കാറിടിച്ച് സ്കൂട്ടർ യാത്രക്കാരി മരിച്ചു; മകന് പരിക്ക്
നേമം: നരുവാമൂട് മൊട്ടമൂട്ടിൽ കാറിടിച്ച് സ്കൂട്ടർ യാത്രക്കാരി മരിച്ചു. പിന്നിലിരുന്ന മകന് പരിക്ക്. പ്രാവച്ചമ്പലം മൊട്ടമൂട് സ്വാതി ലൈനിൽ കൈതൂർകോണം തടത്തരികത്ത് വീട്ടിൽ സൂസൻ (31) ആണ് മരിച്ചത്. ഞായറാഴ്ച വൈകീട്ട് ആറുമണിയോടുകൂടിയാണ് അപകടം.
നരുവാമൂട്ടിൽ താമസിക്കുന്ന അമ്മയെ വീട്ടിൽ കൊണ്ടാക്കിയ ശേഷം മടങ്ങി വരുമ്പോൾ വീട്ടിലേയ്ക്ക് തിരിയുന്ന സമയത്ത് പ്രാവച്ചമ്പലം ഭാഗത്തു നിന്നും വന്ന കാർ നിയന്ത്രണം വിട്ട് ഇടിക്കുകയായിരുന്നു. കാറിനടിയിലേയ്ക്ക് വീണ സൂസൻ തത്ക്ഷണം മരിച്ചു. കൂടെയുണ്ടായിരുന്ന ഏഴുവയസുകാരൻ മകൻ ഷാരോൺ മറുഭാഗത്തേയ്ക്ക് തെറിച്ചു വീഴുകയായിരുന്നു. ഷാരോണിന് സാരമായ പരിക്കുണ്ട്. കാറിലുണ്ടായിരുന്നവർക്കും പരിക്കുണ്ട്. ഭർത്താവ് : നിഖിൽ. മൊബൈൽ ഷോപ്പ് ജീവനക്കാരിയായിരുന്നു സൂസൻ .
