നവകേരള ബസ് ഇനി കോഴിക്കോട്-ബെംഗളൂരൂ റൂട്ടില്‍; ആദ്യ സര്‍വീസിന് ബുക്കിങ് ഫുള്‍
സംസ്ഥാന സര്‍ക്കാര്‍ നടത്തിയ നവകേരള സദസ്സില്‍ മന്ത്രിസഭ യാത്രചെയ്ത ബസിന്റെ പ്രതിദിന സര്‍വീസ് ഞായറാഴ്ച തുടങ്ങും. കോഴിക്കോട്-ബെംഗളൂരു റൂട്ടിലാണ് ‘നവകേരള ബസ്’ സര്‍വീസ് നടത്തുക. പുലര്‍ച്ചെ നാലിന് കോഴിക്കോട്ടുനിന്ന് പുറപ്പെട്ട് 11.30-ന് ബെംഗളൂരുവിലെത്തും. ഉച്ചയ്ക്ക് 2.30-ന് ബെംഗളൂരുവില്‍ നിന്ന് യാത്രയാരംഭിച്ച് രാത്രി 10-ന് കോഴിക്കോട്ടെത്തും. താമരശ്ശേരി, കല്പറ്റ, സുല്‍ത്താന്‍ ബത്തേരി, മൈസൂരു വഴിയാണ് സര്‍വീസ്.
കെ.എസ്.ആര്‍.ടി.സിയുടെ അന്തര്‍സംസ്ഥാന സര്‍വീസ് ഗരുഡപ്രീമിയം ആയാണ് ബസ് ഓടുന്നത്. യാത്രക്കിടയില്‍ വിനോദത്തിനായി ടെലിവിഷനും മ്യൂസിക് സിസ്റ്റവും മൊബൈല്‍ ചാര്‍ജര്‍ സംവിധാനവും ലഭ്യമാക്കിയിട്ടുണ്ട്. ലഗ്ഗേജ് സൂക്ഷിക്കുവാനുള്ള സ്ഥലവുമുണ്ട്. 1.16 കോടി രൂപ മുടക്കി വാങ്ങിയ ഭാരത് ബെന്‍സിന്റെ ഈ ആഡംബര ബസ് കെ.എസ്.ആര്‍.ടി.സിയുടെ ബജറ്റ് ടൂറിസം പദ്ധതിക്കായി ഉപയോഗിക്കുമെന്നായിരുന്നു ആദ്യ സൂചനകള്‍.
.jpg?$p=16fa539&w=852&q=0.8)
ഭാരത് ബെന്‍സിന്റെ ഒ.എഫ്. 1624 ഷാസിയില്‍ പ്രകാശ് ബോഡിയുമായി ഈ വാഹനം ഒരുങ്ങിയിരിക്കുന്നത്. കോണ്‍ട്രാക്ട് കാര്യേജ് പെര്‍മിറ്റില്‍ എത്തിയിരുന്ന ഈ വാഹനം റൂട്ടില്‍ സര്‍വീസ് നടത്തുന്നതിനായി സ്റ്റേജ് ക്യാരേജ് പെര്‍മിറ്റിലേക്ക് മാറുകയായിരുന്നു. മെയ് അഞ്ചാം തീയതി മുതല്‍ കോഴിക്കോട്-ബെംഗളൂരൂ റൂട്ടില്‍ സര്‍വീസ് നടത്തുന്നതിനായി ഒന്നാം തീയതി തിരുവനന്തപുരത്ത് നിന്ന് ഈ നവകേരള ബസ് കോഴിക്കോട് എത്തിക്കുകയായിരുന്നു.
