റോഡരികിൽ നിർത്തിയിട്ടിരുന്ന കാറിനുള്ളിൽ അധ്യാപകൻ മരിച്ച നിലയിൽ
കൊട്ടാരക്കര: എം.സി. റോഡിൽ കലയപുരത്ത് നിർത്തിയിട്ടിരുന്ന കാറിനുള്ളിൽ അധ്യാപകനെ മരിച്ച നിലയിൽ കണ്ടെത്തി. കൈകളിൽ പൊള്ളലേറ്റതു പോലുള്ള പാടുകളുണ്ട്. പറക്കോട് ജ്യോതിസിൽ മണികണ്ഠൻ ( 52) ആണ് മരിച്ചത്.
ഇന്ത്യൻ ഓയിൽ പെട്രോൾ പമ്പിന് എതിർ വശത്തായി റോഡരികിൽ നിർത്തിയ നിലയിലായിരുന്നു കാർ. ഡ്രൈവർ സീറ്റിനു സമീപമുള്ള സീറ്റിൽ ചാരിയിരിക്കുന്ന നിലയിലായിരുന്നു മൃതദേഹം. വ്യാഴാഴ്ച ഉച്ച മുതൽ കാർ ഇവിടെ ഉണ്ടായിരുന്നതായി സമീപവാസികൾ പറയുന്നു. സംശയം തോന്നിയ നാട്ടുകാർ രാത്രിയോടെ നടത്തിയ പരിശോധനയിലാണ് മരിച്ച നിലയിൽ ആളിനെ കണ്ടെത്തിയത്.
അങ്ങാടിക്കൽ ഹയർ സെക്കൻഡറി സ്കൂളിലെ അധ്യാപകനായിരുന്നു. പോലീസും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി.
