കണ്ണൂർ : പതിനെട്ടാം ലോക്‌സഭാ തെരഞ്ഞെടുപ്പിന്‌ കേരള ജനതയെ സജ്ജമാക്കിയ രാഷ്‌ട്രീയ പര്യടനം വിജയകരമായി പൂർത്തിയാക്കി മുഖ്യമന്ത്രി പിണറായി വിജയൻ. പിന്നിട്ട മൂന്നാഴ്‌ച കേരള രാഷ്‌ട്രീയത്തിന്റെ ദിശ നിർണയിച്ചത്‌ പിണറായിയാണ്‌. 

തെരഞ്ഞെടുപ്പിലെ ചർച്ചാവിഷയങ്ങൾ ഓരോന്നായി രൂപപ്പെടുത്തിയ പ്രസംഗങ്ങളുമായി 20 ദിവസത്തെ പര്യടനം സാർഥകമായ പരിസമാപ്തിയിലേക്ക്‌. ചൊവ്വ വൈകിട്ട്‌ തലശേരിയിലെ റാലിയോടെ മുഖ്യമന്ത്രിയുടെ ലോക്‌സഭാ തെരഞ്ഞെടുപ്പ്‌ ക്യാമ്പയിൻ പൂർത്തിയാകും. 

1999ൽ അധികാരത്തിലേറിയ വാജ്‌പേയി സർക്കാരിനെ താഴെയിറക്കാൻ 2004ൽ ഇടതുപക്ഷം പിന്തുണച്ച ഒന്നാം യു.പി.എ സർക്കാർ, കോൺഗ്രസിന്റെ വലതുനയങ്ങൾക്ക്‌ കടിഞ്ഞാണിട്ട്‌ തൊഴിലുറപ്പുനിയമം ഉൾപ്പെടെ നടപ്പാക്കിയ അഞ്ചുവർഷം, ഇടതുപക്ഷ പിന്തുണയില്ലാത്ത രണ്ടാം യു.പി.എ അഞ്ചുവർഷം നടപ്പാക്കിയ ജനവിരുദ്ധ നയങ്ങൾ, ജനരോഷം മുതലെടുത്ത്‌ അധികാരത്തിൽ വന്ന മോദി സർക്കാർ, 2019ൽ വീണ്ടും അധികാരത്തിൽ എത്തിയതോടെ ഭരണഘടനയും മതനിരപേക്ഷതയും ജനാധിപത്യവും തകർത്ത്‌ അടിച്ചേൽപ്പിച്ച ആർ.എസ്‌.എസിന്റെ തീവ്രവർഗീയത, ഈ ഭരണം തുടർന്നാൽ ഇല്ലാതാകുന്ന നമ്മുടെ ഇന്ത്യ… കാൽനൂറ്റാണ്ടിലെ ഇന്ത്യൻ രാഷ്‌ട്രീയചലനങ്ങൾ സൂക്ഷ്മമായി ചുരുക്കം വാക്കുകളിൽ വിശകലനം ചെയ്‌ത്‌ ലോക്‌സഭാ തെരഞ്ഞെടുപ്പിന്റെ രാഷ്‌ട്രീയ സാഹചര്യങ്ങളിലേക്ക്‌ കടക്കുന്നു. 

എതിരാളികളുടെ നെഞ്ചിൽ ചാട്ടുളിപോലെ തറക്കുന്ന വാക്കുകളും പ്രയോഗങ്ങളും പതിവുപോലെ പിണറായിയുടെ പ്രസംഗങ്ങളിൽ തിളങ്ങി നിന്നു. ഇടതുപക്ഷത്തിന്റെയും ബിജെപിയുടെയും കോൺഗ്രസിന്റെയും പക്ഷമേതെന്ന വിവരണം, ആപത്തിനെ പ്രതിരോധിക്കാൻ ഇടതുപക്ഷത്തിന്‌ വോട്ട്‌ ചെയ്യണമെന്ന ആഹ്വാനം, നുണപ്രചാരണങ്ങളെ കടന്നാക്രമിച്ചുള്ള കത്തിക്കയറൽ. പിണറായി വിജയന്റെ തെരഞ്ഞെടുപ്പ് പ്രചാരണ പര്യടനം കേരളത്തിലെ രണ്ടേമുക്കാൽ കോടിയോളം വോട്ടർമാരുടെ ആശയരൂപീകരണമായി മാറി. 

മാർച്ച്‌ 30ന്‌ തിരുവനന്തപുരത്തുനിന്ന്‌ ആരംഭിച്ച പര്യടനത്തിൽ 20 ലോക്‌സഭാ മണ്ഡലങ്ങളിലായി അറുപതോളം റാലികളിൽ പിണറായി പങ്കെടുത്തു. ഓരോന്നും ഇന്ത്യൻ രാഷ്‌ട്രീയത്തിന്റെ വർത്തമാനാവസ്ഥയിലേക്കുള്ള ഇറങ്ങിച്ചെല്ലൽ. എൽ.ഡി.എഫ്‌ ഭരണത്തിൽ പ്രതിസന്ധികളെ അതിജീവിച്ച്‌ നടത്തിയ പുനർനിർമാണത്തിന്റെയും നവകേരളസൃഷ്ടിയുടെയും സാക്ഷ്യം. എന്തുകൊണ്ട്‌ ഇടതുപക്ഷം എന്ന ചോദ്യത്തിനുള്ള ഉത്തരം ജനമനസ്സുകളിൽ പതിപ്പിച്ചുള്ള യാത്ര കേരളരാഷ്‌ട്രീയത്തിലെ സുപ്രധാനമായ അടയാളപ്പെടുത്തലാണ്‌. 

നരേന്ദ്ര മോദിയുടെ നേതൃത്വത്തിൽ രാജ്യത്ത്‌ അടിച്ചേൽപ്പിച്ച തീവ്രവർഗീയതയുടെ ആപത്ത്‌ വിശദീകരിച്ചുള്ള പ്രസംഗങ്ങൾ. ജനജീവിതം അത്യന്തം ദുസ്സഹമായ സാഹചര്യത്തിൽ കോൺഗ്രസിന്റെ സമീപനത്തെ ചോദ്യംചെയ്യുന്നു. ബി.ജെ.പി.ക്കെതിരെ പൊരുതാൻ ത്രാണിയില്ലാത്ത, ആത്മാർഥതയില്ലാത്ത കോൺഗ്രസ്‌ നേതൃത്വത്തിന്റെ ഒളിച്ചോട്ടം വിവരിക്കുന്നു. രാഹുൽ ഗാന്ധി ഉൾപ്പെടെയുള്ള നേതാക്കൾ നടത്തിയ വിമർശങ്ങൾക്ക്‌ അക്കമിട്ട് മറുപടി. 

നൂറ്റാണ്ടുകണ്ട പ്രളയത്തിൽ തകർന്നടിഞ്ഞ നാടിനെ കരകയറ്റാൻ ജനങ്ങളാകെ ഒന്നിച്ചുനിന്നപ്പോഴും പ്രതികാരനടപടി സ്വീകരിച്ച കേന്ദ്രഭരണം, സംസ്ഥാനത്തെ സാമ്പത്തികമായി ഞെരുക്കിയ കേന്ദ്രസർക്കാരിനെ പിന്തുണച്ച കോൺഗ്രസ്‌, രാഹുൽ ഗാന്ധി ഉൾപ്പെടെയുള്ള 18 യു.ഡി.എഫ്‌ എം.പി.മാരും പാർലമെന്റിൽ സ്വീകരിച്ച മൃദുസമീപനവും കേരള വിരുദ്ധതയും, കേരളത്തിന്റെ അവകാശങ്ങൾ നേടിയെടുക്കുന്നതിനും ബി.ജെ.പി.യുടെ വർഗീയ അജൻഡ ചെറുക്കുന്നതിനും എൽ.ഡി.എഫ്‌ എം.പി.മാർ വേണമെന്ന വിവരണം. വിഷയാധിഷ്ഠിത വിശകലനമായിരുന്നു ഓരോ പ്രസംഗവും.