ആപ്പിള്‍ ഐഡി അകാരണമായി ലോഗ് ഔട്ട് ആയി; അമ്പരന്ന് ഉപഭോക്താക്കള്‍
ആപ്പിള്‍ ഉപഭോക്താക്കളെ ആശങ്കയിലാക്കി പുതിയ ബഗ്ഗ്. ഉപഭോക്താക്കളുടെ ഉപകരണത്തില്‍ നിന്ന് ആപ്പിള്‍ ഐഡി അകാരണമായി ലോഗ് ഔട്ട് ആയതാണ് ആശങ്കയ്ക്കിടയാക്കിയത്. ലോഗ് ഔട്ട് ആയതിന് പിന്നാലെ പലര്‍ക്കും പാസ് വേഡ് മാറ്റാനുള്ള നിര്‍ദേശവും വന്നു. വലിയൊരു വിഭാഗം ഉപഭോക്താക്കള്‍ക്കും ഈ പ്രശ്‌നം അനുഭവപ്പെട്ടിട്ടുണ്ട്. പലരും വീണ്ടും ലോഗിന്‍ ചെയ്യുന്നതിനായി പാസ് വേഡ് മാറ്റുകയും ചെയ്തു.
ഉപഭോക്താക്കള്‍ പലരും സോഷ്യല്‍ മീഡിയാ വെബ്‌സൈറ്റായ എക്‌സില്‍ ഈ പ്രശ്‌നം നേരിട്ടതായി അറിയിച്ച് രംഗത്തെത്തി. പലരും ആപ്പിള്‍ സേവനങ്ങള്‍ ഉപയോഗിക്കുന്നതിനിടെയാണ് ആപ്പിള്‍ ഐഡി ലോഗ് ഔട്ട് ആയത്. ഫേസ് ടൈം കോളിനിടെ അക്കൗണ്ട് ലോഗ് ഔട്ട് ആയതായി ഒരു ഉപഭോക്താവ് എക്‌സില്‍ പോസ്റ്റ് പങ്കുവെച്ചു.
ഇത്തരം സംഭവങ്ങള്‍ മെറ്റ ഉള്‍പ്പടെയുള്ള മറ്റ് കമ്പനികള്‍ക്കും നേരിടേണ്ടി വന്നിട്ടുണ്ട്. 2017 ല്‍ സമാനമായ അനുഭവം ആപ്പിള്‍ സേവനങ്ങളില്‍ ഉണ്ടായിട്ടുണ്ട്. അന്നും നിരവധി ആളുകളെ പ്രശ്‌നം ബാധിച്ചിരുന്നു.
