഭ. ഇരിട്ടി ടൗണിൽ നിന്ന്‌ ദിവസേന ശേഖരിക്കുന്ന മാലിന്യമാണ്‌ അത്തിത്തട്ട്‌ സംസ്കരണകേന്ദ്രത്തിൽ എത്തിച്ച്‌ ജൈവവളമാക്കി നഗരസഭ മാലിന്യനിർമാർജനത്തിന്റെ പുതു പാഠമെഴുതുന്നത്‌. മാലിന്യം വലിച്ചെറിയാനുള്ളതല്ല അത് വളമായും പണമായും മാറുമെന്ന പദ്ധതിക്കാണ്‌ തുടക്കമായത്‌. ജൈവ മാലിന്യങ്ങൾ സംസ്കരിച്ച്‌ ജൈവവളമാക്കുന്നതിലൂടെ തൊഴിലും വരുമാനവും ഉറപ്പാക്കുന്ന പദ്ധതിയാണ്‌ ഇവിടെ നടപ്പാക്കുന്നത്‌.
ജൈവമാലിന്യങ്ങൾ തുമ്പൂർമുഴി, വിൻട്രോ കമ്പോസ്റ്റ് സംവിധാനം വഴിയാണ്‌ സംസ്‌കരിക്കുന്നത്‌. ഹരിതകർമസേന ദിനംപ്രതി ശേഖരിക്കുന്ന ഒന്നര ടൺ ജൈവ മാലിന്യമാണ്‌ വളമാക്കുന്നത്‌.

ടൗണിലെ 55 വ്യാപാര സ്ഥാപനങ്ങളിൽനിന്നാണ് ജൈവ മാലിന്യങ്ങൾ യൂസർ ഫീ വാങ്ങി ശേഖരിക്കുന്നത്. ഇവ ഉണക്കിപ്പൊടിച്ച്‌ ജൈവവളമാക്കുന്നു. ഓരോ ദിവസത്തേയും മാലിന്യം 20 ദിവസത്തിനകം വളമാവുന്ന രീതിയിലാണ്‌ പദ്ധതി പ്രവർത്തനം. മഴക്കാലത്ത്‌ 40 ദിവസംകൊണ്ട്‌ വളം ഉൽപ്പാദിപ്പിക്കാനാവും. ‘ജൈവാമൃതം’ എന്ന പേരിലാണ് നഗരസഭയുടെ ജൈവവളം വിൽപ്പനയാരംഭിച്ചത്‌. 25 കിലോ പാക്കറ്റിന്‌ 100 രൂപയാണ്‌ വില. തുടർന്നുള്ള ദിവസങ്ങളിൽ ഉൽപ്പാദനംകൂട്ടി വളം വിൽപ്പന വ്യാപിപ്പിക്കാനാവുമെന്ന്‌ നഗരസഭാ ക്ലീൻ സിറ്റി മാനേജർ കെ വി രാജീവൻ പറഞ്ഞു. ജൈവവള വിൽപ്പനയും സംസ്കരണ കേന്ദ്രത്തിലെ എം.സി.എഫിൽ അഗ്നിരക്ഷാ ഉപകരണങ്ങൾ ഘടിപ്പിക്കലും നഗരസഭാ ചെയർമാൻ കെ ശ്രീലത ഉദ്‌ഘാടനംചെയ്തു. വൈസ് ചെയർമാൻ പി.പി ഉസ്മാൻ അധ്യക്ഷനായി. എ.കെ രവീന്ദ്രൻ, കെ.സുരേഷ്, പി രഘു, എൻ കെ ഇന്ദുമതി, ആർ.പി ജയപ്രകാശ് പന്തക്ക, പി. ആർ അശോകൻ എന്നിവർ സംസാരിച്ചു.

ഇരിട്ടി:വിനോദസഞ്ചാരികൾക്ക്‌ കണ്ണിനും മനസ്സിനും കുളിർമ പകരുന്ന പെരുമ്പറമ്പിലെ ഇരിട്ടി ഇക്കൊ പാർക്ക്‌ ജില്ലയിലെ ഹരിത ടൂറിസം കേന്ദ്രമായി. മാലിന്യമുക്ത നവകേരളം ജനകിയ ക്യാമ്പയിൻ ഭാഗമായി ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യൻ പ്രഖ്യാപനം നിർവഹിച്ചു. മാലിന്യ സംസ്കരണം, ശുദ്ധമായ കുടിവെള്ളം, ജലസ്രോതസ്സുകളുടെ സംരക്ഷണം, ഊർജ സംരക്ഷണം എന്നിവ സംയോജിപ്പിച്ചുള്ള സംരംഭം എന്ന നിലക്കാണ്‌ പാർക്കിന്‌ ഹരിത ടൂറിസം പദവി നേടാനായത്‌. ജനങ്ങളുടെ തൊഴിൽ സാധ്യത, ജീവിത നിലവാരം ഉയർത്തൽ എന്നിവ ലക്ഷ്യമാക്കിയാണ്‌ പ്രവർത്തനം. സംസ്ഥാനത്ത് 74 ടൂറിസം കേന്ദ്രങ്ങളാണ് ഹരിത ടൂറിസം പട്ടികയിൽ വികസിപ്പിക്കുന്നത്‌. മാലിന്യമുക്ത നവകേരളം ജനകീയ ക്യാമ്പയിൻ ഭാഗമായി ബ്ലോക്കിലെ മാതൃകാ സംരംഭമായി പാർക്കിനെ തെരഞ്ഞെടുത്തിരുന്നു.പഞ്ചായത്ത് പ്രസിഡന്റ്‌ പി. രജനി അധ്യക്ഷയായി. ജയപ്രകാശ് പന്തക്ക, പഞ്ചായത്ത് വൈസ് പ്രസിസന്റ് എം. വിനോദ്കുമാർ, കെ എൻ പത്മാവതി, അഡ്വ: കെ ഹമീദ്, പഞ്ചായത്ത് സ്ഥിരം സമിതി അധ്യക്ഷ വി പ്രമീള, ബിജു കോങ്ങാടൻ, ജെ സുശീൽ ബാബു, പി. അശോകൻ എന്നിവർ സംസാരിച്ചു.

ഇരിട്ടി: നഗരസഭ പരിധിയിൽ വിവിധ ഭാഗങ്ങളിൽ മാലിന്യം തള്ളുന്നവർ ജാഗ്രതൈ.നിങ്ങളെ നിരീക്ഷിക്കാൻ രഹസ്യ കാമറകൾ കണ്ണു തുറന്നിട്ടുണ്ട്.ഇരിട്ടി നഗരസഭ പരിധിയിലെ ആളൊഴിഞ്ഞ പ്രദേശത്തും ജലാശയങ്ങളിലും ജനവാസ മേഖലയിലും പാതയോരങ്ങളിലും മാലിന്യം നിക്ഷേപിക്കുന്നത് തടയുന്നതിനും അത്തരം പ്രവർത്തനങ്ങൾ നിരീക്ഷിക്കുന്നതിനും നടപടികൾ സ്വീകരിക്കുന്നതിനുമായാണ് നഗരസഭയുടെ വാർഷിക പദ്ധതിയിൽ ഉൾപ്പെടുത്തി നഗരസഭയുടെ വിവിധ പ്രദേശങ്ങളിലായി 24 സി.സി.ടി.വി കാമറകൾ സ്ഥാപിച്ചത്.പഴശ്ശി ജലാശാലയം ഉൾപ്പെടെ മാലിന്യമുക്തമായി സംരക്ഷക്കുന്നതിനുൾപ്പെടെ ലക്ഷ്യമിട്ട് സ്ഥാപിച്ച നിരീക്ഷണ കാമറ ഇന്നലെ മുതൽ പ്രവർത്തനസജ്ജമായി.

ഇരിട്ടി നഗരത്തിലും നഗരസഭയുടെ ഒഴിഞ്ഞ പ്രദേശങ്ങളിലും മാലിന്യം അനധികൃതമായി തള്ളുന്നത് 24 മണിക്കുറും പരിശോധിക്കുന്നതിന് നിരീക്ഷണ കാമറകൾ പ്രവർത്തനക്ഷമമാകുന്നതോടെ സാധ്യമാകും.ഇതിൻ്റെ ഭാഗമായി മാലിന്യം തള്ളുന്നവർക്ക് എതിരെ കർശനമായ നടപടികൾ സ്വീകരിക്കുന്നതിനുള്ളനടപടി നഗരസഭയുടെ നേതൃത്വത്തിൽ ആരംഭിച്ചു. നിരീക്ഷണ കാമറയുടെ പ്രവർത്തനോദ്ഘാടനം നഗരസഭ ചെയർ പേഴ്സൺ കെ.ശ്രീലത നിർവ്വഹിച്ചു.വൈസ് ചെയർമാൻ പി.പി.ഉസ്മാൻ അധ്യക്ഷനായി.നഗരസഭ കൗൺസിലർ .പി.രഘു ശുചിത്വ പ്രതിജ്ഞ ചൊല്ലികൊടുത്തു.സ്റ്റാൻ്റിംങ്ങ് കമ്മിറ്റി ചെയർമാൻമാരായ എ.കെരവിന്ദ്രൻ ,കെ.സുരേഷ്, കൗൺസിലർ മാരായവി.പി.അബ്ദുൾ റഷിദ്,യു.കെ.ഫാത്തിമ, ക്ലിൻ സിറ്റി മാനേജർ രാജിവൻ കെ.വി. ഹരിത കേരള മിഷൻ ആർ.പി.ജയ പ്രകാശ് പന്തക്ക, ആസുത്രണ സമിതി ഉപാധ്യക്ഷൻ കെ.ആർ അശോകൻ, എന്നിവർ സംസാരിച്ചു.