ഡ്യൂപ്ലിക്കേറ്റ് ആര്‍.സി.ക്ക് പൊലീസ് സര്‍ട്ടിഫിക്കറ്റ് ആവശ്യമില്ല
തിരുവനന്തപുരം: വാഹന രജിസ്ട്രേഷൻ സർട്ടിഫിക്കറ്റിൻ്റെ പകർപ്പിന് (ആർ.സി) പൊലീസ് റിപ്പോർട്ട് ഒഴിവാക്കി ഗതാഗത വകുപ്പ്. കേന്ദ്രനിർദേശത്തെ തുടർന്നാണ് നടപടി. നിലവിൽ ആർ.സി.യുടെ ഡ്യൂപ്ലിക്കേറ്റിന് പൊലീസ് സ്‌റ്റേഷനിൽ നിന്നുള്ള ലോസ്റ്റ് സർട്ടിഫിക്കറ്റ് നിർബന്ധമായിരുന്നു. ആർ.സി കാണാതായെന്നും വീണ്ടെടുക്കുക സാധ്യമല്ലെന്നുമാണ് പൊലീസ് സാക്ഷ്യപ്പെടുത്തി നൽകേണ്ടിയിരുന്നത്. ഈ നടപടിക്രമമാണ് ഒഴിവാക്കിയത്. പത്രപരസ്യം നൽകിയാൽ അതിൻ്റെ പകർപ്പ് ഹാജരാക്കി ആർ.സി പകർപ്പിന് അപേക്ഷിക്കാം. വാഹന രജിസ്ട്രേഷൻ രേഖകൾ ഓൺലൈനിൽ ലഭ്യമായതിനാൽ അസ്സൽ പകർപ്പുകളുടെ ഉപയോഗം കുറഞ്ഞിട്ടുണ്ട്. ഈ സാഹചര്യത്തിലാണ് പകർപ്പ് എടുക്കാനുള്ള നടപടിക്രമം ലഘൂകരിച്ചത്.
