ഇരിട്ടി : പടിയൂര്‍ പൂവം കടവിൽ കാണാതായ വിദ്യാര്‍ഥിനിയുടെ മൃതദേഹം കണ്ടെത്തി. എടയന്നൂർ ഹഫ്സത്ത് മൻസിലിൽ പരേതനായ അഹമ്മദ് കുട്ടിയുടെയും ഹഫ്സത്തിന്റെയും മകൾ ഷഹര്‍ബാനയുടെ മൃതദേഹമാണ് ഒഴുക്കില്‍പ്പെട്ട സ്ഥലത്ത് നിന്നും 300 മീറ്റര്‍ അകലെ നിന്നും കണ്ടെത്തിയത്. രണ്ട് ദിവസങ്ങലായി തിരച്ചിൽ  നടത്തുന്നതിനിടയിലാണ് മൃതദേഹം കണ്ടെത്തിയത്. ഷഹർബാനക്കൊപ്പം ഒഴുക്കിൽപ്പെട്ട് കാണാതായ ചക്കരക്കൽ സ്വദേശിനി സൂര്യയുടെ മൃതദേഹം ഇനിയും കണ്ടെത്താനുണ്ട്. ഇന്നലെ സന്ധ്യയോടെ എത്തിയ 30 അംഗ എൻ.ഡി.ആർ.എഫ് സംഘം രാവിലെ മുതൽ തിരച്ചിൽ തുടരുകയാണ്.

ചൊവ്വാഴ്ച വൈകുന്നേരം അഞ്ചുമണിയോടെയാണ് പടിയൂര്‍ പൂവം കടവിൽ കോളേജ് വിദ്യാര്‍ത്ഥിനികള്‍ ഒഴുക്കില്‍പ്പെട്ടത്. ചാലോട് സ്വദേശിനികളായ സൂര്യ , ഷഹര്‍ബാന എന്നിവരെയാണ് ഒഴുക്കില്‍ കാണാതായത്. പൂവം സ്വദേശിനിയും സഹപാഠികമായ ജസീനയുടെ വീട് സന്ദര്‍ശിക്കാന്‍ എത്തിയതായിരുന്നു ഇവര്‍. മൂവരും ചേര്‍ന്ന് ജസീനയുടെ വീടിനു സമീപമുള്ള കടവിലേക്ക് പോവുകയായിരുന്നു. പുഴയില്‍ ഇറങ്ങി കുളിക്കുന്നതിനിടയാണ് ഇരുവരും ഒഴുക്കില്‍പ്പെട്ടത്. ഈ സമയം ഇവിടെ മീന്‍ പിടിക്കുകയായിരുന്നവരുടെ വലയില്‍ വിദ്യാര്‍ഥിനികളില്‍ ഒരാള്‍ കുരുങ്ങിയെങ്കിലും ഇവരെ രക്ഷിക്കാനുള്ള ശ്രമത്തിനിടെ വീണ്ടും ഒഴുക്കില്‍പ്പെടുകയായിരുന്നു.

കോളയാട് : കാട്ടാന അക്രമണം പതിവായ പെരുവ പറക്കാടിലെ ജനവാസകേന്ദ്രത്തിലെ കൃഷിയിടത്തിൽ പകലും കാട്ടാനകളെത്തി കൃഷി നശിപ്പിച്ചു. ബുധനാഴ്ച പുലർച്ചെയെത്തിയ കാട്ടാനക്കൂട്ടം പറക്കാട് വിജയന്റേതുൾപ്പെടെ നിരവധി കർഷകരുടെ കാർഷിക വിളകൾ വ്യാപകമായി നശിപ്പിച്ചു. രാവിലെ കൃഷിയിടത്തിൽ കണ്ട കാട്ടാനകളെ വനം വകുപ്പ് ജീവനക്കാരും നാട്ടുകാരും ചേർന്ന് തുരത്തിയിരുന്നു.

തദ്ദേശീയരടക്കം കാട്ടാനകളെ തുരത്താൻ കാവൽ തുടരുമ്പോഴും വിവിധ പ്രദേശങ്ങളിൽ കാട്ടാനകളെത്തി കൃഷി നശിപ്പിക്കുന്നത് തുടരുകയാണ്. കഴിഞ്ഞ 11 ദിവസവും കോളയാട് പഞ്ചായത്തിലെ വിവിധ ഭാഗങ്ങളിൽ കാട്ടാനകൾ കൃഷി നശിപ്പിച്ചിട്ടുണ്ട്. വാച്ചർമാർ കുറവായതിനാൽ പട്രോളിങ്ങ് കാര്യക്ഷമമല്ലെന്നാണ് കർഷകർ പറയുന്നത്.

വനാതിർത്തിയിലെ ജനവാസ കേന്ദ്രങ്ങളിൽ നിന്നും കാട്ടാനകളെ തുരത്താൻ അധികൃതർ അലംഭാവം കാട്ടുന്നുവെന്നാണ് കർഷകരുടെ ആക്ഷേപം. കാട്ടാനകളെ ഉൾവനത്തിലേക്ക് തുരത്തിയ ശേഷം പ്രതിരോധ സംവിധാനമൊരുക്കണമെന്നും നാട്ടുകാർ ആവശ്യപ്പെട്ടു.

പേരാവൂർ: ഹിന്ദു ഐക്യവേദി പേരാവൂർ താലൂക്ക് കമ്മിറ്റി രാഹുൽ ഗാന്ധിയുടെ കോലം കത്തിച്ച് പ്രതിഷേധിച്ചു. പ്രതിപക്ഷ നേതാവ് രാഹുൽ ഗാന്ധി പാർലമെന്റിൽ ഹൈന്ദവരെ അപമാനിച്ച് സംസാരിച്ചുവെന്നാരോപിച്ചാണ് ഹിന്ദു ഐക്യവേദി പ്രവർത്തകർ രാഹുലിന്റെ കോലം കത്തിച്ചത്. സി. ആദർശ്, കെ.കെ. രാജു, ടി. വൈശാഖ്, കെ.കെ. ശ്യാം, ഷമൽ വെള്ളർവള്ളി എന്നിവർ നേതൃത്വം നല്കി.