ഹോംസ്‌റ്റേയില്‍ അതിക്രമിച്ചു കയറി അക്രമം; രണ്ട് യുവാക്കളെ ബത്തേരി പോലീസ് പിടികൂടി
ബത്തേരി: ഹോംസ്‌റ്റേയില്‍ അതിക്രമിച്ചു കയറി ജനല്‍ ചില്ലുകള്‍ അടിച്ചുതകര്‍ക്കുകയും മൊബൈല്‍ ഫോണും വാച്ചും ഷര്‍ട്ടും കവരുകയും ചെയ്ത സംഭവത്തില്‍ യുവാക്കള്‍ പിടിയില്‍. കല്‍പ്പറ്റ, വേങ്ങപ്പളളി, വൈശാലി വീട്ടില്‍ അശ്വിന്‍ കുമാര്‍ (21), കല്‍പ്പറ്റ തുര്‍ക്കി ചാലിപ്പടി വീട്ടില്‍ ഷാഹുല്‍ ഹമീദ് (25) എന്നിവരെയാണ് ബത്തേരി എസ്.ഐ കെ.വി. ശശികുമാറിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്.
സംഭവശേഷം ഒളിവില്‍ കഴിയുകയായിരുന്ന ഇവരെ കല്‍പ്പറ്റയില്‍ നിന്നാണ് പിടികൂടിയത്. സംഭവവുമായി ബന്ധപ്പെട്ട് രണ്ടുപേരെകൂടി പിടികൂടാനുണ്ട് എന്ന് പോലീസ് അറിയിച്ചു. 2023 സെപ്തംബറിലാണ് കേസിനാസ്പദമായ സംഭവം.
നാല് യുവാക്കള്‍ രാത്രി ഹോംസ്‌റ്റേയില്‍ അതിക്രമിച്ചു കയറി. പഴുപ്പത്തൂരുള്ള സ്ഥാപനത്തിന്റെ മുന്‍ ഭാഗത്തും പിന്‍ ഭാഗത്തുമുള്ള ജനല്‍ ചില്ലുകള്‍ അടിച്ചുതകര്‍ക്കുകയും അകത്ത് കയറി ബാഗില്‍ സൂക്ഷിച്ചിരുന്ന മൊബൈല്‍ ഫോണും വാച്ചും ഷര്‍ട്ടും കവരുകയും ചെയ്തു എന്നാണ് പരാതി.
പൊന്നാനി സ്വദേശിയാണ് പരാതി നൽകിയത്. സിവില്‍ പോലീസ് ഓഫിസര്‍മാരായ ടി.ആര്‍. രജീഷ്, കെ.ബി. അജിത്ത്, നിയാദ്, അനിത്ത്കുമാര്‍, അജ്മല്‍ എന്നിവരാണ് അന്വേഷണ സംഘത്തില്‍ ഉണ്ടായിരുന്നത്.
